ចៅក្រមរដ្ឋ Texas បានបញ្ជាឱ្យផ្អាកជាបណ្តោះអាស័ន្នលើគោលនយោបាយមួយដែលនឹងសម្រួលដល់ដំណើរការអនុញ្ញាតឱ្យប្តីប្រពន្ធរបស់ពលរដ្ឋសហរដ្ឋអាមេរិក ក្នុងការទទួលបានភាពស្របច្បាប់នៅក្នុងសហរដ្ឋអាមេរិក។ សេចក្តីសម្រេចនេះជាបរាជ័យមួយដល់គោលនយោបាយកំណែទម្រង់អន្តោប្រវេសន៍ដ៏ធំមួយរបស់ប្រធានាធិបតីសហរដ្ឋអាមេរិកលោក Joe Biden ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ចៅក្រម J. Campbell Barker បានអនុញ្ញាតឱ្យផ្អាកជាបណ្តោះអាស័ន្នចំនួន ១៤ថ្ងៃកាលពីថ្ងៃចន្ទនៅក្នុងរឿងក្តីដែលបានលើកឡើងដោយអគ្គរដ្ឋអាជ្ញាបក្សសាធារណរដ្ឋរបស់រដ្ឋចំនួន១៦ ដើម្បីជំទាស់ប្រឆាំងនឹងគោលនយោបាយនេះ។
កាលពីខែមិថុនា លោកប្រធានាធិបតី Biden បានប្រកាសគោលនយោបាយថ្មីមួយដែលបានសម្រួលដល់ការចូលសញ្ជាតិសម្រាប់ជនអន្តោប្រវេសន៍កន្លះលាននាក់ដែលបានរៀបការជាមួយពលរដ្ឋសហរដ្ឋអាមេរិក។
ក៏ប៉ុន្តែ រដ្ឋចំនួន១៦ដែលបានដាក់ពាក្យបណ្តឹងនេះនិយាយថាគោលនយោបាយរបស់លោក Biden បានធ្វើឱ្យពួកគេខាតបង់ប្រាក់រាប់លានដុល្លារនៅក្នុងសេវាសាធារណៈ រួមមានការថែទាំសុខភាព ការសិក្សាអប់រំនិងការពង្រឹងច្បាប់ដែលត្រូវបានប្រើប្រាស់ដោយពួកជនអន្តោប្រវេសន៍។
នៅក្នុងសេចក្តីថ្លែងការណ៍កាលពីថ្ងៃអង្គារ លោក Biden បានហៅការសម្រេចថ្មីនេះ ថា«ខុស» ហើយសន្យាថានឹង«បន្តប្រយុទ្ធដើម្បីជួយការពារព្រំដែនរបស់យើងនិងជួសជុលប្រព័ន្ធអន្តោប្រវេសន៍បែកបាក់របស់យើងនេះ»។
រដ្ឋបាលរបស់លោក Biden បានប្រឹងប្រែងដោះស្រាយបញ្ហាអន្តោប្រវេសន៍ ជាបញ្ហាបែកបាក់ដ៏ខ្លាំងមួយសម្រាប់ពលរដ្ឋអាមេរិកាំងមុនការបោះឆ្នោតប្រធានាធិបតីនៅខែវិច្ឆិកាខាងមុខនេះ។
គណបក្សប្រជាធិបតេយ្យកំពុងព្យាយាមចាត់វិធានការតឹងរ៉ឹង លើជនចំណាកស្រុកខុសច្បាប់ ស្របពេលជាមួយការដាក់ចេញកំណែទម្រង់ដល់ប្រព័ន្ធអន្តោប្រវេសន៍គ្មានប្រសិទ្ធភាពរបស់អាមេរិក។
យុទ្ធនាការបោះឆ្នោតរបស់លោក Trump ដើម្បីកាន់កាប់សេតវិមានបានផ្តោតលើការពណ៌នាសហរដ្ឋអាមេរិកថាស្ថិតនៅក្រោមការវាយប្រហារដោយអ្វីដែលលោកបានហៅថា«ការលុកលុយ»របស់ជនចំណាកស្រុក។
ច្បាប់ថ្មីនឹងសម្រួលដល់ដំណើរការរបស់អ្នកមានលក្ខណៈសម្បត្តិគ្រប់គ្រាន់សម្រាប់ការតាំងលំនៅអចិន្ត្រៃយ៍ដោយការលប់ចោលការតម្រូវឱ្យពួកគេចាកចេញពីអាមេរិកជាផ្នែកមួយនៃដំណើការដាក់ពាក្យសុំរស់នៅក្នុងប្រទេសអាមេរិក៕