កិច្ចព្រមព្រៀងអន្តរជាតិស្តីពីកម្មវិធីនុយក្លេអ៊ែរអ៊ីរ៉ង់កំពុងបោះជំហានទៅមុខនៅថ្ងៃច័ន្ទនេះដោយសារមានកិច្ចប្រជុំដំបូងរបស់គណៈកម្មការរួមទទួលបន្ទុកតាមដានមើលថាតើភាគីទាំងពីរអនុវត្តតាមកិច្ចព្រមព្រៀងបានកម្រិតណា។
សម័យប្រជុំនៅថ្ងៃច័ន្ទនេះបាននាំឲ្យមានការជួបជុំមន្ត្រីជាន់ខ្ពស់មកពីប្រទេសអ៊ីរ៉ង់ និងក្រុមប្រទេស ដែលរួមមានសហរដ្ឋអាមេរិក អង់គ្លេស ចិន បារាំង រុស្ស៊ី អាល្លឺម៉ង់ និងសហគមន៍អឺរ៉ុបនៅទីក្រុងវីយែន ដែលនៅទីនោះក្រុមប្រទេសទាំងនេះបានយល់ព្រមកាលពីខែកក្កដាថានឹងកំហិតកម្មវិធីនុយក្លេអ៊ែររបស់អ៊ីរ៉ង់ជាការប្តូរនឹងការដកចេញទណ្ឌកម្ម។
ការជួបប្រជុំនេះកើតមានឡើងបន្ទាប់ពីអ្វីដែលគេហៅថា«ទិវាអនុម័ត»កាលពីថ្ងៃអាទិត្យនៅពេលដែលភាគីទាំងពីរប្រកាន់យកជំហានផ្លូវការដើម្បី អនុវត្តតាមកិច្ចព្រមព្រៀងនោះ។
គណៈកម្មការនេះមានគម្រោងជួបប្រជុំចំនួនបួនដងក្នុងមួយឆ្នាំដើម្បីពិភាក្សាពីបញ្ហាផ្សេងៗដូចជា គំរូសម្រាប់បំលែងម៉ាស៊ីនស្រាវជ្រាវទឹកធុនធ្ងន់នៅតំបន់ Arak គម្រោងនៅឯការដ្ឋាន Fordow និងបញ្ហាដែលកើតមានឡើងពីការអនុវត្តការលើកលែងទណ្ឌកម្មនេះ។ វាក៏ជាការជួបជុំលើកទីមួយសម្រាប់ភាគីទាំងពីររាយការណ៍ពីការរំលោភបំពាននានា ដែលអាចកើតមានឡើងក្នុងពេលអនុវត្តកិច្ចព្រមព្រៀងនេះ និងព្យាយាមដោះស្រាយបញ្ហាទាំងនោះ។
លោកប្រធានាធិបតីសហរដ្ឋអាមេរិកបារ៉ាក់ អូបាម៉ាបានមានប្រសាសន៍កាលពីថ្ងៃអាទិត្យថាលោកបានចេញបញ្ជាឲ្យរដ្ឋាភិបាលរបស់លោកចាប់ផ្តើមរៀបចំលើកទណ្ឌកម្មប្រឆាំងនឹងប្រទេសអ៊ីរ៉ង់ហើយ។ រីឯសហគមន៍អឺរ៉ុបក៏បានអនុម័តច្បាប់មួយកាលពីថ្ងៃអាទិត្យដើម្បីអនុញ្ញាតឲ្យសមាជិករបស់ខ្លួនចាប់ផ្តើមពិនិត្យមើលលទ្ធភាពក្នុងការលើកទណ្ឌកម្មនេះផងដែរ៕