បញ្ហាប្រែប្រួលអាកាសធាតុ ពាណិជ្ជកម្ម និងកិច្ចសហប្រតិបត្តិការដែនសមុទ្រ នៅក្នុងសមុទ្រចិនខាងត្បូងស្ថិត នៅលើគេក្នុងរបៀបវារៈនៅពេលលោកប្រធានាធិបតីឥណ្ឌូនេស៊ី Joko Widodo ជួបជាមួយលោកប្រធានាធិបតីស.រ.អា. Barack Obma នៅឯសេតវិមានកាលពីថ្ងៃចន្ទ។
លោក Widodo ជាមេដឹកនាំប្រទេសឥណ្ឌូនេស៊ីទីមួយ ដែលបានអញ្ជើញមកបំពេញទស្សនកិច្ចក្នុងស.រ.អា.ក្នុងពេលមួយទសវត្សរ៍នេះ។
លោកបានចូលមកកាន់តំណែងកាលពីមួយឆ្នាំមុននេះ ជាអ្នកនៅខាងក្រៅក្រុមវរជននយោបាយរបស់ប្រទេស ដោយលោកបានសន្យាថានឹងធ្វើការផ្លាស់ប្តូរនៅក្នុងប្រទេសនេះ ដែលមានអ្នកកាន់សាសនាឥស្លាមច្រើនជាងគេបំផុតនៅក្នុងពិភពលោក។ ក៏ប៉ុន្តែដូចជាលោក Obama ដែរ នៅពេលលោកចូលមកកាន់អំណាចកាលពី៦ឆ្នាំមុននេះ លោកបានជួបប្រទះនឹងការពិបាកជាច្រើនខាងសេដ្ឋកិច្ច។
លោកប្រធានាធិបតីឥណ្ឌូនេស៊ីរូបនេះកំពុងស្វះស្វែងទាក់ទាញវិនិយោគអាមេរិកាំងថែមទៀតនៅក្នុងប្រទេសលោក ដែលនៅទីនោះមានតែ១៧ភាគរយនៃប្រជាពលរដ្ឋសរុប២៥០លានទេ ដែលមានការទាក់ទងនឹងប្រព័ន្ធអ៊ីនធឺណិត ហើយជាចំនួនតិចជាងប្រទេសជាច្រើននៅក្នុងពិភពលោក។
នៅក្នុងឱកាសទស្សនកិច្ចប្រាំថ្ងៃរបស់លោកក្នុងស.រ.អា. លោកនឹងជួបជាមួយក្រុមមេដឹកនាំជំនួញ ក្រុមអ្នកចាត់ចែងប្រាក់មូលនិធិ និងក្រុមអ្នកចាត់ចែងកិច្ចប្រតិបត្តិខាងបច្ចេកវិទ្យា និងខាងរ៉ែនៅក្នុងទីក្រុង San Francisco និងរដ្ឋធានី Washington។
សេតវិមានបាននិយាយថា លោកអូបាម៉ាដែលបានរស់នៅក្នុងប្រទេសឥណ្ឌូនេស៊ីជិតប្រាំឆ្នាំក៏ពិភាក្សាជាមួយលោក Widodo ដែរ អំពីបញ្ហាការពារប្រទេសនិងបញ្ហាសមុទ្រ៕