លោកនាយករដ្ឋមន្រ្តី ហ៊ុន សែន កាលពីថ្ងៃអាទិត្យ បានលើកឡើងថារដ្ឋាភិបាលមិនទាន់ជ្រើសរើសជម្រើសនៃការប្រកាសដាក់ប្រទេសក្នុងគ្រាអាសន្ននៅឡើយទេ តាមច្បាប់គ្រប់គ្រងប្រទេសក្នុងគ្រាអាសន្ន ដែលត្រូវបានអនុម័តកាលពីចុងខែមេសា បើទោះករណីឆ្លងជំងឺកូវីដក្នុងសហគមន៍ បន្តកើនឡើងក៏ដោយ។
កាលពីចុងខែវិច្ឆិកា លោក ហ៊ុន សែន បានប្រកាសទុករយៈពេល១៥ថ្ងៃ ក្នុងការទប់ស្កាត់ការរាតត្បាតជំងឺកូវីដ១៩ ក្នុងសហគមន៍លើកដំបូង ដែលរហូតមកដល់ពេលនេះនៅសល់ប្រមាណ១០ថ្ងៃទៀត។
ក្រសួងសុខាភិបាលកម្ពុជាបានប្រកាសការឆ្លងជំងឺនេះចូលសហគមន៍លើកដំបូងក្នុងប្រទេស កាលពីចុងខែវិច្ឆិកា ដែលគិតមកត្រឹមថ្ងៃច័ន្ទនេះ មានអ្នកឆ្លងសរុបក្នុងព្រឹត្តិការណ៍ឆ្លងសហគមន៍នេះ កើនដល់៣២នាក់ដោយរួមទាំងអ្នកឆ្លង២នាក់ចុងក្រោយគេបង្អស់នៅថ្ងៃនេះផងដែរ។
នៅលើទំព័រហ្វេសប៊ុក លោកនាយករដ្ឋមន្រ្តី ហ៊ុន សែន បានបង្ហោះសារថាលោកបានត្រៀមបម្រុងទុកនូវលិខិតនានា សម្រាប់ស្នើថ្វាយព្រះមហាក្សត្រ ដើម្បីប្រកាសដាក់ប្រទេសក្នុងគ្រាមានអាសន្ន។ ប៉ុន្តែលោកថាលោកមិនចង់ទៅដល់ចំណុចនេះទេ ដោយសារវាអាចប៉ះពាល់ធំធេងដល់សេដ្ឋកិច្ចនិងជីវភាពរបស់ប្រជាជន។
បន្ថែមពីលើសារនៅលើទំព័រហ្វេសប៊ុក លោក ហ៊ុន សែន ក៏មានសារជាសំឡេង ដែលត្រូវបានផ្សព្វផ្សាយទៅកាន់សាធារណជន និងបណ្តាញសារព័ត៌មានផងដែរ។
លោក ហ៊ុន សែន បានថ្លែងថា៖ «ក៏ប៉ុន្តែខ្ញុំមិនចង់ដើរទៅដល់ជំហានបែបនេះនោះទេ ព្រោះវាធ្វើឲ្យសេដ្ឋកិច្ចកម្ពុជានឹងគាំងទាំងស្រុងតែម្តង ប្រសិនបើបិទប្រទេស ឬក៏បិទផ្នែកណាមួយរបស់ប្រទេស»។
លោក ហ៊ុន សែន ក៏បានបញ្ជាឲ្យអាជ្ញាធរគ្រប់លំដាប់ថ្នាក់ចុះពិនិត្យទីតាំងអាជីវកម្មទាំងអស់ឲ្យអនុវត្តឲ្យបានត្រឹមត្រូវ តាមវិធានការណែនាំសុវត្ថិភាពរបស់ក្រសួងសុខាភិបាល។ លោកបញ្ជាក់ថារដ្ឋាភិបាលពុំមានជម្រើសអ្វីក្រៅពីការធានាឲ្យមានការរក្សាគម្លាតពីគ្នា និងការពាក់ម៉ាសឲ្យជាប់លាប់ទេ។
លោកបន្ថែមថា៖«ប្រសិនបើទីកន្លែងនោះមិនព្រមអនុវត្តទេ សូមប្រើអំណាចរបស់រដ្ឋបាលខេត្តរាជធានី ដើម្បីបិទហាងនោះ ជាបណ្តោះអាសន្នសិន»។
ហាង Pedro លក់កាបូប និងសម្ភារៈផ្សេងទៀត នៅលើផ្លូវព្រះសីហនុ នៅថ្ងៃ ទី៧ ខែធ្នូ ឆ្នាំ២០២០ ដែលត្រូវបានឲ្យបិទបណ្តោះអាសន្ន ក្រោយមានអ្នកឆ្លងជំងឺកូវីដ១៩នៅទីនោះ។ (ស៊ុន ណារិន/វីអូអេ)
លោក ង៉ែត ជូ អ្នកវិភាគសេដ្ឋកិច្ចមួយរូប មានប្រសាសន៍ថាបណ្តាប្រទេសដែលមានឆ្លងជំងឺកូវីដ១៩ ធ្ងន់ធ្ងរ មិនប្រកាសដាក់ប្រទេសក្នុងភាពអាសន្ននោះទេ ដោយគ្រាន់តែផ្អាកការធ្វើដំណើរនៅក្នុងតំបន់ណាមួយជាបណ្តោះអាសន្ន ដើម្បីធានាថារដ្ឋាភិបាលអាចគ្រប់គ្រងស្ថានការណ៍បាន។
លោកយល់ថាមកដល់ពេលនេះ គួរតែមានការហាមឃាត់ការធ្វើដំណើរនៅតំបន់ណាមួយ ដោយលោកមើលឃើញថា«សញ្ញាកាន់តែអាក្រក់ទៅ»។ លោកឧទាហរណ៍ ដូចជានៅតំបន់ច្បារអំពៅរាជធានីភ្នំពេញ ដែលត្រូវបានរកឃើញមានករណីឆ្លងជាបន្តបន្ទាប់។
លោកថ្លែងប្រាប់VOAថា៖ «យើងផ្អាកមួយរយៈ វាមិនមានអីអាក្រក់ពេកទេ។ រឿងសេដ្ឋកិច្ច វាជារឿងបន្ថែមលើសុខភាព បន្ថែមទៅលើអ្វីដែលមនុស្សអាចរស់នៅបាន។ ហើយបើសិនជាយើងគិតតែរឿងសេដ្ឋកិច្ច ហើយយើងមានបញ្ហា យើងឆ្លង»។
លោកបន្ថែមថាសមត្ថភាពរបស់កម្ពុជានៅក្នុងការផ្តល់សេវាសុខភាពសាធារណៈនៅមានកម្រិត ដែលលោកថានឹងមានការលំបាក ប្រសិនបើមានការឆ្លងច្រើន។
លោក អ៊ូ វីរៈ ប្រធានវេទិកាអនាគតដែលជាស្ថាប័នស្រាវជ្រាវគោលនយោបាយ មានប្រសាសន៍ថាការសម្រេចរបស់រដ្ឋាភិបាលមិនប្រកាសដាក់ប្រទេសក្នុងភាពអាសន្ននៅពេលនេះ គឺជាការសម្រេចចិត្តត្រឹមត្រូវមួយ ដោយសារស្ថានភាពមើលទៅមិនធ្ងន់ធ្ងរដូចប្រទេសដទៃ បើទោះជាប្រជាជនមានការភ័យខ្លាចក៏ដោយ។
លោកមានប្រសាសន៍ថា៖ «ការដែលលោកនាយករដ្ឋមន្រ្តីសម្រេចមិនទាន់ដាក់ប្រទេសក្នុងភាពអាសន្ន ខ្ញុំថាជារឿងមួយត្រឹមត្រូវ។ មួយទៀត យើងត្រូវព្រួយបារម្ភ [ប៉ុន្តែត្រូវមាន]ការថ្លឹងថ្លែងជាមួយនឹងសេដ្ឋកិច្ច ជាពិសេសជាមួយនឹងអ្នកក្រ ឬមួយអ្នកដែលព្រួយបារម្ភអំពីចំណូលប្រចាំថ្ងៃ គឺខ្ញុំមើលឃើញច្រើនមែនទែន។ អ្នកលក់តាមផ្លូវ គឺគាត់អត់អាចបាត់បង់ចំណូលបានទេ»។
លោក អ៊ូ វីរៈ បន្ថែមថាតាមការចុះស្រាវជ្រាវរបស់ក្រុមការងារ និងដៃគូស្រាវជ្រាវរបស់ស្ថាប័នលោក ប្រជាពលរដ្ឋកម្ពុជារហូតដល់២០ភាគរយ ប្រឈមនឹងភាពអត់ឃ្លានក្នុងពេលជួបវិបត្តិជំងឺកូវីដ១៩នេះ។
លោកបន្តថាការបន្តតាមស្វែងរកមនុស្សដែលពាក់ព័ន្ធ និងបើកការធ្វើតេស្តរកវីរុសកូរ៉ូណាក្នុងចំណោមប្រជាជនឲ្យបានច្រើន ជារឿងចាំបាច់នៅពេលនេះ។
លោក អ៊ូ វីវៈ បន្ថែមថាបើទោះដាក់ប្រទេសក្នុងគ្រាអាសន្ន ស្ថានភាពក្នុងប្រទេសមិនផ្លាស់ប្តូរអ្វីគួរឲ្យកត់សម្គាល់នោះទេ ដោយសារលោកថារដ្ឋាភិបាលកម្ពុជា មាន«អំណាចលើសលប់»រួចទៅហើយ បើទោះជាមិនទាន់ដាក់ប្រទេសក្នុងគ្រាអាសន្ន។
លោកថ្លែងថា៖ «ប៉ុន្តែនៅក្នុងប្រទេសកម្ពុជា អំណាចរបស់រដ្ឋាភិបាលយើង នីតិប្រតិបត្តិយើង គឺគាត់មានលើសលប់តាំងពីដើមមក។ អញ្ចឹងទោះបីដាក់ ក៏គាត់នៅមានអំណាច មិនដាក់ ក៏គាត់នៅមានអំណាច»។
បើតាមលោក អ៊ូ វីរៈ រាជធានីភ្នំពេញមានភាពស្ងប់ស្ងាត់នៅពេលនេះ ដែលលោកថាជារឿងល្អមួយដែលប្រជាពលរដ្ឋមានការប្រុងប្រយ័ត្ន។
កាលពីថ្ងៃទី៩ ខែមេសា ឆ្នាំ២០២០ លោក ហ៊ុន សែន ធ្លាប់បានចេញបទបញ្ជាមួយដែលកំហិតការធ្វើដំណើរមួយចំនួន ដើម្បីទប់ទប់ស្កាត់ការរាតត្បាតនៃជំងឺកូវីដ១៩។ បទបញ្ជានេះត្រូវបានមើលឃើញថាមានគោលដៅទប់ស្កាត់ការធ្វើដំណើររបស់កម្មករកាត់ដេរទៅស្រុកកំណើត ដើម្បីចូលរួមអបអរចូលឆ្នាំខ្មែរ។
បទបញ្ជាកំហិតការធ្វើដំណើរកាលនោះ ធ្វើឡើងក្នុងពេលរដ្ឋាភិបាលកំពុងរៀបចំសេចក្តីព្រាងច្បាប់មួយស្តីពីការគ្រប់គ្រងប្រទេសក្នុងគ្រាមានអាសន្ន ដែលនឹងផ្តល់អំណាចដល់រដ្ឋាភិបាលក្នុងការដាក់ប្រទេសក្នុងគ្រាមានអាសន្ន ពេលមានជំងឺរាតត្បាត និងភាពវឹកវរធ្ងន់ធ្ងរដល់សន្តិសុខជាតិ និងសណ្តាប់ធ្នាប់សាធារណៈ។ ច្បាប់នេះត្រូវបានប្រកាសឲ្យប្រើប្រាស់កាលពីចុងខែមេសា។
ក្រុមអ្នករិះគន់មួយចំនួនយល់ថាច្បាប់ដាក់ប្រទេសក្នុងគ្រាមានអាសន្ននេះ អាចនាំទៅរកការរាំងខ្ទប់បន្ថែមទៀតនូវការប្រើប្រាស់សិទ្ធិស៊ីវិល និងសេរីភាពផ្សេងទៀត រួមមានសេរីភាពដើរហើរ ការបញ្ចេញមតិ ការជួបប្រជុំ ឬការប្រមូលផ្តុំដោយសន្តិវិធីជាដើម៕