ក្រុមយុវជននិងព្រះសង្ឃ នៅថ្ងៃព្រហស្បតិ៍នេះ បានបន្តការដើរក្នុងខេត្តតាកែវ ដើម្បីផ្សព្វផ្សាយអំពីលោក កែម ឡី ដែលត្រូវបានបាញ់សម្លាប់កាលពី ៤ឆ្នាំមុន ដោយមានការឃ្លាំមើលនិងការព្យាយាមរារាំងពីប៉ូលិសជាបន្តបន្ទាប់។
ក្រុមយុវជនដែលមានទាំងព្រះសង្ឃផងនោះ ប្រមាណ ២៥ អង្គនាក់ មកពីក្រុមយុវជនខ្មែរថាវរៈ សម្ព័ន្ធនិស្សិតបញ្ញវន្តខ្មែរ សកម្មជនបរិស្ថានN1M និងយុវជនមាតាធម្មជាតិផង។ នេះជាថ្ងៃពីរហើយនៃការដើរជាក្រុម ដើម្បីចូលរួមរំឭកព្រឹត្តិការណ៍បាញ់សម្លាប់លោក កែម ឡី។
កាលពីថ្ងៃពុធ ពួកគេមិនត្រូវបានអនុញ្ញាតឲ្យប្រមូលផ្តុំ និងធ្វើពិធីអ្វីនៅស្ថានីយប្រេងសាំងកាល់តិចស្តុបបូកគោ ក្នុងខណ្ឌចំការមន រាជធានីភ្នំពេញ ជាកន្លែងលោក កែម ឡី ត្រូវបានខ្មាន់កាំភ្លើងបាញ់សម្លាប់ នៅព្រឹកថ្ងៃទី១០ ខែកក្កដា ឆ្នាំ២០១៦។
លោក ហ៊ុន វណ្ណៈ អាយុ ៣៨ ឆ្នាំ ជាសមាជិកក្រុមយុវជនខ្មែរថាវរៈ ថ្លែងប្រាប់ VOA នៅថ្ងៃព្រហស្បតិ៍នេះថា ក្រុមយុវជនបានដើរពីផ្ទះលោក កែម ឡី ក្នុងខេត្តតាកែវតាមដងផ្លូវ ដើម្បីចែកសៀវភៅអំពីលោក កែម ឡី និងចែកបន្តោងសោ ដែលមានរូបលោក កែម ឡី ផងដែរ។ លោកបន្តថាគោលបំណងនៃការដើរនេះគឺដើម្បីផ្សព្វផ្សាយអំពីវីរភាពរបស់លោក កែម ឡី មុនថ្ងៃគម្រប់ខួប ៤ឆ្នាំនៃមរណភាពរបស់លោក ដែលនឹងធ្វើឡើងនៅថ្ងៃសុក្រស្អែកនេះ។
លោក ហ៊ុន វណ្ណៈ បន្ថែមថា ការដើរនេះត្រូវបានតាមដានដោយកម្លាំងប៉ូលិសរាប់សិបនាក់ ហើយពួកគេបានព្យាយាមឃាត់ក្រុមយុវជនចំនួន ៥ដង តែមិនអាចទប់ស្កាត់បាន។ លោកបញ្ជាក់ថា ក្រុមរបស់លោកធ្វើសកម្មភាពនេះត្រឹមត្រូវតាមច្បាប់ ដោយសារនេះជាសេរីភាពដែលមានចែងក្នុងរដ្ឋធម្មនុញ្ញ ខណៈអាជ្ញាធរទាមទារលិខិតអនុញ្ញាតការធ្វើសកម្មភាពនេះ។
លោកមានប្រសាសន៍ថា៖ «អាជ្ញាធរដែលជាអ្នកកាន់ច្បាប់ អត់យល់ច្បាប់។ បែរជាប្រជាពលរដ្ឋវិញ អ្នកពន្យល់ច្បាប់ទៅគាត់។ ហើយទីពីរអាជ្ញាធរខ្លួនឯង អ្នកកាន់ច្បាប់ទៅរំលោភរដ្ឋធម្មនុញ្ញ»។
ក្នុងការព្យាយាមទប់ស្កាត់កុំឲ្យក្រុមយុវជនដើរនោះ កម្លាំងសមត្ថកិច្ចក៏កាន់កាំភ្លើងវែងផងដែរ។
VOA មិនអាចសុំការអត្ថាធិប្បាយពីលោក សុខ សំណាង ស្នងការនគរបាលខេត្តតាកែវបានទេនៅថ្ងៃព្រហស្បតិ៍នេះ៕