លោកនាយករដ្ឋមន្រ្តី ហ៊ុន សែន បានផ្ញើសារអបអរសាទរលោក Joe Biden ដែលត្រូវបានប្រកាសថា ឈ្នះការបោះឆ្នោតជាប្រធានាធិបតីអាមេរិកទី៤៦ ដោយលោកប្តេជ្ញាធ្វើការជាមួយរដ្ឋបាលថ្មីរបស់សហរដ្ឋអាមេរិក។ នេះបើយោងតាមសារព័ត៌មានក្នុងស្រុកដែលបានចុះផ្សាយលិខិតរបស់លោក ហ៊ុន សែន នៅថ្ងៃព្រសហ្បតិ៍នេះ។
សារលិខិតរបស់ប្រមុខរដ្ឋាភិបាលកម្ពុជា ផ្ញើជូនប្រធានាធិបតីជាប់ឆ្នោតលោក Biden កើតឡើងបន្ទាប់ពីអង្គបោះឆ្នោតសហរដ្ឋអាមេរិក បានបោះឆ្នោតជាផ្លូវការកាលពីថ្ងៃច័ន្ទ ជ្រើសរើសយកលោក Biden ជាប្រធានាធិបតីថ្មីរបស់សហរដ្ឋ អាមេរិក។ លោក Biden ទទួលបានអង្គបោះឆ្នោតសរុបចំនួន ៣០២ ដែលលើសពីចំនួនអង្គបោះឆ្នោតដែលត្រូវការដើម្បីឈ្នះការបោះឆ្នោតប្រធានាធិបតីសហរដ្ឋអាមេរិក។ បេក្ខជនប្រធានាធិបតីអាមេរិក ត្រូវការអង្គបោះឆ្នោតចំនួនយ៉ាងតិច២៧០ ដើម្បីឈ្នះការបោះឆ្នោតបាន។
នៅក្នុងលិខិតដែលចុះថ្ងៃទី១៥ ខែធ្នូ លោក ហ៊ុន សែន លើកឡើងថា «បទពិសោធន៍ដ៏ធំធេង និងភាពជាអ្នកដឹកនាំដ៏វាងវៃ»របស់លោក Biden ធ្វើឲ្យលោកទទួលបាននូវទំនុកចិត្តពីប្រជាជនអាមេរិក»។
លោក ហ៊ុន សែន សរសេរថា៖ «ខ្ញុំមានជំនឿជាក់យ៉ាងមុតមាំថា ក្រោមការដឹកនាំរបស់ឯកឧត្តមជាប្រធានាធិបតី សហរដ្ឋអាមេរិកនឹងបន្តរីកចម្រើនទៅមុខនិងរួមចំណែកនាំឲ្យពិភពលោកមានស្ថិរភាព និងវិបុលភាពកាន់តែល្អប្រសើរថែមទៀត»។
លោក ហ៊ុន សែន បន្តថា៖ «រាជរដ្ឋាភិបាលនិងប្រជាជនកម្ពុជា តែងតែផ្តល់សារៈសំខាន់យ៉ាងធំធេងដល់ការពង្រឹង និងពង្រីកនូវទំនាក់ទំនងជាមិត្តភាពដ៏យូរអង្វែងរវាងប្រទេសទាំងពីរ ដែលនៅក្នុងឆ្នាំនេះ យើងកំពុងប្រារព្ធខួបលើកទី៧០»។
លោក ហ៊ុន សែន បានគូសបញ្ជាក់ថា រដ្ឋាភិបាលរបស់លោកប្តេជ្ញាចិត្តយ៉ាងពេញលេញក្នុងការធ្វើការងារជាមួយរដ្ឋបាលរបស់លោក Biden ដើម្បីជំរុញទំនាក់ទំនងទ្វេភាគីឲ្យកាន់តែល្អប្រសើរបន្ថែមទៀត។
កាលពីខែវិច្ឆិកា ឆ្នាំ២០១៩ ប្រធានាធិបតីអាមេរិកបច្ចុប្បន្ន គឺលោក Donald Trump និងលោកនាយករដ្ឋមន្ត្រី ហ៊ុន សែន បានឆ្លើយឆ្លងតាមលិខិតទៅវិញទៅមក ដោយបញ្ជាក់អំពីបំណងពង្រឹងចំណងមិត្តភាពរវាងប្រទេសទាំងពីរ ដែលមានភាពរកាំរកូសជាច្រើនឆ្នាំ។
នៅក្នុងលិខិតឆ្លើយឆ្លងនោះ លោក ត្រាំ បានបញ្ជាក់ថា សហរដ្ឋអាមេរិកគោរពអធិបតេយ្យភាពរបស់កម្ពុជា និងមិនទាមទារឲ្យមានការផ្លាស់ប្តូររបបនោះទេ ប៉ុន្តែលោក ត្រាំ បានប្រាប់ឲ្យលោកនាយករដ្ឋមន្ត្រី ហ៊ុន សែន ដាក់ប្រទេសកម្ពុជាលើមាគ៌ាអភិបាលកិច្ចប្រជាធិបតេយ្យឡើងវិញ។
នៅក្នុងការបោះឆ្នោតកាលពីខែវិច្ឆិកា ឆ្នាំ២០១៦ នាយករដ្ឋមន្ត្រីកម្ពុជាលោក ហ៊ុន សែន បានបង្ហាញការយល់ឃើញថា បើលោកស្រី ហ៊ីលឡារី គ្លីនតុន ដែលកាលនោះជាដៃគូប្រជែងជាមួយលោក ដូណាល់ ត្រាំ ត្រូវបានបោះឆ្នោតឲ្យក្លាយជាប្រធានាធិបតីអាមេរិកនោះ ពិភពលោក «អាចនឹងមានសង្គ្រាម»។ កាលនោះ លោកហ៊ុន សែន បង្ហាញថា លោកចង់ឲ្យលោក ដូណាល់ ត្រាំ ជាប់ឆ្នោត៕