លោក Duterte ដែលមានវ័យ៧២ឆ្នាំ និងជាអតីតអភិបាលក្រុងដែលរិះគន់ឥតសំចៃមាត់រូបនេះ បានសន្យាថា នឹងសម្លាប់ជនល្មើស១០០.០០០នាក់ និងលុបបំបាត់គ្រឿងញៀននៅត្រឹមខែក្រោយ។ ទោះជាយ៉ាងណា ខុទ្ទកាល័យរបស់លោក Duterte បានប្រកាសកាលពីចុងខែមករាថា ការប្រើប្រាស់កម្លាំងប៉ូលិសក្នុងយុទ្ធនាការបង្ក្រាបគ្រឿងញៀនត្រូវបានផ្អាកសិន។
ផែនការទាំងនោះបានផ្លាស់ប្តូរបន្ទាប់ពីមានការចាប់ជំរិត និងសម្លាប់អ្នកជំនួញកូរ៉េខាងត្បូងម្នាក់កាលពីខែតុលានៅទីស្នាក់ការ Camp Crame របស់នគរបាលជាតិហ្វីលីពីននៅក្នុងក្រុងម៉ានីល។ ឧប្បត្តិហេតុនេះបានធ្វើឲ្យលោក Duterte មានការខឹងសម្បា និងសង្ស័យពីអ្វីដែលលោកហៅថា «អាកប្បកិរិយាមិនល្អ» នៅក្នុងជួរប៉ូលិស និងការតាំងចិត្តខ្ពស់ក្នុងការលុបបំបាត់រឿងនេះ។
ឧត្តមសេនីយ៍ Ronald dela Rosa នាយអគ្គស្នងការប៉ូលិសជាតិ បានប្រកាសកាលពីចុងខែមករាថា លោកនឹងរំសាយអង្គភាពបង្រ្កាបគ្រឿងញៀន ហើយតាមដានរឿងអំពើពុករលួយវិញ។ បណ្តាញសារព័ត៌មាន Foreign Policy បានដកស្រង់ពាក្យសម្តីដើមរបស់លោកថា «យើងនឹងធ្វើឲ្យមានភាពស្អាតស្អំនៅតាមគ្រប់មន្ត្រីជាន់ថ្នាក់ទាំងអស់»។
ការផ្អាកយុទ្ធនាការបង្រ្កាបគ្រឿងញៀន របស់លោក Duterte ដែលពេលកន្លងមកត្រូវបានគេប៉ាន់ស្មានថា បានសម្លាប់មនុស្សប្រមាណជា៧.០០០នាក់បង្ហាញពីការបន្ធូរដៃរបស់លោកជាលើកដំបូងទៅលើគោលនយោបាយដែលត្រូវបានប្រទេសលោកខាងលិច ក្រុមសិទ្ធិមនុស្ស និងព្រះវិហារកាតូលិកធ្វើការរិះគន់ថ្មីៗនេះផងដែរ។
លោក Phelim Kine នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស Human Rights Watch ដែលមានមូលដ្ឋាននៅក្នុងក្រុងញូវយ៉កនិយាយថា «ការស្តោកស្តាយបំផុតនោះគឺថា អ្វីដែលបានកើតនៅក្នុងប្រទេសហ្វីលីពីនគឺជាការសម្លាប់មនុស្សជាង៧.០០០នៅក្នុងយុទ្ធនាការមួយដែលលោកប្រធានាធិបតី Rodrigo Duterte ហៅថា ជាសង្គ្រាមប្រឆាំងគ្រឿងញៀន ហើយការណ៍នេះមិនបានធ្វើឲ្យមានការផ្លាស់ប្តូរគោលនយោបាយអ្វីនោះទេ»។
លោកបន្ថែមទៀតថា «ប៉ុន្តែវាបណ្តាឲ្យមានឃាតកម្មចាប់ជំរិតអ្នកជំនួញកូរ៉េខាងត្បូងម្នាក់នៅក្នុងប្រទេសហ្វីលីពីន ទើបរដ្ឋាភិបាលសម្រេចចិត្តផ្អាកការបង្រ្កាបគ្រឿងញៀននេះ»។
មតិសាធារណជនអំពីយុទ្ធនាការនេះក៏កំពុងកើនឡើងជាបន្តបន្ទាប់ ទោះណាពួកគេធ្លាប់ជឿជាក់យ៉ាងខ្លាំងលើកិច្ចខិតខំប្រឹងប្រែងប្រឆាំងគ្រឿងញៀនកាលពីដំបូងទីក៏ដោយ។
ព្រះវិហារកាតូលិកចំនួន៨៦នៅក្នុងប្រទេសហ្វីលីពីនបានថ្កោលទោសលើការណ៍ដែលត្រូវបានគេសង្ស័យថាជាការសម្លាប់រង្គាលក្រៅប្រព័ន្ធតុលាការ និងបានអំពាវនាវឲ្យមានកំណែទម្រង់ពង្រឹងប្រព័ន្ធច្បាប់ឡើងវិញ។ សេចក្តីថ្លែងការណ៍រួមមួយដែលបានចេញផ្សាយកាលពីដើមខែកុម្ភៈ និងត្រូវបានអាននៅក្នុងការជួបជុំនៅទូទាំងប្រទេស បានហៅកិច្ចខិតខំប្រឹងប្រែងក្នុងការលុបបំបាត់គ្រឿងញៀនថា «រជ្ជកាលនៃភាពភ័យខ្លាចរបស់ប្រជាជនក្រីក្រ»។
ពលរដ្ឋហ្វីលីពីនប្រមាណជា៨៣%ជាអ្នកកាន់សាសនាគ្រិស្ត និកាយកាតូលិក ដែលការណ៍នេះធ្វើឲ្យព្រះវិហារមានឥទ្ធិពលខ្លាំងនៅក្នុងសង្គម។ លោក Antonio Ledesma ដែលជាមហាសង្ឃនាយកនៅក្នុងក្រុង Cagayan de Oro បានថ្លែងថា «យើងសង្ឃឹមថា ដោយសារវាជាសេចក្តីថ្លែងការណ៍ វាគួរតែមានឥទ្ធិពលទៅលើអ្នកដែលគោរពសាសនាគ្រិស្តនិកាយកាតូលិក»។
លោក Jay Batongbacal ដែលជាសាស្រ្តាចារ្យជំនួយផ្នែកច្បាប់នៅសាកលវិទ្យាល័យហ្វីលីពីន (University of the Philippines) និយាយថា ការសម្លាប់ជនជាតិកូរ៉េនេះគ្រាន់តែជា «ភាពទន់ខ្សោយ» របស់ប៉ូលិសម្នាក់ប៉ុណ្ណោះ។ លោកនិយាយថា «មនុស្សម្នាយល់ស្របថា បញ្ហាគ្រឿងញៀនជាបញ្ហាធ្ងន់ធ្ងរ និងត្រូវតែដោះស្រាយ ប៉ុន្តែពួកគេមិនយល់ស្របចំពោះវិធីសម្លាប់មនុស្សរាប់ពាន់នាក់ដើម្បីដោះស្រាយបញ្ហានេះនោះទេ»។
ការស្ទង់មតិមួយធ្វើឡើងដោយអង្គការ Social Weather ដែលមានមូលដ្ឋាននៅក្នុងក្រុងម៉ានីលកាលពីខែធ្នូបានរកឃើញថា ៧៨%នៃពលរដ្ឋហ្វីលីពីនខ្លាចថា ពួកគេ ឬអ្នកណាម្នាក់ដែលគេស្គាល់អាចក្លាយជាជនរងគ្រោះនៃការសម្លាប់រង្គាលក្រៅប្រព័ន្ធតុលាការបែបនេះ។
ក្រុមអ្នកឃ្លាំមើលស្ថានការណ៍នៅក្នុងប្រទេសនេះនិយាយថា លោកប្រធានាធិបតីមានភាពម៉ឺងម៉ាត់ទាក់ទងនឹងការដកតំណែងមន្រ្តីដែលប្រើប្រាស់អំណាចហួសកម្រិត និងកាត់បន្ថយអំពើពុករលួយនៅក្នុងជួរប៉ូលិស។
លោក Ramon Casiple ដែលជានាយកប្រតិបត្តិនៃអង្គការតស៊ូមតិមួយឈ្មោះថា វិទ្យាស្ថានសម្រាប់កំណែទម្រង់នយោបាយ និងការបោះឆ្នោត ឬជាភាសាអង់គ្លេសថា Institute for Political and Electoral Reform បាននិយាយថា ការងារប្រឆាំងអំពើពុករលួយស្ថិតក្នុងពាក្យសន្យារបស់លោកប្រធានាធិបតី Duterte នៅមុនការបោះឆ្នោតប្រធានាធិបតីកាលពីខែឧសភា ឆ្នាំ២០១៦ និងក្នុងសុន្ទរកថាចូលកាន់តំណែងរបស់លោកកាលពីខែមិថុនា។
លោក Rhona Canoy ដែលជានាយកសាលាអន្តរជាតិមួយ និងជាសមាជិកគ្រួសារអ្នកនយោបាយនៅលើកោះ Mindanao ភាគខាងត្បូងនៃប្រទេសនិយាយថា «នៅក្នុងជួរប៉ូលិស ជាកន្លែងដែលពួកគេ[ប៉ូលិស]កំពុងស្វែងរក។ ពួកគេកំពុងសម្អាតផ្ទះខ្លួនឯង»។
លោក Canoy បន្ថែមថា «ពួកគេ[ប៉ូលិស]ក៏កំពុងតែតាមប្រម៉ាញ់មនុស្សដែលរត់ពន្ធគ្រឿងញៀនដោយចំហ។ ប៉ុន្តែទាក់ទងនឹងរឿងពួកគេធ្លាប់ធ្វើពីមុននៅតាមសហគមន៍វាចុះអន់ថយបន្តិចហើយ»។
សារព័ត៌មានក្នុងស្រុកនិយាយថា ស្ថាប័នបង្ក្រាបគ្រឿងញៀនពិសេសរបស់ហ្វីលីពីននៅតែតាមប្រម៉ាញ់ឧក្រិដ្ឋកម្មគ្រឿងញៀន។ យុទ្ធនាការទូលាយមួយត្រូវបានគេរំពឹងថា នឹងបន្តនៅពេលដែលលោកប្រធានាធិបតី Duterte ជឿជាក់ថា ប៉ូលិសមានវិន័យល្អជាងមុន ឬលោកឲ្យស្ថាប័នផ្សេងទទួលខុសត្រូវជំនួសវិញ។
ពលរដ្ឋហ្វីលីពីនជាច្រើននិយាយថា ការជួញដូរគ្រឿងញៀនមានតាមគ្រប់ផ្លូវនានានៅតាមភូមិ និងបង្កឲ្យមានបទល្មើសនានាលើពលរដ្ឋសាមញ្ញ។ អ្នកខ្លះខ្លាចមិនហ៊ានចេញក្រៅនៅពេលយប់។ បើយោងតាមរបាយការណ៍គ្រឿងញៀនពិភពលោករបស់អង្គការសហប្រជាជាតិ ប្រទេសហ្វីលីពីនមានអត្រាប្រើប្រាស់ម៉ាទឹកកកដែលគេហៅថា «shabu» ច្រើនជាងគេនៅខាងអាស៊ីខាងកើត។
លោក Ernesto Abella អ្នកនាំពាក្យនៃខុទ្ទកាល័យប្រធានាធិបតីបានប្រាប់សារព័ត៌មានហ្វីលីពីនកាលពីចុងខែមុនថា លោកប្រធានាធិបតីអាចនឹងបង្កើតកងកម្លាំងប៉ូលិសពិសេស ដែលអាចរួមមានទាំងយោធាផងដែរ ក្នុងការដោះស្រាយឧក្រិដ្ឋកម្មគ្រឿងញៀន។
លោក Casiple និយាយថា «យុទ្ធនាការនេះនៅតែបន្ត។ ខ្ញុំមិនគិតថា វានឹងត្រូវបញ្ចប់នោះទេ។ យុទ្ធនាការបង្រ្កាបគ្រឿងញៀនទទួលបានការគាំទ្រខ្លាំងពីសាធារណជន»៕
ប្រែសម្រួលដោយ ប៊ុន ប៉េងហ៊ុយ
