ដោយការវិលមកកាន់ប្រទេសកម្ពុជានៅថ្ងៃច័ន្ទនេះក្រោយបេសកកម្មនៅក្នុងបូរីញូវយ៉ក សហរដ្ឋអាមេរិក លោកនាយករដ្ឋមន្រ្តី ហ៊ុន សែន ប្រកាសថាការចូលរួមមហាសន្និបាតអង្គការសហប្រជាជាតិគឺជា«ជោគជ័យ»មួយ។
លោកនាយករដ្ឋមន្រ្តីបានបង្ហោះសារលើទំព័រហ្វេសប៊ុករបស់លោក ខណៈកំពុងធ្វើដំណើរតាមយន្តហោះត្រឡប់មកកម្ពុជាវិញ ក្រោយបញ្ចប់កិច្ចប្រជុំអង្គការសហប្រជាជាតិ ថា៖
«កម្ពុជាមាតុភូមិខ្ញុំ ទោះឃ្លាតឆ្ងាយក្នុងរយៈពេលយូរ ឬឆាប់យ៉ាងណាក៏អារម្មណ៍នៃការវិលត្រឡប់មកជាន់ទឹកដីកម្ពុជាមាតុភូមិនៅតែពោរពេញដោយក្តីទន្ទឹង។ ក្នុងដំណើរតាមយន្តហោះជាង១៧ម៉ោងនេះ ខ្ញុំសូមឆ្លៀតឱកាសរៀបរាប់ជូនជនរួមជាតិពីដំណើរបេសកកម្មរបស់ខ្ញុំដោយពាក្យសង្ខេបមួយថា «ជោគជ័យ!»។
លោកបានបន្ថែមដោយថ្លែងអំណរគុណដល់ប្រជាពលរដ្ឋដែលតែងគាំទ្រ និងតាមដានរាល់សកម្មភាពនៃការចូលរួមកិច្ចប្រជុំរបស់លោក ព្រមទាំងអរគុណដល់ប្រជាពលរដ្ឋខ្មែរដែលបានជួបលោកនៅសហរដ្ឋអាមេរិកផងដែរ។
លោកនាយករដ្ឋមន្រ្តី ហ៊ុន សែន បានត្រឡប់មកដល់ប្រទេសកម្ពុជាវិញ នៅម៉ោងប្រមាណជា៤រសៀល ថ្ងៃច័ន្ទនេះ បន្ទាប់ពីទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ និងកិច្ចប្រជុំពាក់ព័ន្ធផ្សេងទៀត រយៈពេល៤ថ្ងៃ ចាប់ពីថ្ងៃទី២៧ ដល់៣០ ខែកញ្ញា នៅទីក្រុងញូវយ៉ក សហរដ្ឋអាមេរិក។
លោកបានបង្ហោះសារលើទំព័រហ្វេសប៊ុករបស់លោកនារសៀលថ្ងៃច័ន្ទ ក្រោយត្រឡប់មកដល់កម្ពុជាវិញ ដោយរៀបរាប់ពីលទ្ធផលនៃកិច្ចប្រជុំរយៈពេល៤ថ្ងៃនោះថា៖
«ជាលទ្ធផលនៃការអញ្ជើញចូលរួមរបស់ប្រមុខរាជរដ្ឋាភិបាលកម្ពុជាដែលដឹកនាំដោយ សម្ដេចតេជោ ហ៊ុន សែន ឃើញថាទទួលបានលទ្ធផលគួរជាទីមោទនភាពក្រែងលែងសម្រាប់ប្រជាជាតិទាំងមូល ក្នុងការបង្ហាញទៅដល់ពិភពលោកឱ្យបានដឹង។ ក្នុងនោះ សម្តេចតេជោ ហ៊ុន សែន បានអញ្ជើញឡើងថ្លែងសេចក្តីថ្លែងការណ៍សំខាន់មួយតំណាងឱ្យប្រទេសកម្ពុជាដែលផ្តោតលើការវិវត្តនាពេលថ្មីៗ និងសមិទ្ធផលសំខាន់ៗ ដែលរាជរដ្ឋាភិបាលសម្រេចបាន និងបញ្ហាតំបន់ និងអន្តរជាតិដែលជាការព្រួយបារម្ភរួម»។
លោកនាយករដ្ឋមន្រ្តីបន្ថែមក្នុងសារនោះថា លោកក៏បានជួបពិភាក្សាទ្វេភាគីដាច់ដោយឡែកពីគ្នា ជាមួយថ្នាក់ដឹកនាំសំខាន់ៗលើពិភពលោកទៅតាមគម្រោង ដែលលោកអះអាងថា រាល់ជំនួបទាំងអស់គឺក្នុងន័យបង្កើនកិច្ចសហប្រតិបត្តិការ និងទំនាក់ទំនងកាន់តែរឹងមាំបង្កើននូវការរីកចម្រើនសម្រាប់ប្រទេស តាមរយៈការទាក់ទាញវិនិយោគិនបន្ថែមមកកម្ពុជា។
ក្នុងមហាសន្និបាតអង្គការសហប្រជាជាតិនោះ លោកនាយករដ្ឋមន្រ្តី ហ៊ុន សែន ដែលកាន់អំណាចជាង៣០ឆ្នាំ មកហើយ បានឡើងថ្លែងអំពីភាពស្របច្បាប់នៃការបោះឆ្នោត និងភាពស្របច្បាប់នៃរដ្ឋាភិបាលដែលកំពុងដឹកនាំកម្ពុជាដោយឯកបក្ស។
ថ្លែងក្នុងមហាសន្និបាតអង្គការសហប្រជាជាតិ កាលពីថ្ងៃសុក្រនៅសហរដ្ឋអាមេរិក ដែលត្រូវនឹងព្រឹកថ្ងៃសៅរ៍នៅប្រទេសកម្ពុជា លោកនាយករដ្ឋមន្រ្តី ហ៊ុន សែន បានប្រាប់បណ្ដាប្រទេសលើពិភពលោកថា កម្ពុជាគឺជាប្រជាជាតិដែលកំពុងតែសប្បាយរីករាយទទួលផលពីសុខសន្តិភាព ស្ថិរភាព និងការអភិវឌ្ឍយ៉ាងឆាប់រហ័សដែលពុំធ្លាប់មានក្នុងប្រវត្តិសាស្ត្រសម័យទំនើបរបស់ខ្លួន។
លោកក៏បានថ្លែងការពារលទ្ធផលនៃការបោះឆ្នោតកាលពីថ្ងៃទី២៩ ខែកក្កដា ឆ្នាំ២០១៨នេះថា ជាការបោះឆ្នោតដែលធ្វើឡើងដោយសេរី និងគ្មានការបង្ខិតបង្ខំ ឬគ្មានការគំរាមកំហែង ឬគ្មានអំពើហិង្សាណាមួយឡើយ។ លោកនាយករដ្ឋមន្រ្តីក៏បានចាត់ទុកការវាយតម្លៃដែលបង្ហាញនូវភាពអវិជ្ជមានពីការបោះឆ្នោតកន្លងមកពីសំណាក់មជ្ឈដ្ឋានខាងក្រៅថា ជាការប្រមាថយ៉ាងធ្ងន់ធ្ងរចំពោះឆន្ទៈប្រជាជនកម្ពុជា។
លោក អ៊ា សុផល សាស្ត្រាចារ្យផ្នែកកិច្ចការទូត និងកិច្ចការពិភពលោកនៃមហាវិទ្យាល័យ Occidental រដ្ឋកាលីហ្វ័រញ៉ា និងជាអ្នកវិភាគគោលនយោបាយ ដែលបានចូលរួមឃ្លាំមើលក្នុងមហាសន្និបាតអង្គការសហប្រជាជាតិនោះដែរ បានបង្ហោះសារលើគណនីហ្វេសប៊ុករបស់លោក កាលពីថ្ងៃអាទិត្យកន្លងទៅ ដោយភ្ជាប់នឹងការសរសេរឡើងវិញនូវការថ្លែងរបស់លោកនាយករដ្ឋមន្រ្តី ហ៊ុន សែន ក្នុងមហាសន្និបាតអង្គការសហប្រជាជាតិ។
លោក អ៊ា សុផល លើកឡើងថា ការថ្លែងពីភាពស្របច្បាប់នៃការបោះឆ្នោតនៅកម្ពុជាក្នុងឆ្នាំ២០១៨ ដែលមានប្រជាពលរដ្ឋជិត៧លាននាក់ទៅបោះឆ្នោត និងការការពារខ្លួនផ្សេងៗទៀត គឺគ្រាន់តែជាថ្លែងចេញបែបផ្លូវការពីសំណាក់លោកនាយករដ្ឋមន្រ្តី ហ៊ុន សែន ដែលលោក អ៊ា សុផល ចាត់ទុកថាការលើកឡើងនោះ គឺជា«ការវាយប្រហារទៅលើភាពខុសច្បាប់របស់គណបក្សប្រជាជនកម្ពុជា»។
លោក អ៊ា សុផល បានបន្ថែមថា៖ «នៅស្របពេលដូចគ្នានេះ នៅបុរីញូវយ៉ក ការបំភ្លៃខុសពីការពិតគឺមានយ៉ាងជាក់ស្តែង [...] តែយ៉ាងណាក្តីគឺវានៅតែជាអ្វីមិនពិត»។
អំឡុងដំណើរទៅចូលរួមកិច្ចប្រជុំអង្គការសហប្រជាជាតិរយៈពេលបួនថ្ងៃ គេឃើញមានប្រជាពលរដ្ឋខ្មែរដែលកំពុងរស់នៅសហរដ្ឋអាមេរិកមួយចំនួនចេញមកគាំទ្រ ស្របពេលដែលប្រជាពលរដ្ឋខ្មែរមួយចំនួនទៀត ចេញធ្វើបាតុកម្មតវ៉ានឹងវត្តមានរបស់លោកនាយករដ្ឋមន្រ្តីនៅទីនោះ៕