ប្រទេសជប៉ុនបានប្រកាសកញ្ចប់ថវិកាសម្រាប់វិស័យការពារប្រទេសដ៏ធំបំផុតដែលមិនធ្លាប់មានពីមុនមក នៅពេលដែលខ្លួនខិតខំធ្វើការឆ្លើយតបនឹងឥទ្ធិពលនៃយោធាចិនដែលកំពុងកើនឡើងនៅក្នុងតំបន់ ជាពិសេសនៅក្នុងសមុទ្រចិនខាងកើត។
នៅថ្ងៃពុធនេះ គណៈរដ្ឋមន្រ្តីរបស់លោកនាយករដ្ឋមន្រ្តី Shinzo Abe បានអនុម័តថវិកា៤២ពាន់លានដុល្លារ ជាការបង្កើនថវិកាក្នុងរយៈពេល៣ឆ្នាំជាប់ៗគ្នា ដោយមានប្រាក់បម្រុងសម្រាប់យន្តហោះស៊ើបការណ៍សម្ងាត់ យន្តហោះគ្មានមនុស្សបើក (Drone) យន្តហោះចំបាំងធុន F-35 និងរថក្រោះសម្រាប់វាយប្រហារ។
ថវិកានេះត្រូវតែទទួលបានការយល់ព្រមពីសមាជិកសភារបស់ជប៉ុន ក៏ប៉ុន្តែលោក Abe បានទទួលការគាំទ្រដ៏ច្រើននៅក្នុងសភាទាំង២។ លោក Abe ចូលចិត្តការចំណាយវិស័យការពារប្រទេសច្រើនសម្រាប់ជប៉ុន។
រដ្ឋាភិបាលទីក្រុងតូក្យូមានជម្លោះទឹកដីជាមួយរដ្ឋាភិបាលទីក្រុងប៉េកាំងលើប្រជុំកោះគ្មានមនុស្សរស់នៅ ដែលហៅជាភាសាចិនថា Diaoyus និងភាសាជប៉ុនថា Senkakus។
ការចំណាយលើវិស័យការពារប្រទេសរបស់ជប៉ុន នៅតិចជាងប្រទេសចិនយ៉ាងច្រើន ដែលការចំណាយខាងយោធាកាលពីឆ្នាំទៅមាន១៣២ពាន់លានដុល្លារឈរនៅលំដាប់ទី២បន្ទាប់ពីសហរដ្ឋអាមេរិកតែប៉ុណ្ណោះ៕