មនុស្សរាប់រយនាក់ បាននាំគ្នាធ្វើបាតុកម្មកាលពីថ្ងៃអង្គារម្សិលមិញក្នុងទីក្រុង Melbourne ដែលជាទីក្រុងធំទី២របស់ប្រទេសអូស្ត្រាលី ដើម្បីប្រឆាំងនឹងការរឹតបន្តឹងលើវិធានការជំងឺកូវីដ១៩ ដែលត្រូវបានដាក់ចេញដោយរដ្ឋាភិបាលនៅក្នុងវិស័យឧស្សាហកម្មសំណង់។
មន្ត្រីអូស្ត្រាលី បានប្រកាសថា ការដ្ឋានសំណង់នានានៅក្នុងទីក្រុង Melbourne នឹងត្រូវបិទរយៈពេល២សប្តាហ៍ ខណៈពេលដែលមានការព្រួយបារម្ភថា សកម្មភាពរបស់កម្មករសំណង់ នឹងរួមចំណែកក្នុងការចម្លងជំងឹកូវីដ១៩ ទៅអ្នកដទៃ។
កម្មករសំណង់ទាំងអស់នៅពេលនេះ ក៏នឹងតម្រូវឲ្យចាក់វ៉ាក់សាំងបង្ការជំងឺកូវីដ១៩ យ៉ាងហោចណាស់ក៏មួយដូសដែរ មុនត្រូវបានអនុញ្ញាតឲ្យវិលត្រឡប់ទៅកន្លែងធ្វើការវិញ។
ទីក្រុង Melbourne នៃរដ្ឋ Victoria របស់ប្រទេសអូស្ត្រាលី មានអ្នកឆ្លងជំងឹកូវីដ១៩ថ្មីចំនួន៦០៣នាក់កាលពីថ្ងៃអង្គារ ដែលជាការឆ្លងក្នុងចំនួនដ៏ច្រើនបំផុតក្នុងមួយថ្ងៃក្នុងឆ្នាំនេះ។
ដោយឡែកនៅក្នុងប្រទេសនូវែលសេឡង់ឯណ្ណោះវិញ នាយករដ្ឋមន្ត្រីរបស់ប្រទេសនេះ លោកស្រី Jacinda Ardern បានប្រកាសថា តម្លៃនៃការផាកពិន័យចំពោះអ្នកបំពានដោយចេតនាទៅលើវិធានការច្បាប់បង្ការជំងឹកូវីដ១៩ នឹងត្រូវបង្កើនចាប់ពីខែវិច្ឆិកាទៅ ពីចំនួន ២.៨០០ ដុល្លារទៅ ៨.៤០០ ដុល្លារ និងអាចជាប់ពន្ធនាគាររហូតដល់៦ខែ សម្រាប់អ្នកដែលប្រឆាំងនឹងវិធានការរឹតបន្តឹងនេះ។
រីឯនៅក្នុងសហរដ្ឋអាមេរិកវិញ អភិបាលរដ្ឋវ៉ាស៊ីនតោនលោក Jay Inslee បានស្នើសុំដល់រដ្ឋាភិបាលសហព័ន្ធឲ្យជួយដោះស្រាយបញ្ហាខ្វះខាតមន្ទីរពេទ្យដោយសារវីរុសដែលតាបំប្លែងខ្លួនថ្មី បានធ្វើមានការឆ្លងយ៉ាងខ្លាំង។
កាលពីថ្ងៃចន្ទកន្លងទៅ ចំនួនអ្នកស្លាប់សរុបដោយសារជំងឺកូវីដ១៩នៅក្នុងសហរដ្ឋអាមេរិក បានឡើងទៅដល់ចំនួន៦៧៥.៩៧៥នាក់ គឺកើនលើសចំនួនអ្នកស្លាប់ដោយសារជំងឺផ្តាសាយអេស្ប៉ាញកាលពីឆ្នាំ១៩១៨៕
ព័ត៌មានខ្លះនៃសេចក្តីរាយការណ៍នេះ ដកស្រង់ពីទីភ្នាក់ងារព័ត៌មាន AP និង Reuters។