ក្រសួងព័ត៌មានព្រមានបញ្ចប់អាជីពអ្នកសារព័ត៌មាន និងប្រតិបត្តិការរបស់អង្គភាពសារព័ត៌មានទាំងឡាយណាដែលបន្តស្នើសុំលុយ ឬទារលុយពីកាស៊ីណូ Top Diamond ដោយថា ទង្វើនេះធ្វើឱ្យប៉ះពាល់ដល់អ្នកប្រកបវិជ្ជាជីវៈសារព័ត៌មានដទៃទៀតនៅកម្ពុជា។ នេះបើតាមលិខិតមួយច្បាប់របស់ក្រសួងដែលត្រូវបានចេញផ្សាយកាលពីថ្ងៃពុធ។
ការព្រមានរបស់ក្រសួងព័ត៌មានធ្វើឡើងក្រោយកាស៊ីណូឈ្មោះ ថប ដាយអឹម៉ិន (Top Diamond Casion) ដែលមានទីតាំងនៅជិតព្រំដែនកម្ពុជាវៀតណាម ស្ថិតក្នុងឃុំភ្នំដិន ស្រុកគិរីវង់ ខេត្តតាកែវ បានចេញសេចក្តីជូនដំណឹងចុះ ថ្ងៃទី៥ ខែកញ្ញា ដោយចោទថា អ្នកសារព័ត៌មានមកពីអង្គភាពចំនួន ៧០០ ទៅ ៩០០ អង្គភាពបានសុំប្រាក់ឧបត្ថម្ភពីកាស៊ីណូខ្លួនជារៀងរាល់ខែ។
លិខិតរបស់ក្រសួងព័ត៌មានចុះថ្ងៃទី៤ ខែតុលា បានបរិហារអ្នកកាសែតដែលបន្តទារប្រាក់ពីកាស៊ីណូ Top Diamond ក្នុងន័យដើមថា៖ «ក្នុងករណីមិនព្រមបញ្ឈប់ជាបន្ទាន់នូវសកម្មភាពដែលទង្វើប្រាសចាកពីវិជ្ជាជីវៈ និងក្រមសីលធម៌ និងគោលការណ៍នៃក្រមសីលធម៌ ដែលមានចែងក្នុងច្បាប់ស្តីពីរបបសារព័ត៌មាន អ្នកសារព័ត៌មានទាំងនោះនឹងត្រូវបញ្ឈប់លែងឱ្យប្រកបមុខរបរជាអ្នកសារព័ត៌មានបន្តទៅទៀត»។
លិខិតដែលចុះហត្ថលេខាដោយរដ្ឋមន្ត្រីក្រសួងព័ត៌មានលោក នេត្រ ភ័ក្រ្តា បានបន្ថែមថា៖ «អ្នកសារព័ត៌មាន ដែលមានជាប់ពាក់ព័ន្ធទៅនឹងការប្រព្រឹត្តអំពើនេះ ត្រូវចូលខ្លួនមករាយការណ៍នៅអគ្គនាយកដ្ឋានព័ត៌មាន និងសោតទស្សន៍ ក្នុងរយៈពេល១ខែ យ៉ាងយូរដោយគិតចាប់ពីថ្ងៃចុះហត្ថលេខានេះតទៅ»។
ក្រៅពីព្រមានទៅកាន់អ្នកសារព័ត៌មានទាំងនោះ ក្រសួងព័ត៌មានក៏ជំរុញឱ្យម្ចាស់អង្គភាពសារព័ត៌មាន ដែលមានអ្នកសារព័ត៌មានរបស់ខ្លួនជាប់ពាក់ព័ន្ធ ត្រូវធានាទប់ស្កាត់ និងបញ្ឈប់ឱ្យខានតែបាននូវការប្រព្រឹត្តខុសឆ្គងទាំងនេះ ដោយដាក់ឈ្មោះអ្នកទាំងនោះបញ្ជូនមកក្រសួង។
ក្រសួងក៏បានស្នើឱ្យក្រុមហ៊ុនកាស៊ីណូខាងលើធ្វើរបាយការណ៍បំភ្លឺអំពីមូលហេតុ ឬករណីនៃការផ្តល់លុយកាក ឬការឧបត្ថមនីមួយៗ រួចបញ្ជូនមកក្រសួងព័ត៌មានក្នុងរយៈពេល២សប្តាហ៍យ៉ាងយូរចាប់ពីថ្ងៃចេញលិខិតរបស់ក្រសួងកាលពីថ្ងៃពុធកន្លងទៅ។
វីអូអេមិនទាន់អាចសុំការអត្ថាធិប្បាយពីលោក ងួន ឌីណា អភិបាលស្រុកគិរីវង់បាននៅឡើយទេ។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជាហៅកាត់ថា ខេមបូចា លោក ណុប វី ថ្លែងថា ការយកលុយនានារបស់អ្នកកាសែត ជាកំហុសក្នុងវិជ្ជាជីវៈសារព័ត៌មាន។ លោកជំរុញឱ្យក្រសួងនិងស្ថាប័នពាក់ព័ន្ធបង្កើនការហ្វឹកហ្វឺននិងពង្រឹងសមត្ថភាពដល់អ្នកសារព័ត៌មាន ខណៈថា ស្ថាប័នសារព័ត៌មានទាំងឡាយ ត្រូវជួយផ្សព្វផ្សាយឱ្យបានទូលំទូលាយពីវិជ្ជាជីៈនិងច្បាប់នានាពាក់ព័ន្ធក្រមសីលធម៌របស់អ្នកសារព័ត៌មាន។
លោកថ្លែងថា៖ «យើងគួរតែធ្វើឱ្យបានច្រើនដើម្បីធានាថា អ្នកសារព័ត៌មានទាំងអស់គាត់បានយល់អំពីច្បាប់ អំពីវិធានទាំងអស់ហ្នឹង ហើយយល់ដឹងអំពីរឿងក្រមសីលធម៌អ្នកសារព័ត៌មានហ្នឹង»។
ចាងហ្វាងគេហទំព័រកម្ពុជាថ្ងៃនេះ លោក ទូច យុទ្ធា សម្តែងការខកចិត្តចំពោះករណីដែលបានកើតឡើងនៅកាស៊ីណូ Top Diamond និងថា ទង្វើនេះបានប៉ះពាល់យ៉ាងខ្លាំងដល់អ្នកការសែតអាជីពមានវិជ្ជាជីវៈ។
លោកថ្លែងថា៖ «អ៊ីចឹងខ្ញុំយល់ថា បញ្ហាដែលកាស៊ីណូចេញសេចក្តីជូនដំណឹង ចេញអីមកហ្នឹង និយាយរួមជាភាពអាម៉ាស់របស់អ្នកកាសែត ហើយបានប៉ះពាល់ធ្ងន់ធ្ងរទៅដល់អ្នកកាសែតអាជីពដែលគេប្រកបរបរមានវិជ្ជាជីវៈត្រឹមត្រូវ»។
កាលពីថ្ងៃទី ១ ខែកញ្ញា ឆ្នាំ ២០២២ អតីតអ្នកនាំពាក្យក្រសួងព័ត៌មានលោក មាស សុភ័ណ្ឌ បានឱ្យដឹងថា ក្នុងឆ្នាំ ២០២២ អង្គភាពសារព័ត៌មានជាតិនិងបរទេស ដែលបានចុះបញ្ជីនៅក្រសួងព័ត៌មានមានចំនួន ២,១៥៤ អង្គភាព ដោយក្នុងនោះមាន គេហទំព័រនិង TV Online ចំនួន ៨៦១ អង្គភាព កាសែតចំនួន ៤៤៦ អង្គភាព ស្ថានីយវិទ្យុ FM ចំនួន ៨៣ ស្ថានីយនៅរាជធានីភ្នំពេញ និងតាមបណ្ដាខេត្តចំនួន ១៣៧ ស្ថានីយ ក្រៅពីនោះជា សមាគមសារព័ត៌មាន ទស្សនាវដ្ដី រោងពុម្ព និងភ្នាក់ងារផ្សព្វផ្សាយពាណិជ្ជកម្មជាដើម។
ខណៈចំនួនអង្គភាពសារព័ត៌មានច្រើនបែបនេះ នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា លោក ណុប វី ចង់ឃើញការបង្កើតជាផ្លូវការនូវក្រុមប្រឹក្សាព័ត៌មានជាតិកម្ពុជា ដើម្បីបើកផ្លូវឱ្យអ្នកពាក់ព័ន្ធក្នុងវិស័យសារព័ត៌មានអាចតាមដាន ឃ្លាំមើល និងដាក់ពិន័យលើអ្នកសារព័ត៌មានដែលធ្វើខុសវិជ្ជាជីវៈ និងក្រមសីលធម៌របស់អ្នកកាសែតអាជីព៕