ក្រុមហ៊ុន FGV Holdings Berhad ដែលជាក្រុមហ៊ុនផលិតដូងប្រេងម៉ាឡេស៊ីបានសន្យាថានឹង «បញ្ជាក់ពីភាពស្អាតស្អំរបស់ខ្លួន» បន្ទាប់ពីសហរដ្ឋអាមេរិកបានហាមឃាត់ការនាំចូលដូងប្រេងដោយសារតែការចោទប្រកាន់ពាក់ព័ន្ធនឹងប្រើពលកម្មដោយបង្ខំ និងការរំលោភបំពានផ្សេងៗ។
ការិយាល័យពន្ធគយនិងការពារព្រំដែនរបស់សហរដ្ឋអាមេរិកបានចេញបទបញ្ជាមួយប្រឆាំងនឹងក្រុមហ៊ុន FGV ដោយបានលើកឡើងថា ការិយាល័យនេះបានរកឃើញថាក្រុមហ៊ុននេះប្រើពលកម្មដោយបង្ខំ រួមទាំងការព្រួយបារម្ភចំពោះពលកម្មកុមារ និងការរំលោភបំពានផ្សេងៗទៀត ដូចជាអំពើហិង្សាផ្លូវភេទនិងអំពើហិង្សាទៅលើរូបរាងកាយ។
វិធានការដែលត្រូវបានប្រកាសមួយសប្តាហ៍បន្ទាប់ពីសារព័ត៌មាន The Associated Press (AP) បានបង្ហាញពីការរំលោភបំពានដ៏ខ្លាំងក្លាមួយនៅក្នុងវិស័យការងារនៅក្នុងវិស័យដូងប្រេងក្នុងប្រទេសម៉ាឡេស៊ី ត្រូវបានធ្វើឡើងដោយសារតែញត្តិដែលអង្គការមិនស្វែងរកប្រាក់កម្រៃបានដាក់កាលពីឆ្នាំមុន។
ក្រុមហ៊ុន FGV បាននិយាយថា បញ្ហាទាំងអស់ដែលត្រូវបានលើកឡើង «ជាកម្មវត្ថុនៃការបង្ហាញជាសាធារណៈចាប់តាំងពីឆ្នាំ២០១៥មក ហើយក្រុមហ៊ុន FGV បានចាត់វិធានការមួយចំនួនដើម្បីកែប្រែស្ថានការណ៍រួចហើយ»។
ក្រុមហ៊ុន FGV បានសរសេរនៅក្នុងសេចក្តីថ្លែងការណ៍មួយថា «ក្រុមហ៊ុន FGV ខកចិត្តដែលសេចក្តីសម្រេចបែបនេះត្រូវបានធ្វើឡើង នៅពេលដែលក្រុមហ៊ុន FGV កំពុងតែចាត់វិធានការជាក់លាក់ក្នុងរយៈពេលប៉ុន្មានឆ្នាំនេះដើម្បីបង្ហាញពីការប្តេជ្ញាចិត្តរបស់ខ្លួនក្នុងការគោរពសិទ្ធិមនុស្ស និងប្រកាន់ខ្ជាប់នូវបទដ្ឋានការងារ»។
រូបឯកសារ៖ បុរសម្នាក់បេះផ្លែដូងប្រេងនៅចម្ការមួយក្នុងប្រទេសម៉ាឡេស៊ី ថ្ងៃទី១៥ ខែមិថុនា ឆ្នាំ២០២០។
ប្រទេសម៉ាឡេស៊ីគឺជាប្រទេសផលិតដូងប្រេងធំបំផុតទី២នៅក្នុងពិភពលោក។ បើរាប់ទាំងប្រទេសឥណ្ឌូណេស៊ី ប្រទេសទាំងពីរនេះគ្រប់ដណ្តប់ទីផ្សារសាកលលោក ដោយផលិតការផ្គត់ផ្គង់ចំនួន៨៥% ដែលមានទឹកប្រាក់ចំនួន៦៥ពាន់លានដុល្លារ។
ដូងប្រេងនិងផលិតផលធ្វើពីដូងប្រេងរបស់ក្រុមហ៊ុន FGV ដែលមានទំនាក់ទំនងជិតស្និតជាមួយនឹងអាជ្ញាធរសហព័ន្ធអភិវឌ្ឍដីធ្លីរបស់ម៉ាឡេស៊ីឬហៅកាត់ថា Felda កំពុងចរាចរណ៍នៅក្នុងសង្វាក់ផ្គត់ផ្គង់របស់ក្រុមហ៊ុនពហុជាតិសាសន៍សំខាន់ៗជាច្រើនដែលរួមមានក្រុមហ៊ុន Nestle ក្រុមហ៊ុន L’Oreal និងក្រុមហ៊ុន Unilever។ នេះបើយោងតាមបញ្ជីរោងចក្រដូងប្រេងនិងអ្នកផ្គត់ផ្គត់ដែលចេញផ្សាយនាពេលថ្មីៗនេះ។ ធនាគារធំៗនិងស្ថាប័នហិរញ្ញវត្ថុរបស់ប្រទេសលោកខាងលិចជាច្រើនមិនត្រឹមតែដាក់ប្រាក់ចូលទៅក្នុងវិស័យដូងប្រេងដោយផ្ទាល់ឬដោយប្រយោលនោះទេ ប៉ុន្តែក៏មានភាគហ៊ុននៅក្នុងក្រុមហ៊ុន FGV ផងដែរ។
អ្នកសារព័ត៌មានAP បានសម្ភាសបុគ្គលិកបច្ចុប្បន្ននិងអតីតបុគ្គលិកចំនួន១៣០នាក់មកពីប្រទេសចំនួន៨នៅក្នុងក្រុមហ៊ុនដូងប្រេងចំនួន២៤ រួមទាំងអាជ្ញាធរសហព័ន្ធអភិវឌ្ឍដីធ្លីរបស់ម៉ាឡេស៊ី Felda ដែលមានភាគហ៊ុនប្រមាណ១ភាគ៣នៅក្នុងក្រុមហ៊ុន FGV ផងដែរ។ អ្នកសារព័ត៌មានទាំងនោះបានរកឃើញរឿងរ៉ាវជាច្រើនរាប់ចាប់ពីការមិនបើកប្រាក់ឈ្នួល រហូតដល់អំពើទាសភាព និងការចោទប្រកាន់ពីការរំលោភសេពសន្ទវៈ ដែលជួនកាលពាក់ព័ន្ធនឹងអនិតិជនផងដែរ។ ពួកគេក៏បានរកឃើញដែរថា ជនរ៉ូហ៊ីងយ៉ាកាន់សាសនាឥស្លាមដែលមិនមានរដ្ឋនិងជាជនជាតិភាគតិចដែលរងការធ្វើទុក្ខបុកម្នេញខ្លាំងបំផុតមួយនៅក្នុងពិភពលោក ត្រូវបានគេជួញដូរទៅឱ្យចម្ការនានា និងបង្ខំឱ្យធ្វើការនៅទីនោះ។
បញ្ហាជាច្រើនដែលបង្ហាញយ៉ាងលម្អិតដោយនៃការិយាល័យពន្ធគយនិងការពារព្រំដែនរបស់អាមេរិកឆ្លុះបញ្ចាំងពីអ្វីដែលសារព័ត៌មាន AP បានរកឃើញ ដែលរួមមានការរឹតត្បិតការដើរហើរ ការដាក់នៅតែឯកឯង អំពើហិង្សាផ្លូវភេទនិងអំពើហិង្សាទៅលើរូបរាងកាយ ការសំឡុតបំភ័យ និងការគំរាមកំហែង ការដកហូតឯកសារសម្គាល់អត្តសញ្ញាណ ការដកទុកប្រាក់ឈ្នួល ការធ្វើការដោះបំណុល ស្ថានភាពធ្វើការនិងរស់នៅលក្ខណៈរំលោភបំពាន ម៉ោងធ្វើការហួសប្រមាណ និងការព្រួយបារម្ភអំពីការបង្ខំឲ្យកុមារធ្វើការដែលអាចនឹងកើតមានផងដែរ។
ក្រុមហ៊ុន FGV បាននិយាយថា ខ្លួនមិនជាប់ពាក់ព័ន្ធនៅក្នុងការជ្រើសរើសបុគ្គលិក ឬជួលជនភៀសខ្លួនណាមួយមកធ្វើការនោះទេ។ ក្រុមហ៊ុននេះបានឲ្យដឹងថា ខ្លួនមិនជួលកម្មករកិច្ចសន្យានោះទេ។ ក្រុមហ៊ុនបានបន្តថា កម្មករចំណាកស្រុកត្រូវបានជ្រើសរើសជាចម្បងមកពីប្រទេសឥណ្ឌា និងឥណ្ឌូណេស៊ីតាមវិធីស្របច្បាប់និងធានាថា កម្មករមិនត្រូវបានបង្ខំឱ្យបង់ប្រាក់អ្វីមួយនោះទេ។
គិតត្រឹមខែសីហា ក្រុមហ៊ុន FGV មានកម្មករឥណ្ឌូណេស៊ីចំនួន១១.២៨៦នាក់ និងកម្មករឥណ្ឌាចំនួន៤.៦៨៣នាក់។ បើបូកចំនួនកម្មករទាំង២ប្រភេទនេះបញ្ចូលគ្នា វាគឺជាចំនួនភាគច្រើននៅក្នុងចម្ការដូងប្រេងនេះ។
ក្រុមហ៊ុននេះនិយាយថា ខ្លួនកំពុងតែណែនាំការប្រើប្រាស់ប្រព័ន្ធទូទាត់ប្រាក់ឈ្នួលដោយមិនប្រើប្រាស់សាច់ប្រាក់អេឡិចត្រូនិកសម្រាប់កម្មកររបស់ខ្លួន។ ក្រុមហ៊ុននេះថា ខ្លួនមិនរក្សាទុកលិខិតឆ្លងដែនរបស់កម្មករនោះទេ ហើយមានទូសុវត្ថិភាពនៅក្នុងអគារស្នាក់នៅទាំង៦៨របស់ខ្លួនដើម្បីឱ្យកម្មករអាចរក្សាទុកលិខិតឆ្លងដែនរបស់ពួកគេបានដោយមានសុវត្ថិភាព។
ក្រុមហ៊ុនFGV បានលើកឡើងថា ខ្លួនបានវិនិយោគទឹកប្រាក់ចំនួន៨៤លានដុល្លារក្នុងរយៈពេល៣ឆ្នាំចុងក្រោយដើម្បីធ្វើឱ្យការស្នាក់នៅរបស់កម្មករមានភាពប្រសើរឡើង និងដើម្បីផ្តល់អត្ថប្រយោជន៍សុខភាពដល់កម្មករ។ ក្រុមហ៊ុននេះបន្តទៀតថា អ្នកផ្គត់ផ្គង់និងអ្នកលក់ទំនិញត្រូវគោរពតាមក្រមសីលធម៌របស់ក្រុមហ៊ុន។
ក្រុមហ៊ុនFGV បាននិយាយថា «ក្រុមហ៊ុនFGV មិនអត់ឱនឱ្យមានការរំលោភសិទ្ធិមនុស្សក្នុងទម្រង់ណាមួយ ឬបទល្មើសព្រហ្មទណ្ឌកើតមាននៅក្នុងប្រតិបត្តិការរបស់ខ្លួននោះទេ» និងបានបន្ថែមថា «ខ្លួននឹងចាត់វិធានការលើការចោទប្រកាន់លើអំពើហិង្សាផ្លូវភេទ ឬរាងកាយ ឬការសំឡុតបំភ័យ»។
ក្រុមហ៊ុនFGV បានលើកឡើងថា ខ្លួនបានបញ្ជូនភស្តុតាងនៃការគោរពតាមស្តង់ដារពលកម្មទៅកាន់ ការិយាល័យពន្ធគយនិងការពារព្រំដែនសហរដ្ឋអាមេរិកកាលពីឆ្នាំមុន ហើយនឹងបន្តសហការដើម្បី «បញ្ជាក់ពីភាពត្រឹមត្រូវរបស់ក្រុមហ៊ុន FGV និងប្តេជ្ញាបង្ហាញពីឆន្ទៈរបស់ខ្លួនក្នុងការគោរពសិទ្ធិមនុស្ស និងប្រកាន់ខ្ជាប់នូវបទដ្ឋានការងារ»៕