មន្ត្រីពេទ្យប៉ាឡេស្ទីនថាការវាយប្រហាររបស់អ៊ីស្រាអែលក្នុងតំបន់ហ្កាហ្សា បានសម្លាប់មនុស្សយ៉ាងតិច ៣១នាក់ក្នុងពេល ២៤ម៉ោងកន្លងទៅ ខណៈក្រុមអង្គការផ្តល់ជំនួយអន្តរជាតិ ៨ បាននិយាយនៅ ថ្ងៃអង្គារថា អ៊ីស្រាអែលមិនបានធ្វើតាមការទាមទាររបស់សហរដ្ឋអាមេរិកដែលឲ្យអ៊ីស្រាអែលអនុញ្ញាតឲ្យជំនួយមនុស្សធម៌អាចចូលទៅដល់តំបន់ហ្កាហ្សាដែលខ្ទេចខ្ទីដោយសារសង្គ្រាម។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មានAP។ ស្ថានភាពនៅតំបន់ហ្កាហ្សាបច្ចុប្បន្ន យ៉ាប់ជាងពេលណាទាំងអស់ក្នុងរយៈពេល ១៣ខែនៃសង្គ្រាមនេះ។
នៅលីបង់ ការវាយប្រហាររបស់អ៊ីស្រាអែល បានដៅលើតំបន់ជាយក្រុងបេរូតភាគខាងត្បូង និងការវាយប្រហារមួយទៀតលើអគារលំនៅឋាននៅភាគខាងកើតរដ្ឋធានីបេរូត បានសម្លាប់មនុស្ស ៦នាក់។ នេះបើយោងតាមបុគ្គលិកពេទ្យនៅកន្លែងកើតហេតុ។
រដ្ឋបាលលោក Biden កាលពីខែមុន បានអំពាវនាវឲ្យអ៊ីស្រាអែល «បង្កើន»ស្បៀងអាហារនិងជំនួយសង្គ្រោះបន្ទាន់ច្រើនថែមទៀតចូលក្នុងតំបន់ហ្កាហ្សា ដោយដាក់ឱសានវាទ ៣០ថ្ងៃ ដែលបានផុតកំណត់កាលពីថ្ងៃអង្គារ។
រដ្ឋបាលលោក Biden បានព្រមានថា ការខកខានមិនធ្វើតាម អាចញ៉ាំងឲ្យមានការអនុវត្តច្បាប់សហរដ្ឋអាមេរិក ដែលតម្រូវឲ្យអាមេរិកកាត់បន្ថយជំនួយយោធា ពេលអ៊ីស្រាអែលធ្វើសង្គ្រាមជាមួយក្រុមហាម៉ាស់នៅហ្កាហ្សា និងក្រុមហេសបូឡានៅលីបង់។
អ៊ីស្រាអែលបានប្រកាសវិធានការមួយចំនួន ដើម្បីកែលម្អស្ថានការណ៍នេះ។ តែក្នុងពេលប៉ុន្មានថ្ងៃថ្មីៗនេះ មន្ត្រីអាមេរិកបានផ្ដល់សញ្ញាថា អ៊ីស្រាអែលនៅតែមិនទាន់បានធ្វើគ្រប់គ្រាន់នៅឡើយ ទោះបីជាអាមេរិកមិនបាននិយាយថាតើខ្លួននឹងចាត់វិធានការបែបណាលើអ៊ីស្រាអែលក៏ដោយ៕