នៅក្នុងសវនាការជំនុំជម្រះរបស់តុលាការកំពូល នាព្រឹកថ្ងៃពុធនេះ លោក ថាច់ សេដ្ឋា អនុប្រធានគណបក្សភ្លើងទៀន បានថ្លែងសារចុងក្រោយដោយទទូចឱ្យតុលាការទម្លាក់បទចោទប្រកាន់លើរូបលោក ពាក់ព័ន្ធនឹងការប្តឹងផ្តល់របស់គណបក្សប្រជាជនកម្ពុជា។
ក្នុងសម្លៀកបំពាក់ពណ៌ទឹកក្រូច លោក ថាច់ សេដ្ឋា ដែលត្រូវបាននាំខ្លួនមកចូលរួមសវនាការជំនុំជម្រះរបស់តុលាការកំពូល ថ្លែងថា ការលើកឡើងរបស់លោកពាក់ព័ន្ធនឹងប្រវត្តិរបស់គណបក្សប្រជាជនកម្ពុជាគឺផ្អែកតាមឯកសារប្រវត្តិសាស្ត្រ ដែលលោកថា គណបក្សកំពុងកាន់អំណាចមួយនេះមានដើមកំណើតពី«យួន»។ លោកបន្តថា រដ្ឋាភិបាលគួរដំឡើងស្តូបកិច្ចព្រមព្រៀងទីក្រុងប៉ារីស ជាជាងធ្វើស្តូបមិត្តភាពកម្ពុជា-វៀតណាម អរគុណវៀតណាម។
លោកប្រាប់អង្គសវនាការថា កម្ពុជាបានជួយវៀតណាមច្រើន ប៉ុន្តែវៀតណាមមិនបានធ្វើស្តូប ដើម្បីអរគុណខ្មែរឡើយ។
លោកបញ្ជាក់ថា អ្វីដែលលោកថ្លែងកន្លងមកមិនមានចេតនាញុះញង់ឡើយ ហើយវាជាការបញ្ចេញមតិរបស់លោក។
លោក ថាច់ សេដ្ឋា បញ្ជាក់ប្រាប់ចៅក្រមថា៖ «នៅក្នុងប្រទេសប្រជាធិបតេយ្យ គេមិនចោទនូវអ្វីដែលជាការបញ្ចេញមតិទេ ដោយសារតែវាត្រូវបានការពារដោយច្បាប់រដ្ឋធម្មនុញ្ញ។ មិនមានបាតុភាពណាកើតឡើងដោយសារតែសម្តីខ្ញុំឡើយ។ វាគ្រាន់តែជាការសន្និដ្ឋាន។ សូមតុលាការកំពូលផ្តល់យុត្តិធម៌ដល់ខ្ញុំ»។
អ្នកនយោបាយជំទាស់ លោក ថាច់ សេដ្ឋា ដែលជាប្រធានសហគមន៍ខ្មែរកម្ពុជាក្រោម ត្រូវបានសាលាដំបូងរាជធានីភ្នំពេញផ្តន្ទាទោសពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង» ដោយដាក់ពន្ធនាគារ ៣ ឆ្នាំ ពាក់ព័ន្ធនឹងការថ្លែងរបស់លោកនៅប្រទេសកូរ៉េខាងត្បូងអំពីប្រវត្តិនៃការកកើតគណបក្សប្រជាជនកម្ពុជា និងថ្ងៃ៧មករា។
នៅក្នុងសវនាការ តំណាងអយ្យការ លោក ង៉ែត សារ៉ាត់ បានដាក់បន្ទុកថា ការទទួលស្គាល់របស់ លោក ថាច់ សេដ្ឋាថា លោកបានលើកឡើងដូចការចោទប្រកាន់នោះគឺជា«ការសារភាព»។
ប៉ុន្តែសហមេធាវីដែលការពារក្តីឱ្យលោក ថាច់ សេដ្ឋា គឺលោក ជូង ជូងី លើកឡើងថា កូនក្តីទទួលស្គាល់ការថ្លែងសារនៅប្រទេសកូរ៉េខាងត្បូង មិនមែនមានន័យថា កូនក្តីសារភាពកំហុសឡើយ។
បើតាមលោក ជូង ជូងី ការថ្លែងរបស់លោក ថាច់ សេដ្ឋា គឺចង់ឱ្យមានការផ្សះផ្សាជាតិ មិនមានចេតនាញុះញង់ ឬធ្វើឱ្យរើសអើងជាតិសាសន៍អ្វីឡើយ។
ក្រោយបញ្ចប់សវនាការ លោកប្រាប់អ្នកសារព័ត៌មានថា៖ «មេធាវីយល់ឃើញថា គាត់មិនមានចេតនាញុះញង់ឱ្យមានភាពវឹកវរឬក៏មិនមានចេតនាញុះញង់ឱ្យមានការរើសអើង ដូចការចោទប្រកាន់ទេ។ អ៊ីចឹងមេធាវីទាំង៤រូបបានស្នើឱ្យតុលាការកំពូលលើកលែងការចោទប្រកាន់ចំពោះលោក ថាច់ សេដ្ឋា»។
តំណាងអយ្យការលោក ង៉ែត សារ៉ាត់ បានដាក់បន្ទុកលោក ថាច់ សេដ្ឋា ដោយអះអាងថា ការលើកឡើងរបស់អ្នកនយោបាយរូបនោះធ្វើឱ្យប៉ះពាល់ធ្ងន់ធ្ងរដល់សន្តិសុខសង្គម ហើយវាមានចេតនាញុះញង់ឱ្យមានការប្រឆាំងរដ្ឋាភិបាល។
លោកបញ្ជាក់ក្នុងសវនាការថា៖ «គណបក្សមិនត្រូវហែកហួរ បន្ទោសនិងវាយប្រហារគណបក្សដទៃទេ។ គណបក្សនីមួយៗគួរតែផ្សព្វផ្សាយនូវអ្វីដែលជាគោលនយោបាយរបស់ខ្លួនដល់ប្រជាពលរដ្ឋ។ ការសាងសង់ស្តូបជាការសម្រេចរបស់រដ្ឋាភិបាល មិនខូចប្រយោជន៍ជាតិឡើយ»។
ចំណែកសហមេធាវីម្នាក់ទៀតរបស់លោក ថាច់ សេដ្ឋា គឺលោក សឺន ជុំជួន ថ្លែងការពារកូនក្តីរបស់លោកនៅក្នុងសវនាការ ដោយទាមទារឱ្យទម្លាក់បទចោទប្រកាន់។ លោកបន្ថែមថា ការកាត់ក្តីរបស់តុលាការនៅប្រទេសកម្ពុជាមិនបានពិចារណទៅលើច្បាប់អន្តរជាតិនោះទេ គឺយោងតែទៅតាមច្បាប់ជាតិប៉ុណ្ណោះ។
បើតាមសហមេធាវីរូបនេះ ប្រជាពលរដ្ឋទូទៅតែងតែរិះគន់លើការសាងសង់ស្តូបមិត្តភាពកម្ពុជាវៀតណាម។ ចំណែកការបកស្រាយប្រវត្តិគណបក្សប្រជាជនកម្ពុជាគឺផ្អែកតាមឯកសារប្រវត្តិសាស្ត្រ។
ចៅក្រមជំនុំជម្រះ លោក យូរ ឧត្តរ៉ា ថ្លែងថា សាលដីកាពាក់ព័ន្ធនឹងបទញុះញង់នេះនឹងត្រូវប្រកាសនាថ្ងៃទី ៩ ខែសីហា ឆ្នាំ ២០២៤។
គួរបញ្ជាក់ថា ក្រៅពីសំណុំរឿងបទញុះញង់នេះ លោក ថាច់ សេដ្ឋា ដែលត្រូវបានចាប់ខ្លួនកាលពីដើមឆ្នាំ ២០២៣ ក៏ត្រូវបានតុលាការកាត់ទោសពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន។ លោកត្រូវកាត់ទោសដាក់ពន្ធនាគារ១ឆ្នាំកន្លះ និងត្រូវបង់លុយជំពាក់ចំនួន ៣ម៉ឺន ៣ពាន់ ៤០០ដុល្លារអាមេរិក ត្រូវបង់ប្រាក់ពិន័យចូលរដ្ឋចំនួន ៣លានរៀលនិង ៥លានរៀលត្រូវបង់សងជំងឺចិត្តដល់ក្រុមហ៊ុនបញ្ចាំមួយដែលជាដើមបណ្តឹង៕