អស់រយៈពេលជាងមួយខែមកហើយដែលអ្នកវិភាគកិច្ចអភិវឌ្ឍន៍សង្គមដ៏មានប្រជាប្រិយភាពមួយរូបគឺលោកបណ្ឌិត កែម ឡី ត្រូវខ្មាន់កាំភ្លើងបាញ់សម្លាប់នៅស្តាម៉ាតមួយនៅក្នុងស្ថានីយ៍ចាក់សាំងមួយនៅកណ្ដាលក្រុងភ្នំពេញ ពោលគឺតំាងពីថ្ងៃទី១០ខែកក្កដាកន្លងមក ហើយសពរបស់លោកត្រូវតម្កល់ទុកនៅឯស្រុកកំណើតរបស់លោកនៅខេត្តតាកែវ។ គេសង្កេតឃើញមានប្រជាពលរដ្ឋដែលធ្លាប់ស្ដាប់ការវិភាគរបស់លោកតាមវិទ្យុ មិត្តភក្ដិ សហសេវិក និងសិស្សនិស្សិតបន្តនាំគ្នាមកគោរពវិញ្ញាក្ខន្ធរបស់លោកបណ្ឌិត កែម ឡី ឥតឈប់ឈរ ពីព្រលឹមទល់ព្រលប់ជារៀងរាល់ថ្ងៃ ពិសេសនាថ្ងៃចុងសប្ដាហ៍។
នាថ្ងៃសៅរ៍ទី១៣ ខែសីហានេះ ក្នុងចំណោមអ្នកធ្វើដំណើរឆ្លងកាត់តាមផ្លូវជាតិលេខ២០រវាងផ្លូវជាតិលេខ២និងលេខ៣ មានអ្នកខ្លះឈប់រថយន្ត និងម៉ូតូរបស់ខ្លួននៅចំណុចភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ ដែលជាកន្លែងតម្កល់សពលោកបណ្ឌិត កែម ឡី អ្នកវិភាគកិច្ចអភិវឌ្ឍន៍សង្គមដ៏មានប្រជាប្រិយភាពមួយរូប។ អ្នកដំណើរទាំងអស់នេះដែលចូលគោរពវិញ្ញាណក្ខន្ធបានធ្វើដំណើរស្កាត់មកពីខេត្តឆ្ងាយៗ ដើម្បីធ្វើការគោរពវិញ្ញាណក្ខន្ធអ្នកវិភាគកិច្ចអភិវឌ្ឍន៍សង្គមដ៏មានទេពកោសល្យនេះ ដោយសារប្រជាពលរដ្ឋទាំងអស់នេះខកខានមិនបានចូលរួមហែសពលោកកាលពីថ្ងៃទី២៤ ខែកក្កដាកន្លងទៅនោះ។
ប្រជាពលរដ្ឋអុជធូបគោរពវិញ្ញាណក្ខន្ធលោកបណ្ឌិត កែម ឡី អ្នកវិភាគកិច្ចអភិវឌ្ឍន៍សង្គមនៅស្រុកត្រាំកក់ ខេត្តតាកែវ នៅថ្ងៃសៅរ៍ ទី១៣ ខែសីហា ឆ្នាំ២០១៦។ (ឡេង ឡែន/VOA)
អាជីវករមួយរូបមកពីរាជធានីភ្នំពេញ លោក ម៉ុម ធី ដែលស្គាល់លោកបណ្ឌិត កែម ឡី តាមរយៈការផ្សាយរបស់វិទ្យុនានា និងបណ្ដាញសង្គមហ្វេសប៊ុក ប្រាប់ VOA ថា លោកចូលចិត្តការវិភាគរបស់លោក កែម ឡី ដោយសារលោកវិភាគងាយយល់ និងនិយាយចំៗ។
បន្ទាប់ពីអុជធូបរួច លោក ម៉ុម ធី និយាយប្រាប់ VOA ថា៖
«នឹកអនុសាវរីយ៍គាត់ត្រង់ថា បើគាត់និយាយវិភាគអីអញ្ចឹងវាត្រូវ។ ចូលចិត្តសម្លេងគាត់ ចូលចិត្តការនិយាយរបស់គាត់យូរហើយនេះ។ គ្រាន់តែចាំសម្លេងគាត់។ ស្ដាយតើ អ្នកមានវិជ្ជាជីវៈដ៏ខ្ពង់ខ្ពស់។ បាត់បង់គាត់ ស្ដាយ។ មនុស្សម្នាក់ៗ វាមិនងាយធ្វើបានដូចគាត់ទេ។ ខ្ញុំចង់និយាយអញ្ចឹងហ្មង»។
កន្លងមកលោក កែម ឡី ធ្លាប់វិភាគអំពីកិច្ចអភិវឌ្ឍន៍សង្គមមួយចំនួន ដូចជាគោលនយោបាយរបស់គណបក្សនយោបាយនានា និងចុងក្រោយបំផុតលោកនិយាយអំពីរបាយការណ៍របស់អង្គការ Global Witness ដែលនិយាយអំពីជំនួញរបស់ក្រុមគ្រួសារលោកនាយករដ្ឋមន្រ្តី ហ៊ុន សែន ជាដើម។
អ្នកស្រីហ៊ី គឹមហៀង កសិករមកពីស្រុកភ្នំក្រវាញ ខេត្តពោធិ៍សាត់ និងកូនប្រុសអុជធូបគោរពវិញ្ញាណក្ខន្ធលោកបណ្ឌិត កែម ឡី អ្នកវិភាគកិច្ចអភិវឌ្ឍន៍សង្គម នៅស្រុកត្រាំកក់ ខេត្តតាកែវ នៅថ្ងៃសៅរ៍ ទី១៣ ខែសីហា ឆ្នាំ២០១៦។ (ឡេង ឡែន/VOA)
ចំណែកឯអ្នកស្រី ហ៊ី គឹមហៀង កសិករមកពីស្រុកភ្នំក្រវាញ ខេត្តពោធិ៍សាត់ ធ្លាប់ស្ដាប់ការវិភាគរបស់លោកបណ្ឌិត កែម ឡី ត្រឹមតែចំនួនពីរដងប៉ុណ្ណោះមុននឹងលោកត្រូវខ្មាន់កាំភ្លើងបាញ់ស្លាប់។ អ្នកស្រីនិយាយថា អ្នកស្រីរន្ធត់ជាខ្លាំង ហើយតែងតែយល់សប្តិឃើញរូបលោកបណ្ឌិត កែម ឡី ក្រោយពេលឮដំណឹងអំពីឃាតកម្មលើអ្នកវិភាគសង្គមដែលមិនសំចៃមាត់នេះ។
បន្ទាប់ពីអុជធូបឧទ្ទិសកុសលដល់វិញ្ញាណក្ខន្ធលោកបណ្ឌិត កែម ឡី អ្នកស្រីប្រាប់ VOA ថា៖
«ឮបានតែពីរង៉ៃ គ្រួសារខ្ញុំថា ហឹម! ម៉ែអាបារាំងអើយ កែម ឡី ហ៊ាននិយាយចំៗ ង៉ៃណាគេសម្លាប់ហើយ។ ថាអញ្ចេះ បានតែពីរថ្ងៃ ពេលខ្ញុំត្រឡប់ពីមើលគោ បើករ៉ាយ៉ូស្ដាប់ ស្រាប់តែឮថា គេសម្លាប់ កែម ឡី។ ធ្លាក់រ៉ាដយ៉ូពីដៃ។ ធ្លាក់រ៉ាដយ៉ូពីដៃយំហ៊ូតាម្ដង ហើយធ្លាប់ស្ដាប់តែពីរដងទេណា។ ក៏ខ្ញុំយប់ឡើង ខ្ញុំដេកយល់សប្តិឃើញរាល់ថ្ងៃ។ ខ្ញុំក៏ថា អូនអើយកុំឲ្យបងយល់សប្តិឃើញ បងមិនដែលស្គាល់អូនឯងទេ។ តែខ្ញុំមកភ្នំពេញ ខ្ញុំឲ្យកូនជូនខ្ញុំមកនេះ ហើយមកគោរពក៏បាត់រហូតណាអូន!។ ខ្ញុំនៅស្រុកភ្នំក្រវាញខេត្តពោធិ៍សាត់ ដល់ពេលខ្ញុំបន់ក៏បាត់ទៅ។ ហើយស្ដាប់សម្លេងដែលនៅរស់បានតែពីរថ្ងៃ។ ហើយគ្រួសារខ្ញុំនិយាយថា ម៉ែអាបារាំង ថ្ងៃណាមួយគេបាញ់ហើយ គាត់ហ៊ាននិយាយដូចឯងអញ្ចឹង»។
អ្នកស្រីបានរំឭកសម្ដីលោក កែម ឡី៖
«ចាំតើ អាពេលខោអាវរហែកនោះ យើងពាក់ខោអាវរហែកដើរចូលផ្សារ យើងមិនប៉ះ គេថា ប៉ះទៅវាជិតទៅ គេឈប់និយាយពីយើងហើយ»។
មិនខុសពីប្រជាពលរដ្ឋមកពីខេត្តពោធិ៍សាត់ដែរ យុវជនមួយរូបអមដោយមិត្តភក្តិម្នាក់ទៀត បានចំណាយពេលមួយសន្ទុះធំ អង្គុយសរសេរនៅលើសៀវភៅ នៅខាងមុខផ្នូរមួយ ដែលមានរូបថតលោកបណ្ឌិត កែម ឡី ដ៏ធំចំនួនពីរអមសាងខាងផ្នូរ និងមានហិបបរិច្ចាគដាក់ខាងមុខដែលសរសេរថា«មូលនិធិបណ្ឌិត កែម ឡី»។ យុវជនរូបនេះមានឈ្មោះថា សឿង សុភ័ន និសិ្សតឆ្នាំទីមួយផ្នែកមេកានិចនៃវិទ្យាស្ថានជាតិពហុបច្ចេកទេសកម្ពុជា។ គាត់ធ្លាប់ចូលរួមសិក្ខាសាលាដែលឧទ្ទេសនាមដោយលោកបណ្ឌិត កែម ឡី បីខែមុនពេលដែលលោកត្រូវខ្មាន់កាំភ្លើងបាញ់សម្លាប់។
យុវនិស្សិត សឿន សុភ័ន បានប្រាប់ VOA ថា រូបគេបានយល់ដឹងទាក់ទងស្ថានការណ៍សង្គមយ៉ាងច្រើនតាមរយៈការស្តាប់ការវិភាគរបស់លោកបណ្ឌិត កែម ឡីអស់រយៈពេលជាច្រើនឆ្នាំមកនេះ ហើយជាពិសេសបានចូលរួមសិក្ខាសាលាដែលមានលោកបណ្ឌិត កែម ឡី ជាវាគ្មិនផងដែរ។
ប្រជាពលរដ្ឋអុជធូបគោរពវិញ្ញាណក្ខន្ធលោកបណ្ឌិត កែម ឡី អ្នកវិភាគកិច្ចអភិវឌ្ឍន៍សង្គមនៅស្រុកត្រាំកក់ ខេត្តតាកែវ នៅថ្ងៃសៅរ៍ ទី១៣ ខែសីហា ឆ្នាំ២០១៦។ (ឡេង ឡែន/VOA)
បន្ទាប់ពីសរសេរប្រវត្តិសង្ខេបរបស់លោកបណ្ឌិត កែម ឡី លោក សឿន សុភ័នប្រាប់ VOA ទាំងទឹកមុខក្រៀមក្រំថា៖
«ដំបូងខ្ញុំមកគឺដើម្បីគោរពនូវភាពអង់អាចរបស់គាត់ទីមួយ ហើយទីពីរខ្ញុំកត់ជីវប្រវត្តិសង្ខេបរបស់គាត់ដើម្បីឲ្យកូនចៅជំនាន់ក្រោយរបស់ខ្ញុំបានដឹង ឲ្យស្គាល់នូវវីរៈភាពអង់អាចរបស់គាត់។ ទីមួយគាត់ហ៊ាននិយាយអ្វីជាការណ៍ពិត»។
ដូចអ្នកដំណើរដទៃទៀតដែរ អ្នកស្រី សួស សុភឿន ប្រជាពលរដ្ឋមកពីខេត្តកណ្ដាលម្នាក់ទៀត បានអំពាវនាវឲ្យមានការចាប់ជនដៃដល់សម្លាប់លោកបណ្ឌិត កែម ឡី និងអ្នកសម្លាប់ជនរងគ្រោះបាត់បង់ជីវិតដោយអំពើឃាតកម្មផ្សេងទៀតកន្លងមក។
«ខ្ញុំមិនទៅជឿទេ អាណាទៅដាក់ឈ្មោះ«ជួប សម្លាប់»។ ខ្ញុំចង់ឲ្យគេរកឲ្យឃើញអាឃាតករសម្លាប់ពួកគាត់ហ្នឹង។ ខ្ញុំស្រឡាញ់គាត់។ ពួកគាត់ស្នេហាជាតិ»។
តែទោះជាយ៉ាងណាក្ដី បើតាមសាច់ញាត្តិ និងក្រុមគ្រួសារ តំណាងអាជ្ញាធរមានសមត្ថកិច្ចមិនទាន់បានផ្ដល់ដំណឹងអំពីការដាក់ទោសលើជនដៃដល់ណាម្នាក់នៅឡើយទេ គឺមានតែដំណឹងថា ប៉ូលិសចាប់បានជនសង្ស័យឈ្មោះ អឿត អាង ដែលប្រាប់ប៉ូលិសថា ខ្លួនឈ្មោះ«ជួប សម្លាប់» ប៉ុន្មានម៉ោងបន្ទាប់ពីមានឃាតកម្មលើលោកបណ្ឌិត កែម ឡី។
ក្រុមគ្រួសារនៃសពលោកបណ្ឌិត កែម ឡី បានប្រាប់ VOA ថា អ្នកមកគោរពវិញ្ញាណក្ខន្ធរូបលោក មកតាំងពីព្រលឹមទល់ព្រលប់ ចាប់តាំងពីថ្ងៃច័ន្ទដល់អាទិត្យ ដែលមានយ៉ាងហោចណាស់ចំនួន៣០នាក់ក្នុងមួយថ្ងៃ ហើយចំនួននេះកើនដល់១០០នាក់នាថ្ងៃចុងសប្ដាហ៍៕