លោកនាយករដ្ឋមន្រ្តី ហ៊ុន ម៉ាណែត នៅថ្ងៃព្រហស្បតិ៍នេះ លើកឡើងថា លោកសុខចិត្តឱ្យគេហៅលោកថា «ផ្តាច់ការ» ជាជាងឱ្យប្រជាពលរដ្ឋចោទលោកថាមិនមានសមត្ថភាពក្នុងការការពារសន្តិភាព។
លោកនាយករដ្ឋមន្រ្តីថ្លែងបែបនេះ នៅក្នុងពិធី «បិទស្ទឹងសាងសង់ទំនប់វារីអគ្គិសនីតាតៃលើ អានុភាព ១៥០មេហ្គាវ៉ាត់» ស្ថិតនៅក្នុងស្រុកថ្មបាំង ខេត្តកោះកុង។
លោក ហ៊ុន ម៉ាណែត ដែលឡើងកាន់អំណាចជានាយករដ្ឋមន្រ្តីបានជាង៣ខែ បន្ទាប់ពីឪពុករបស់លោកដែលកាន់អំណាចជិត៤០ឆ្នាំ ថ្លែងថា នៅពេលលោកនិយាយអំពីការថែរក្សាសន្តិភាព មានអ្នកចោទរូបលោកថា«ផ្តាច់ការ»។ ប៉ុន្តែលោកថា រដ្ឋាភិបាលរបស់លោកនឹងបន្តរក្សាសន្តិភាព និងស្ថិរភាពសម្រាប់ប្រជាពលរដ្ឋ ទោះក្នុងតម្លៃណាក៏ដោយ។
លោក ម៉ាណែត ពុំបានបញ្ជាក់ចំៗទៅលើក្រុមណានិងរិះគន់លោករឿងអ្វីនោះទេ ក្នុងពេលដែលលោកបញ្ជាក់ពីការប្តេជ្ញាចិត្តរបស់លោកដូច្នេះ។
គួរបញ្ជាក់ថា អតីតនាយករដ្ឋមន្រ្តី លោក ហ៊ុន សែន បានថ្លែងអំពីការការពារសន្តិភាព ជាញឹកញាប់ នៅពេលលោកថ្លែងជាសាធារណៈ។ លោក ហ៊ុន សែន ធ្លាប់បញ្ជាក់ថា កម្ពុជានឹងអាចមានសង្រ្គាម ប្រសិនបើគណបក្សប្រជាជនកម្ពុជារបស់លោកចាញ់ការបោះឆ្នោត៕