ជនចំណាកស្រុកជាច្រើននាក់បានសម្រុកចូលស្ថានីយ៍រថភ្លើងដ៏សំខាន់មួយក្នុងទីក្រុងប៊ុយដាប៉េស បន្ទាប់ពីអាជ្ញាធរប៉ូលិសបានបើកស្ថានីយ៍នេះឡើងវិញ។ ជនទាំងនោះមានក្តីសង្ឃឹមថា នឹងបានធ្វើដំណើរឆ្ពោះទៅទិសខាងលិច។ ប៉ុន្តែមន្ត្រីហុងគ្រីបាននិយាយថា នឹងមិនមានរថភ្លើងឆ្ពោះទៅបណ្តាប្រទេសនៅអឺរ៉ុបខាងលិចទេ។
នៅថ្ងៃព្រហស្បតិ៍នេះកងកម្លាំងប៉ូលិសបានចាកចេញពីស្ថានីយ៍រថភ្លើង Keleti បន្ទាប់ពីមានការប្រឈមមុខដាក់គ្នាមិនឈ្នះ មិនចាញ់អស់រយៈពេលពីរថ្ងៃជាមួយនឹងជនចំណាកស្រុករាប់រយនាក់ ដែលសង្ឃឹមថាបានឡើងជិះរថភ្លើងឆ្ពោះទៅប្រទេសអាល្លឺម៉ង់ ដើម្បីទៅសុំសិទ្ធិជ្រកកោននៅទីនោះ។
ប៉ុន្តែនៅពេលដែលគេអនុញ្ញាតឲ្យជនចំណាកស្រុកទាំងនោះចូលក្នុងស្ថានីយ៍ គេនៅមិនទាន់ដឹងច្បាស់នៅឡើយទេថា ពួកគេនឹងទៅទីណាដោយសារតែគ្មានរថភ្លើងដែលនឹងធ្វើដំណើរទៅទិសខាងលិច។
កាលពីថ្ងៃច័ន្ទអាជ្ញាធរហុងគ្រីបានអនុញ្ញាតឲ្យពលរដ្ឋទាំងនោះធ្វើដំណើរឆ្ពោះទៅទិសខាងលិចដោយចេញពីស្ថានីយ Keleti ដោយមិនចាំបាច់មានទិដ្ឋាការ បន្ទាប់ពីប្រទេសអាល្លឺម៉ង់ប្រកាសថា នឹងទទួលពាក្យសុំសិទ្ធិជ្រកកោន ប៉ុន្តែនៅថ្ងៃអង្គារមន្ត្រីហុងគ្រីបានបដិសេធមិនឲ្យអ្នកដែលគ្មានទិដ្ឋាការឆ្លងកាត់៕