អ៊ីស្រាអែលបានវាយប្រហារនៅថ្ងៃចន្ទនេះលើទីក្រុង Rafah នៅភាគខាងត្បូងតំបន់ហ្កាហ្សា (Gaza) ដោយបានសម្លាប់មនុស្សយ៉ាងតិច ៦៧ នាក់។ នេះបើយោងតាមការបញ្ជាក់របស់មន្ត្រីសុខាភិបាលមូលដ្ឋាននៅក្នុងទីក្រុងនោះ។
កន្លងមក ជនស៊ីវិលចំនួនប្រហែល ១,៤ លាននាក់បានភៀសខ្លួនចេញពីទូទាំងតំបន់ហ្កាហ្សាទៅទីក្រុងនោះដើម្បីគេចពីសង្គ្រាមរវាងអ៊ីស្រាអែលនិងក្រុមហាម៉ាស់ (Hamas)។
ពលរដ្ឋក្នុងតំបន់នោះបានរៀបរាប់ថាមានការបាញ់ផ្លោងធ្ងន់ធ្ងរ ដោយការវាយប្រហាររបស់អ៊ីស្រាអែលបានត្រូវចំផ្ទះនិងវិហារអ៊ិស្លាមមួយចំនួន។
យោធាអ៊ីស្រាអែលបានបញ្ជាក់ថា ខ្លួនបានវាយប្រហារចំ «គោលដៅភេរវកម្ម» នៅក្នុងផ្នែកមួយនៃទីក្រុង Rafah និងថាការវាយប្រហារនេះគឺធ្វើឡើងស្របពេលជាមួយនឹងបេសកកម្មមួយដែលបានជួយសង្គ្រោះចំណាប់ខ្មាំងអ៊ីស្រាអែលពីរនាក់ដែលត្រូវបានក្រុមសកម្មប្រយុទ្ធហាម៉ាស់ចាប់ឃុំនៅក្នុងតំបន់ហ្កាហ្សា។
នាយករដ្ឋមន្ត្រីអ៊ីស្រាអែលលោក Benjamin Netanyahu បានសរសើរប្រតិបត្តិការនេះដោយបាននិយាយថា អ៊ីស្រាអែល «នឹងមិនធ្វើឱ្យបាត់បង់ឱកាសណាមួយទេ» ក្នុងការនាំយកចំណាប់ខ្មាំងដែលជាប់ឃុំនៅតំបន់ហ្កាហ្សាត្រឡប់មកប្រទេសអ៊ីស្រាអែលវិញ។
សង្គ្រាមរយៈពេលជាង ៤ ខែមកនេះនិងបទបញ្ជារបស់អ៊ីស្រាអែលម្ដងហើយម្ដងទៀតឱ្យមានការជម្លៀសចេញបានរុញច្រានជនស៊ីវិលប៉ាឡេស្ទីនឱ្យធ្វើដំណើរកាន់តែឆ្ងាយទៅៗឆ្ពោះទៅទិសខាងត្បូង ដោយមនុស្សជាច្រើនរស់នៅក្នុងជំរំតង់និងជម្រកបណ្ដោះអាសន្នរបស់អង្គការសហប្រជាជាតិដ៏ណែនណាន់តាន់តាប់នៅក្នុងតំបន់ទីក្រុង Rafah។
ប្រធានាធិបតីសហរដ្ឋអាមេរិកលោក Joe Biden បាននិយាយទៅកាន់លោក Netanyahu តាមទូរស័ព្ទកាលពីថ្ងៃអាទិត្យនិងបានប្រាប់លោកថា អ៊ីស្រាអែលមិនគួរធ្វើប្រតិបត្តិការយោធានៅក្នុងទីក្រុង Rafah ដោយគ្មាន «ផែនការដែលអាចជឿនិងប្រតិបត្តិបានដើម្បីធានាសុវត្ថិភាពនិងការគាំទ្រដល់មនុស្សជាងមួយលាននាក់ដែលស្នាក់នៅក្នុងតំបន់នោះ» នោះឡើយ។ នេះបើយោងតាមសេចក្ដីថ្លែងការណ៍របស់សេតវិមាន៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និង Reuters។