ការផ្ទុះគ្រាប់បែកដ៏ខ្លាំងក្លាមួយគ្រាប់នៅក្នុងព្រះវិហារឥស្លាមមួយកន្លែងដែលពោរពេញដោយមនុស្សកកកុញនៅភាគពាយ័ព្យប្រទេសប៉ាគីស្ថាននៅថ្ងៃចន្ទនេះ បានធ្វើឱ្យអ្នកបួងសួងយ៉ាងតិច ២៨ នាក់ស្លាប់ និង១៥០ នាក់ទៀតរងរបួស។
ការវាយប្រហារនៅពេលរសៀលថ្ងៃចន្ទនេះនៅកណ្ដាលក្រុង Peshawar ដែលជាទីរួមខេត្តនៃខេត្ត Khyber Pakhtunkhwa ត្រូវបានគេរាយការណ៍ថាបានធ្វើឡើងដោយអ្នកដាក់គ្រាប់បែកអត្តឃាតម្នាក់។
លោកស្នងការរង Shafiullah Khan ដែលជាមន្ត្រីសន្តិសុខជាន់ខ្ពស់មួយរូប បានបញ្ជាក់អះអាងអំពីចំនួនអ្នកស្លាប់និងរងរបួសនេះនៅក្នុងទូរទស្សន៍របស់រដ្ឋដោយលោកបារម្ភថា ចំនួនអ្នកស្លាប់ទំនងជានឹងកើនឡើង។
មន្ត្រីសុខាភិបាលនៃមន្ទីរពេទ្យក្នុងក្រុង Peshawar បានអះអាងថាបានទទួលព្យាបាលអ្នករងរបួសរាប់សិបនាក់ និងថា អ្នកខ្លះក្នុងចំណោមនោះស្ថិតក្នុងស្ថានភាព«ធ្ងន់ធ្ងរ»។
អ្នករស់រានមានជីវិតនិងបុគ្គលិកសង្គ្រោះបន្ទាន់បាននិយាយថា ដំបូលព្រះវិហារបានស្រុតចុះដោយសារតែការផ្ទុះដ៏ខ្លាំងក្លា។
មន្ត្រីប៉ូលិសមិនបានរៀបរាប់ភ្លាមៗអំពីលក្ខណៈនៃការវាយប្រហារនេះទេ ដោយបាននិយាយថា ការស៊ើបអង្កេតកំពុងដំណើរការ។
នាយករដ្ឋមន្ត្រីប៉ាគីស្ថានលោក Shahbaz sharif «បានថ្កោលទោសការបំផ្ទុះគ្រាប់បែកអត្តឃាតនៅព្រះវិហារឥស្លាម» នៅក្នុងក្រុង Peshawar នេះ។ នេះបើយោងតាមសេចក្ដីថ្លែងការណ៍ផ្លូវការមួយដែលធ្វើឡើងនៅក្នុងទីក្រុងអ៊ីស្លាម៉ាបាដ រដ្ឋធានីនៃប្រទេសប៉ាគីស្ថាន។
ព្រះវិហារឥស្លាមនេះជារឿយៗត្រូវបានមន្ត្រីសន្តិសុខនិងមន្ត្រីរដ្ឋាភិបាលទៅបួងសួងដែរ។
មិនមាននរណាម្នាក់ចេញមុខអះអាងទទួលខុសត្រូវភ្លាមៗចំពោះការបំផ្ទុះគ្រាប់បែកដ៏ប្រល័យនេះទេ។
ខេត្ត Khyber Pakhtunkhwa របស់ប៉ាគីស្ថាននេះមានព្រំប្រទល់ជាប់នឹងប្រទេសអាហ្វហ្គានីស្ថាន និងធ្លាប់ជួបប្រទះការវាយប្រហារភេរវកម្មម្ដងហើយម្ដងទៀតនៅក្នុងរយៈពេលប៉ុន្មានខែថ្មីៗនេះ។ អំពើហិង្សាភាគច្រើនកាលពីលើកមុនៗត្រូវបានអះអាងទទួលខុសត្រូវដោយក្រុមខុសច្បាប់ Tehrik-i-Taliban Pakistan ដែលគេស្គាល់ថាជាក្រុមតាលីបង់ (Taliban) នៅប្រទេសប៉ាគីស្ថាន៕