ក្នុងទិវាជាតិគ្រប់គ្រងគ្រោះមហន្តរាយ១៣តុលាឆ្នាំ២០២១ លោកនាយករដ្ឋមន្ត្រីហ៊ុន សែនបានអំពាវនាវដល់ប្រជាពលរដ្ឋនៅទូទាំងប្រទេសឲ្យបន្តការពារខ្លួនពីការឆ្លងជំងឺកូវីដ១៩ទោះបីទទួលបានវ៉ាក់សាំងបង្ការជំងឺរលាកផ្លូវដង្ហើមមួយនេះរួចហើយក៏ដោយ ។
បើតាមលិខិតរបស់លោកនាយករដ្ឋមន្ត្រីចុះថ្ងៃទី១៥ ខែកញ្ញា ឆ្នាំ២០២១និងត្រូវបានផ្សព្វផ្សាយជាសាធារណៈនៅថ្ងៃពុធនេះបានឲ្យដឹងថាការប្រារព្ធទិវាជាតិគ្រប់គ្រងគ្រោះមហន្តរាយលើកទីពីរនេះគឺត្រូវបានកំណត់ស្របតាមទិវាអាស៊ានគ្រប់គ្រងគ្រោះមហន្តរាយ និងទិវាអន្តរជាតិជាតិកាត់បន្ថយគ្រោះមហន្តរាយ។
លោកនាយករដ្ឋមន្ត្រីហ៊ុន សែនបានអំពាវនាវឲ្យពលរដ្ឋទៅទទួលវ៉ាក់សាំងប្រឆាំងជំងឺកូវីដ១៩ក្នុងន័យដើមថា៖ «ទោះបីជាបងប្អូនជនរួមជាតិបានចាក់វ៉ាក់សាំងការពារជំងឺកូវីដ១៩ហើយក៏ដោយក៏ត្រូវបន្តរក្សានិងអនុវត្តគោលការណ៍បង្ការទប់ស្កាត់និងវិធានសុខាភិបាល...ហើយបើមិនទាន់បានចាក់វ៉ាក់សាំងការពារកូវីដ១៩សូមមេត្តាអញ្ជើញទៅចាក់វ៉ាក់សាំងឲ្យបានគ្រប់ៗគ្នាតាមការណែនាំនិងតាមទីកន្លែងដែលបានកំណត់ដោយរដ្ឋបាលរាជធានីខេត្តដើម្បីបង្កើតភាពស៊ាំចៀសផុតពីគ្រោះមហន្តរាយនៃជំងឺរាតត្បាតកាចសាហាវនេះ»។
អំឡុងពេលនៃការរៀបចំពិធីបុណ្យភ្ជុំបិណ្ឌលោក ហ៊ុន សែន បានប្រកាសថាប្រសិនបើស្ថានភាពឆ្លងជំងឺកូវីដ១៩មិនអាក្រក់ខ្លាំងក្រោយពិធីបុណ្យប្រពៃណីជាតិដ៏ធំនេះរដ្ឋាភិបាលនឹងបើកប្រទេស ដើម្បីស្តារសកម្មភាពសង្គមនិងសេដ្ឋកិច្ចទាំងមូលឡើងវិញ៕