អ្នកនាំពាក្យក្រសួងយុត្តិធម៌បានព្រមានដល់គណបក្សសង្គ្រោះជាតិកុំឱ្យធ្វើអត្ថាធិប្បាយឬចេញសេចក្តីថ្លែងការណ៍បញ្ចេញជំហរអ្វីទៀតពាក់ព័ន្ធនឹងការកោះហៅរបស់តុលាការរាជធានីភ្នំពេញឱ្យអ្នកតំណាងរាស្រ្តគណបក្សប្រឆាំងមកឆ្លើយបំភ្លឺនៅក្នុងសំណុំរឿងដែលកំពុងតែស្ថិតក្រោមការស៊ើបអង្កេតពាក់ព័ន្ធនឹងរឿងអាស្រូវផ្លូវភេទនិងបណ្តឹងបរិហារកេរ្តិ៍។
លោក គឹម សន្តិភាព អ្នកនាំពាក្យក្រសួងយុត្តិធម៌បានសរសេរនៅក្នុងទំព័រហ្វេសប៊ុករបស់លោកនៅថ្ងៃពុធថា៖
«សូមរំលឹកថា សូមមានការប្រយ័ត្នប្រយែងក្នុងការផ្សព្វផ្សាយ ធ្វើអត្ថាធិប្បាយ ឬសេចក្តីសេចក្តីថ្លែងការណ៍នានាទាក់ទងនឹងចំណាត់ការរបស់ស្ថាប័នតុលាការព្រោះ អាចប្រឈមមុខនឹងផ្លូវច្បាប់»។
ចំណាត់ការផ្លូវច្បាប់ដែលលោកនិយាយយោងដល់នោះគឺការដាក់ពន្ធនាគារពីមួយខែដល់ប្រាំមួយខែនិងពិន័យជាប្រាក់ពីមួយសែនទៅមួយលានរៀលដោយសាររារាំងកិច្ចការតុលាការ។
ការព្រមាននេះកើតមានឡើងបន្ទាប់ពីសេចក្តីថ្លែងការណ៍របស់គណបក្សសង្គ្រោះជាតិដែលចេញផ្សាយនៅថ្ងៃទី៤ខែឧសភាដោយចោទប្រកាន់តុលាការរាជធានីភ្នំពេញថា បានរំលោភលើអភ័យឯកសិទ្ធិអ្នកតំណាងរាស្រ្តដោយសារបានចេញដីកាកោះហៅអ្នកតំណាងរាស្រ្តរបស់ខ្លួនចំនួនបីនាក់ឱ្យឡើងតុលាការនៅសប្តាហ៍ក្រោយ។
យោងតាមដីកាកោះចំនួនបីផ្សេងគ្នា ពីតំណាងអយ្យការនៃសាលាដំបូងរាជធានីភ្នំពេញ ដែល VOA បានទទួលនាថ្ងៃអង្គារ ឲ្យដឹងថា លោកកឹម សុខាប្រធានស្តីទីនៃគណបក្សសង្គ្រោះជាតិ ត្រូវបាន ព្រះរាជអាជ្ញារង កែវ សុជាតិ កោះហៅ ឲ្យចូលខ្លួននាថ្ងៃទី១១ខាងមុខ។ ក្នុងដីកាដដែលបានឲ្យផងដែរថា លោក កឹម សុខា និងត្រូវចូលបំភ្លឺទាក់ទិននឹងរឿងបរិហារកេរ្តិ៍នាងធី សុវណ្ណថា អតីតអ្នកគាំទ្រគណបក្សនេះ តាមរយៈខ្សែអាត់សំឡេងដែលផ្សាយតាម គេហទំព័រព័ត៌មាន Freshnews។ ដោយឡែក នៅក្នុងដីកាកោះពីរផ្សេងទៀតដែលចេញដោយ លោកសៀងសុខឲ្យដឹងថា តំណាងរាស្ត្រគណបក្សសង្គ្រោះជាតិពីររូបផ្សេងទៀតគឺ លោកពិន រតនា តំណាងរាស្ត្រខេត្តកណ្តាល និងលោក តុប វ៉ាន់ចាន់ តំណាងរាស្ត្រ ខេត្តបាត់ដំបង ត្រូវបានកោះ ឲ្យចូលខ្លួននាថ្ងៃទី១៦ ខែឧសភាក្នុងនាម «ជាជនសង្ស័យ»ក្នុងសំណុំរឿងអំពើពេស្សាចារ។
គណបក្សសង្គ្រោះជាតិបានចេញសេចក្តីថ្លែងការណ៍ឆ្លើយតបថាសមាជិកសភារបស់ខ្លួននឹងមិនទៅតាមដីកាកោះរបស់អយ្យការអមសាលាដំបូងរាជធានីភ្នំពេញដែលរំលោភច្បាប់នោះឡើយ។
សេចក្តីថ្លែងការណ៍នោះបានបន្ថែមថា៖
«រាល់ការចេញដីកាកោះហៅតំណាងរាស្រ្តដែលមានអភ័យឯកសិទ្ធិសភា ពីសំណាក់អយ្យការអមសាលាដំបូងរាជធានីភ្នំពេញគឺជាការប្រើអំណាចដោយរំលោភបំពានយ៉ាងធ្ងន់ធ្ងរលើអភ័យឯកសិទ្ធិសភារបស់តំណាងរាស្ត្រដែលធានាការពារដោយមាត្រា៨០នៃរដ្ឋធម្មនុញ្ញនៃព្រះរាជាណាចក្រកម្ពុជា»។
អ្នកនាំពាក្យក្រសួងយុត្តិធម៌លោក គឹម សន្តិភាព បាន រិះគន់សេចក្តីថ្លែងការណ៍នេះ ថាធ្វើឡើងដោយ«ខ្វះមនសិការផ្លូវច្បាប់»។
លោកគឹម សន្តិភាពបានសរសេរថា៖«មិននឹកស្មានថា ក្នុងនាមក្រុមសមាជិកសភាគណបក្សមួយអាចធ្វើសេចក្តីថ្លែងការណ៍ដែលខ្វះមនសិការផ្លូវច្បាប់បែបនេះ»។
លោកទាញអំណះអំណាងថាការកោះហៅរបស់ស្ថាប័នអយ្យការលើបុគ្គលណាម្នាក់គឺពុំមែនជាការចោទប្រកាន់ ការចាប់ខ្លួន ការឃាត់ខ្លួនឬការឃុំខ្លួននោះទេ។
យោងតាមមាត្រា៨០នៃរដ្ឋធម្មនុញ្ញបានហាមឃាត់មិនឱ្យចាប់ខ្លួន ឃាត់ខ្លួន ឬឃុំខ្លួនអ្នកតំណាងរាស្រ្តដោយសារតែសំដែងយោបល់ ឬបញ្ចេញមតិក្នុងការបំពេញមុខងាររបស់ខ្លួនសោះឡើយ។
លោកកឹម សុខានិងគូកនក៏ ប្រឈមមុខនឹងបណ្តឹងរបស់នាង ខុម ចាន់តារ៉ាទី ទាមទារសំណង៣០ម៉ឺនដុល្លារដោយនាងចោទថាលោកកឹម សុខាបោកប្រាស់នាងក្នុងល្បែងស្នេហ៍លួចលាក់៕