ក្រុមហ៊ុនផលិតឱសថរបស់សហរដ្ឋអាមេរិក Moderna បានឲ្យដឹងកាលពីថ្ងៃច័ន្ទថា វ៉ាក់សាំងកូវីដ១៩ របស់ខ្លួនទំនងជាផលិតអង់ទីគ័រប្រឆំាងនឹងជំងឺកូវីដ១៩វិវត្តថ្មី ដែលមានប្រភពមកពីចក្រភពអង់គ្លេស និងប្រទេសអាហ្វ្រិកខាងត្បូង។
នៅក្នុងសេចក្ដីថ្លែងការណ៍មួយ ក្រុមហ៊ុន Moderna បានឲ្យដឹងថា ខ្លួនបានធ្វើការស្រាវជ្រាវ ដើម្បីធានាថា វ៉ាក់សាំងរបស់ Moderna ចំនួនពីរដូស គឺអាចការពារបានជំងឺកូវីដ១៩ វិវត្តថ្មីនានាដែលគេទើបបានរកឃើញ។
ក្រុមហ៊ុននេះ បានឲ្យដឹងទៀតថា ខ្លួននឹងបន្តយុទ្ធសាស្ត្រព្យាបាល «ដើម្បីដោះស្រាយការរាតត្បាតយ៉ាងសកម្មនៃជំងឺកូវីដ១៩ ដែលកំពុងវិវត្តខ្លួន» រួមបញ្ចូលទំាងការធ្វើតេស្តពីប្រសិទ្ធភាពរបស់ដូសទីពីរនៃវ៉ាក់សំាងកូវីដ១៩របស់ខ្លួនផងដែរ។
ការលេចចេញជារូបរាងក្នុងពេលថ្មីៗនេះនូវជំងឺកូវីដ១៩វិវត្តថ្មីជាច្រើនប្រភេទដែលឆ្លងរាលដាលកាន់តែងាយនិងលឿង បានធ្វើឲ្យការចាក់វ៉ាក់សាំងក្លាយជាបញ្ហាសំខាន់បំផុតសម្រាប់មន្ត្រីសុខាភិបាល។ ហើយជំងឺកូវីដ១៩វិវត្តថ្មីពីចក្រភពអង់គ្លេសថែមទាំងអាចកាចសាហាវជាងកូវីដ១៩ពីមុនទៀត។
អ្នកវិទ្យាសាស្ត្របាននិយាយកាលពីសប្ដាហ៍មុនថា ទោះបីជំងឺកូវីដ១៩វិវត្តថ្មីពីចក្រភពអង់គ្លេសមាន អត្រាអ្នកស្លាប់ច្រើនជាងក្តី ក៏គេជឿថា វ៉ាក់សំាងដែលមានស្រាប់សព្វថ្ងៃនៅតែមានប្រសិទ្ធភាពប្រឆំាងវីរុសថ្មីនេះ។ ប៉ុន្តែអ្នកវិទ្យាសាស្ត្រនិយាយថា ជំងឺកូវីដ១៩វិវត្តថ្មីពីប្រទេសអាហ្វ្រិកខាងត្បូងវិញ ប្រហែលជាអាចកាត់បន្ថយប្រសិទ្ធភាពនៃវ៉ាក់សំាងដែលមានស្រាប់សព្វថ្ងៃបាន។
ព័ត៌មានពីក្រុមហ៊ុន Moderna នេះ កើតមានស្របពេលដែលករណីឆ្លងជំងឺកូវីដ១៩ សរុបជុំវិញពិភពលោក កំពុងកើនជិតដល់ ១០០ លានករណីហើយ៕