ស.រ.អា.បានរាយការណ៍អំពីការជឿនលឿនថែមទៀតនៅក្នុងកិច្ចខិតខំប្រឹងប្រែងរបស់ខ្លួនដើម្បីកម្ចាត់សាខាពួកភេរវជនរដ្ឋឥស្លាមនៅក្នុងប្រទេសអាហ្វហ្គានីស្ថានដោយបញ្ជាក់អំពីការស្លាប់នៃអ្នកនាំពាក្យរបស់ពួកនេះនៅក្នុងការវាយប្រហារតាមអាកាសមួយដោយស.រ.អា.។
មន្ត្រីយោធាស.រ.អា.ម្នាក់បាននិយាយកាលពីថ្ងៃព្រហស្បតិ៍ថា ឈ្មោះ Sultan Aziz Azam ត្រូវបានសម្លាប់កាលពីថ្ងៃអាទិត្យទី២៣ ខែធ្នូ នៅក្នុងខេត្ត Nangarhar នៃប្រទេសអាហ្វហ្គានីស្ថាន។ សមាជិកម្នាក់ទៀតនៃពួករដ្ឋឥស្លាមក៏បានបាត់បង់ជីវិតដែរក្នុងការវាយប្រហារតាមអាកាសនោះ។
គេរាយការណ៍ថា គ្មានជនស៊ីវិលស្លាប់ទេនៅក្នុងការវាយប្រហារនោះដែលពួកមន្ត្រីអាហ្វហ្គានីស្ថាន បានប្រាប់ឱ្យដឹងជាសាធារណៈមុនគេ។
អ្នកនាំពាក្យម្នាក់នៃក្រសួងមហាផ្ទៃអាហ្វហ្គានីស្ថានបាននិយាយប្រាប់វីអូអេថាឈ្មោះ Azam ត្រូវបានសម្លាប់ជាមួយអង្គរក្សបីនាក់របស់គាត់។
អ្នកនាំពាក្យរូបនេះបានថ្លែងថា Azam ជាអ្នកទទួលខុសត្រូវក្នុងការជ្រើសរើសពួកយុទ្ធជនដើម្បីធ្វើការវាយប្រហារប្រឆាំងនឹងពួកជនស៊ីវិល។
ដំណឹងអំពីការវាយប្រហារនេះមានឡើងនៅក្រោយការចេញផ្សាយរបាយការណ៍ប្រចាំត្រីមាសមួយដោយក្រសួងការពារប្រទេសស.រ.អា.ជូនដល់ពួកសមាជិកសភាស.រ.អា.ដែលបានអបអរសាទរដល់ការជឿនលឿនធ្វើឡើងដោយកងកម្លាំងស.រ.អា. និងកងកម្លាំងរដ្ឋាភិបាលអាហ្វហ្គានីស្ថានប្រឆាំងនឹងពួកភេរវជននេះដែលគេស្គាល់ដែរថាជាពួករដ្ឋឥស្លាម Khorasan នៃក្រុម ISIS-K។
បើតាមរបាយការណ៍នេះបណ្ជាក់ថា «ពួក ISIS-K ប្រឈមនឹងការបាត់បង់ដែនដី, ពួកអ្នកដឹកនាំ និងពួកបុគ្គលិកនៅក្នុងខេត្ត Nangarhar»។ សេចក្តីរាយការណ៍នេះរាយការណ៍ក្នុងរយៈពេលពីខែមិថុនាដល់ដំណាច់ខែវិច្ឆិកា។
ក៏ប៉ុន្តែរបាយការណ៍របស់ក្រសួងការពារប្រទេសស.រ.អា.នេះក៏បានព្រមានដែរថា ទោះណាជាមានការជឿនលឿននៅក្នុងខេត្ត Nangarhar ក៏ដោយក៏ពួករដ្ឋឥស្លាម Khorasan នៅតែរកវិធីបន្តការប្រយុទ្ធតទៅទៀត៕