ប្រធានាធិបតីឥណ្ឌូនេស៊ីលោក Joko Widodo ដែលគេស្គាល់ថាឈ្មោះ Jokowi នោះ បានបង្កើនសកម្មភាពនៃយុទ្ធនាការបង្ក្រាបគ្រឿងញៀននៅក្នុងប្រទេសឥណ្ឌូនេស៊ី ដែលនេះជាវិធានការមួយដែលទំនងជាដូចទៅនឹងសង្គ្រាមប្រឆាំងគ្រឿងញៀនដ៏ល្បីល្បាញរបស់ប្រធានាធិបតីហ្វីលីពីនលោក Rodrigo Duterte។
កាលពីពេលថ្មីៗនេះ លោក Jokowi បានបញ្ជាឲ្យប៉ូលិសបាញ់អ្នកជួញដូរគ្រឿងញៀនជាជនបរទេស ដែលប្រឆាំងនឹងការចាប់ខ្លួន ដោយលោកបានអះអាងថា ប្រទេសឥណ្ឌូនេស៊ីកំពុងស្ថិតក្នុងស្ថានភាពប្រកាសអាសន្នរឿងគ្រឿងញៀន។ កាលពីថ្ងៃអង្គារម្សិលមិញ ប្រធានប៉ូលិសក្រុងហ្សាការតា លោកឧត្ដមសេនីយ៍ Idham Azis បាននិយាយថា លោកនឹងមិនពិចារណាច្រើននោះទេក្នុងការដកតំណែងមន្ត្រីប៉ូលិសណាដែលរុញរាក្នុងការប្រយុទ្ធប្រឆាំងនឹងការជួញដូរគ្រឿងញៀន។
ការថ្លែងរបស់លោក Jokowi កាលពីសប្ដាហ៍មុននេះ បានធ្វើឡើងភ្លាមៗបន្ទាប់ពីមានការបាញ់ប្រហាររបស់ប៉ូលិសពាក់ព័ន្ធនឹងរឿងថ្នាំញៀនទៅលើបុរសតៃវ៉ាន់ម្នាក់ ដែលជម្នះនឹងការចាប់ខ្លួន ពេលដែលបុរសនោះព្យាយាមរត់ពន្ធថ្នាំញៀនមេតាហ្វេតាមីនគ្រីស្តាល់ចំនួន ១ តោន ចូលទៅក្នុងប្រទេសឥណ្ឌូនេស៊ី។
លោក Phelim Kline មន្ត្រីមួយរូបនៃអង្គការសិទ្ធិមនុស្ស Human Rights Watch បានរិះគន់វិធានការនេះ ដោយបានសរសេរនៅលើសេចក្ដីប្រកាសមួយថា៖ «លោកប្រធានាធិបតី Joko Widodo គួរតែបញ្ជូនសារជាសាធារណៈឲ្យបានច្បាស់មួយទៅឲ្យប៉ូលិសថា កិច្ចប្រឹងប្រែងក្នុងការដោះស្រាយបញ្ហាគ្រឿងញៀន និងឧក្រិដ្ឋកម្មដ៏ស្មុគស្មាញទាំងនេះ ទាមទារឲ្យមន្ត្រីប៉ូលិសគោរពសិទ្ធិជាមូលដ្ឋានរបស់មនុស្ស មិនមែនជាន់ឈ្លីសិទ្ធិទាំងនោះ នោះទេ»៕