ប៉ូលិសនៅក្នុងរដ្ឋ Virginia សហរដ្ឋអាមេរិក បាននិយាយថា បុគ្គលិកផ្នែកសេវាសាធារណៈដែលមានកំហឹងម្នាក់បានសម្លាប់មនុស្ស ១២ នាក់នៅក្នុងអគារសាលាក្រុងមួយនៅទីក្រុង Virginia Beach មុនពេលជននោះត្រូវប៉ូលិសបាញ់សម្លាប់។
លោក James Cervera ស្នងការប៉ូលិសទីក្រុងនេះ បាននិយាយថា ជនល្មើសបាន«បាញ់ប្រហារមិនរើសមុខភ្លាមៗសំដៅលើជនរងគ្រោះទាំងអស់» បន្ទាប់ពីបុរសម្នាក់នោះបានចូលក្នុងអគារសាលាក្រុង នៅម៉ោង៤រសៀល ថ្ងៃសុក្រ។ លោក James បាននិយាយថា មនុស្ស៦នាក់ទៀតបានរងរបួសនៅក្នុងការបាញ់ប្រហារនេះ។
លោក James បាននិយាយថា ខ្មាន់កាំភ្លើងគឺជាបុគ្គលិកផ្នែកសេវាកម្មសាធារណៈរបស់ទីក្រុងនេះជាយូរមកហើយ ហើយមានកំហឹង ប៉ុន្តែលោកស្នងការមិនបាននិយាយលម្អិតអំពីមូលហេតុដែលនាំឱ្យមានការវាយប្រហារនោះទេ។
លោកស្នងការបាននិយាយថា លោកស្គាល់ឈ្មោះជនសង្ស័យ ប៉ុន្តែមិនទាន់និយាយបានទេ។ លោកបាននិយាយថា៖ «យើងនឹងនិយាយឈ្មោះរបស់បុរសម្នាក់នោះម្តង ហើយយើងនឹងហៅបុរសនោះថា ជាជនសង្ស័យ ពីព្រោះអាទិភាពរបស់យើងឥឡូវនេះគឺសេចក្តីថ្លៃថ្នូរនិងការគោរពចំពោះជនរងគ្រោះនិងគ្រួសាររបស់ពួកគេ»។
សាក្សីបាននិយាយថា ការបាញ់ប្រហារនេះបានកើតឡើងនៅអគារជាន់ទី២ នៃសាលាក្រុងនៅទីក្រុង Virginia Beach ដែលជាទីស្នាក់ការ និងការិយាល័យរដ្ឋ។ លោក James បាននិយាយថា មន្ត្រីប៉ូលិសម្នាក់ស្ថិតក្នុងចំណោមអ្នកដែលរងរបួស៕