ពួកជំនាញខាងអាវុធគីមីអន្តរជាតិនឹងធ្វើដំណើរទៅកាន់ទីក្រុង Douma ប្រទេសស៊ីរី ដើម្បីធ្វើការស៊ើបអង្កេតពាក់ព័ន្ធនឹងការវាយប្រហារប្រើឧស្ម័នពុលដែលត្រូវបានគេសង្ស័យនិងបានសម្លាប់មនុស្សរាប់សិបនាក់នៅជិតរដ្ឋធានីដាម៉ាស។
អង្គការហាមឃាត់ការប្រើប្រាស់អាវុធគីមីរបស់អង្គការសហប្រជាជាតិហៅកាត់ថា OPCW បាននិយាយថាក្រុមការងាររបស់ខ្លួននឹងធ្វើដំណើរទៅកាន់ក្រុង Douma បន្ទាប់ពីមានសំណើឲ្យធ្វើការស៊ើបអង្កេត។
អង្គការនេះបានឲ្យដឹងទៀតថា ការិយាល័យរបស់ខ្លួនបានទទួលសំណើពីរដ្ឋាភិបាលស៊ីរី និងរុស្ស៊ីឲ្យធ្វើការស៊ើបអង្កេតលើការចោទប្រកាន់ការប្រើប្រាស់អាវុធគីមីនៅក្នុងទីក្រុង Douma ហើយថាខ្លួនកំពុងរៀបចំដាក់ពង្រាយក្រុមការងារនៅក្នុងប្រទេសស៊ីរីក្នុងពេលឆាប់ៗនេះ។
ថ្លែងតាមរយៈអ្នកនាំពាក្យលោក Alessandra Vellucci នៅអំឡុងសន្និសីទសារព័ត៌មាននៅក្នុងទីក្រុងហ្សឺណែវ អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសការវាយប្រហារប្រើឧស័្មនពុលថាជា «ទង្វើព្រៃផ្សៃ» ហើយថាប្រសិនបើរកឃើញថាជាឧស័្មនពុលមែននោះ «វាច្បាស់ណាស់ថាទង្វើនេះជាការរំលោភច្បាប់អន្តរជាតិ» ក្រសួងការបរទេសស៊ីរីថារដ្ឋាភិបាលនឹងជួយក្រុមជំនាញអង្គការសហប្រជាជាតិក្នុងការស៊ើបអង្កេតលើការចោទប្រកាន់ប្រើអាវុធគីមីនៅក្នុងទីក្រុង Douma នេះ។
សេតវិមានកាលពីថ្ងៃអង្គារបានប្រកាសថា លោក Donald Trump នឹងលុបចោលការធ្វើដំណើរជាលើកទីមួយរបស់លោកទៅកាន់តំបន់អាមេរិកឡាទីន ដោយសារលោកចង់ត្រួតពិនិត្យមើលចំណាត់ការរបស់អាមេរិកចំពោះប្រទេសស៊ីរី៕