រដ្ឋាភិបាលប្រទេសឥណ្ឌូនេស៊ីនិយាយថា ខ្លួនកំពុងតែធ្វើសេចក្តីព្រាងច្បាប់ថ្មីដើម្បីការពារប្រជាជននៃគ្រប់ជំនឿទាំងអស់នៅក្នុងប្រទេសរបស់ខ្លួន ដែលមានប្រជាជនជាអ្នកកាន់សាសនាអ៊ីស្លាមច្រើនជាងគេបំផុតនៅលើពិភពលោក។
រដ្ឋមន្ត្រីទទួលបន្ទុកកិច្ចការសាសនា លោក Lukman Hakim Syaifuddin បានមានប្រសាសន៍កាលពីដើមខែវិច្ឆិកាថា សេចក្តីព្រាងច្បាប់នេះធ្វើឡើងដើម្បីឆ្លើយតបទៅនឹងជម្លោះសាសនាជាច្រើន ដែលអាចធ្វើឲ្យរំខានដល់ប្រទេសនេះយ៉ាងធ្ងន់ធ្ងរ។
សេចក្តីព្រាងច្បាប់ដែលគេកំពុងរៀបរៀងនេះ នឹងកំណត់អំពីល័ក្ខខ័ណ្ឌនានារាប់ចាប់ពីការស្ថាបនាកន្លែងគោរពសាសនារហូតដល់ការចែកចាយព័ត៌មានឬផ្សព្វផ្សាយអំពីសាសនាណាមួយ។ លោកបានបញ្ជាក់ថា ពង្រាងច្បាប់នេះបានចែងអំពីការការពារប្រជាពលរដ្ឋទាំងអស់ ទាំងជនជាតិភាគតិចនិងភាគច្រើន។
លោក Lukman Hakim Syaifuddin ថ្លែងថា៖ «ខ្លឹមសារចម្បងរបស់ច្បាប់នេះគឺ ការពារការគោរពជំនឿទាំងអស់ដើម្បីឲ្យប្រជាពលរដ្ឋមានសិទ្ធិសេរីភាពក្នុងការកាន់និងប្រតិបត្តិសាសនានានាដែលពួកគេចង់កាន់ ដែលសិទ្ធិទាំងនេះមានចែងនៅក្នុងរដ្ឋធម្មនុញ្ញ»។
រដ្ឋាភិបាលគ្រោងនឹងដាក់ចេញពង្រាងច្បាប់នេះនៅដើមឆ្នាំ២០១៥ ខាងមុខ។ រដ្ឋមន្ត្រីកិច្ចការសាសនារូបនេះនិយាយថា ច្បាប់នេះនឹងជំនួសច្បាប់ឆ្នាំ១៩៦៥ ដែលគេចាត់ទុកថាហួសសម័យ។
លោក Bonar Tigor Naipospos នាយករងនៃវិទ្យាស្ថាន Setara Institute ដែលជាក្រុមការពារសិទ្ធិមនុស្សក្នុងស្រុកមួយ និយាយថា លោកសង្ឃឹមថាច្បាប់នេះនឹងរួមបញ្ចូលសេចក្តីលម្អិតអំពីសកម្មភាពនានាដែលរដ្ឋាភិបាលត្រូវធ្វើដើម្បីការពារអ្នកគោរពជំនឿទាំងអស់។
លោកថ្លែងថា៖ «ប្រសិនបើគ្មានការបញ្ជាក់ឲ្យបានច្បាស់ថា រដ្ឋមានវិធានអ្វីខ្លះសម្រាប់ការពារនោះទេ ការរើសអើងនិងការរំលោភបំពានសេរីភាពផ្នែកសាសនានឹងនៅតែកើតមានចំពោះប្រជាពលរដ្ឋ។ ដូច្នេះ គេត្រូវគិតគូរអំពីកម្រិតដែលរដ្ឋាភិបាលអាចការពារបាន»។
យោងតាមវិទ្យាស្ថាន Setara Institute នៅឆ្នាំ២០១៣មានករណីរំលោភបំពានសេរីភាពខាងសាសនាកើតឡើងចំនួន ២២២ករណី ដែលនេះជាចំនួនមួយច្រើនបំផុតមិនធ្លាប់មាន។
ព័ត៌មានអំពីសេចក្តីព្រាងច្បាប់កើតមានឡើងបន្ទាប់ពីមានការប្រកាសនៅសប្តាហ៍មុនថា ប្រជាពលរដ្ឋដែលមានជំនឿផ្សេងៗក្រៅពីសាសនាផ្លូវកាទាំង៦ដែលមាននៅក្នុងប្រអប់អត្តសញ្ញាណប័ណ្ណ ពុំចាំបាច់ជ្រើសរើសយកសាសនាណាមួយក្នុងចំណោមសាសនាទាំង៦នោះទេ។
រដ្ឋមន្ត្រីក្រសួងមហាផ្ទៃ លោក Tjahyo Kumolo និយាយថា ការផ្លាស់ប្តូរនេះចាំបាច់ត្រូវតែកើតឡើង ព្រោះថាប្រជាជនឥណ្ឌូនេស៊ីជាច្រើនគេចមិនទៅធ្វើអត្តសញ្ញាណប័ណ្ណដោយសាមានការបង្ខិតបង្ខំឲ្យជ្រើសរើសយកសាសនាមួយក្នុងចំណោមសាសនាផ្លូវការទាំង៦នោះ។
សាសនាផ្លូវការទាំង៦នៅក្នុងប្រទេសឥណ្ឌូនេស៊ីរួមមាន សាសនាអ៊ីស្លាម សាសនាគ្រីស្តនិកាយប្រូតេស្តង់ សាសនាគ្រីស្តនិកាយកាតូលិក សាសនាព្រះពុទ្ធ សាសនាហិណ្ឌូ និងលទ្ធិខុងជឺ៕
ប្រែសម្រួលដោយ ផន បុប្ផា