សកម្មជនគណបក្សសង្គ្រោះជាតិចំនួនបីរូបត្រូវបានចាប់ឃុំខ្លួនបណ្តោះអាសន្នជាបន្តបន្ទាប់នាថ្ងៃពុធនេះពាក់ព័ន្ធនឹងបាតុកម្មរំដោះទីលានប្រជាធិបតេយ្យកាលពីថ្ងៃទី១៥ ខែកក្កដាឆ្នាំ២០១៤។ ការចាប់ខ្លួននេះគឺធ្វើឡើងបន្ទាប់ពីមានការបញ្ជាពីលោកនាយករដ្ឋមន្ត្រី ហ៊ុន សែន កាលពីថ្ងៃច័ន្ទ។
លោក អ៊ូ ច័ន្ទឫទ្ធិ មន្ត្រីជាន់ខ្ពស់គណបក្សសង្គ្រោះជាតិ បញ្ជាក់ថាសកម្មជនទាំងបីនាក់នេះស្ថិតនៅក្នុងចំណោម៥រូបដែលតុលាការក្រុងភ្នំពេញសម្រេចចេញដីការចាប់ខ្លួនពាក់ព័ន្ធនឹងអំពើហិង្សាក្បែរស្ពាននាគកាលពីឆ្នាំមុននោះ។ លោកបានឲ្យដឹងផងដែរថាការចាប់ខ្លួននេះផ្ទុយទៅនឹងកិច្ចព្រមព្រៀងនយោបាយរវាងគណបក្សប្រជាជនកម្ពុជានិងគណបក្សសង្គ្រោះជាតិ៖
«ការចាប់ខ្លួននេះទី១វាខុសនឹងកិច្ចព្រមព្រៀងគ្នាខែកក្កដា២០១៤ រវាងគណបក្សទាំងពីរដែលមានអាសនៈនៅក្នុងរដ្ឋសភា ដែលយើងព្រមព្រៀងគ្នាថានឹង បញ្ឈប់ ការគំរាមកំហែង ការចាប់ខ្លួន គ្រប់សព្វបែបយ៉ាងនេះ។ ទី២ យើងឃើញថា លោកនាយករដ្ឋមន្ត្រីហ៊ុន សែនមានប្រសាសន៍ប៉ុន្មានថ្ងៃមុនពេលចាប់ខ្លួននឹង ចាប់ខ្លួននេះ ឲ្យចាប់ខ្លួនអ្នកដែលនៅទីលានប្រជាធិបតេយហ្នឹង បន្ទាប់មកយើងឃើញថាមានការចាប់ខ្លួនតាមអ្វីដែលលោកមានប្រសាសន៍»។
លោក អ៊ូ ច័ន្ទឫទ្ធិបានបន្តថាប្រធានគណបក្សរបស់លោកគឺលោកសម រង្ស៊ីដែលស្ថិតនៅឯក្រៅប្រទេស និងលោកកឹម សុខា នឹងបន្តប្រើប្រាស់វប្បធម៌សន្ទនាបន្តទៀតដើម្បីឈានដល់ការដោះលែងសកម្មជនរបស់គណបក្សខ្លួន។
កាលពីថ្ងៃទី២១ខែកក្កដាកន្លងទៅតុលាការក្រុងភ្នំពេញបានសម្រេចដាក់ទោសមន្ត្រីនិងសកម្មជនគណបក្សសង្គ្រោះជាតិចំនួន១១រូប ឱ្យជាប់ពន្ធនាគារពី៧ដល់២០ឆ្នាំទាក់ទងនឹងសំណុំរឿងហិង្សានៅក្បែរទីលានប្រជាធិបតេយ្យនេះដែរ។
ការដាក់ទោសនេះគឺមិនបានប៉ុន្មានថ្ងៃ ក្រោយពេលដែលសកម្មជនគណបក្សសង្គ្រោះជាតិជាង២ពាន់នាក់ ចុះទៅពិនិត្យបង្គោលព្រំដែននាខេត្ត ស្វាយរៀង ដែលធ្វើឲ្យបញ្ហាព្រំដែននិងបញ្ហានយោបាយរវាងគណបក្សសង្គ្រោះជាតិនិងគណបក្សកាន់អំណាចរបស់លោកនាយករដ្ឋមន្ត្រី ហ៊ុន សែនមានភាពល្អក់កករឡើងវិញ។
មេធាវីរបស់តំណាងក្រុមសម្មជនគណបក្សសង្គ្រោះជាតិលោក សំ សុខគង់ បានឲ្យដឹងថាចៅក្រមស៊ើបសង្កេតនាតុលាការក្រុងភ្នំពេញបានសម្រេចឃុំខ្លួនកូនក្តីទាំងបីរូបរបស់លោកនៅក្នុងមន្ទីរឃុំឃាំងព្រៃសដើម្បីស៊ើបសួរបន្តទៀត។ ក្នុងនោះសកម្មជន២រូបត្រូវបានចាប់ខ្លួននា រាត្រីថ្ងៃអង្គារនិង១រូបផ្សេងទៀតត្រូវបានចាប់ខ្លួននាល្ងាចថ្ងៃពុធនេះ។ លោកមេធាវីរូបនេះក៏បានឲ្យដឹងផងដែរថាក្រុមសកម្មជនដែលត្រូវចាប់ខ្លួនរួមមាន លោករឿន ចិត្រា អាយុ ២៨ យុន គឹមហួរ ៣៣ និងលោក យាថុង អាយុ៤៣ ឆ្នាំ។
«ចំពោះខ្ញុំជាមេធាវីរបស់គាត់ ខ្ញុំយល់ថាការឃុំខ្លួននេះគឺវាមិនទាន់មានលក្ខណៈមួយត្រឹមត្រូវទេព្រោះបើយើងយល់ពីសិទ្ធិនៃជនជាប់ចោទគឺជនជាប់ចោទត្រូវមានសេរីភាព»។
លោកបានបន្តទៀតថា៖«ការចាប់ខ្លួនខ្ញុំមើលទៅគឺហាក់បីដូចជាមានការគ្រោងទុកនិងប្រុងប្រៀបមុនហ្នឹងណា ព្រោះថាដីកាចាប់ខ្លួនធ្វើនៅថ្ងៃទី៤ ខែសីហា ហើយមានការចាប់ខ្លួនពួកគេពីរនាក់ហ្នឹងនាថ្ងៃដូចគ្នា»។
លោកបានបញ្ជាក់ថាកូនក្តីរបស់លោកមិនបានចូលរួមប្រព្រឹត្តអំពើរហិង្សាដូចការចោទរបស់តុលាការនោះទេ។
កាលពីថ្ងៃច័ន្ទកន្លងទៅលោក ហ៊ុន សែនបានប្រកាសជាសាធារណៈឲ្យអាជ្ញាធរតាមចាប់ខ្លួនអ្នកដែលប្រព្រឹត្តអំពើហិង្សាដើម្បី រំដោះទីលានប្រជាធិបតេយ្យមកដាក់ទោសទណ្ឌ។ ក្នុងនោះលោកក៏បានឲ្យតំណាងរាស្ត្រគណបក្សសង្គ្រោះជាតិនិងមន្ត្រីចំនួន៧រូបចូលបំភ្លឺតុលាការតាមការកោះហៅរបស់តុលាកាផងដែរ។
លោក ហ៊ុនសែនបានថ្លែងក្នុងភាពក្រេវក្រោធថា៖ «កុំថារឿងនេះជារឿងនយោបាយ ហើយកិច្ចព្រមព្រៀង មើលកិច្ចព្រមព្រៀង ២២ ខែកក្កដា ព្រោះវាអត់មានកិច្ចព្រមព្រៀងមួយណាវាអាចទៅត្រួតត្រាអាបទល្មើសព្រហ្មទណ្ឌបានទេ»។
លោក អ៊ូ ច័ន្ទឫទ្ធិ បានបញ្ជាក់ប្រាប់ VOA ថា តំណាងរាស្ត្រនិងមន្ត្រីទាំង៧រូបរបស់គណបក្សសង្គ្រោះជាតិបានចូលបំភ្លឺតុលាការជាបន្តបន្ទាប់រួចមកហើយចាប់តាំងពីថ្ងៃដែលផ្ទុះអំពើហិង្សានោះ។ ទោះជាយ៉ាងនេះក៏ដោយលោកបានបន្ថែមថាដើម្បីឈានដល់ការចាប់ខ្លួនតំណាងរាស្ត្រណាមួយតុលាការត្រូវតែមានការស្នើសុំទៅកាន់រដ្ឋសភាក្នុងព្យួរអភ័យឯកសិទ្ធិជាមុនសិន។
អ្នកតំណាងរាស្ត្រជាប់ឆ្នោតចំនួន៥រូបដែលពាក់ព័ន្ធនឹងសំណុំរឿងនេះរួមមាន លោកស្រី មួរ សុខហួរ លោក ហូរ វ៉ាន់ លោក រៀល ខេមរិន្រ្ទ លោក កែវ ភារម្យ និង លោក ម៉ែន សុថាវរិន្រ្ទ៕