អង្គការសិទ្ធិមនុស្ស Human Rights Watch ដែលមានទីតាំងនៅក្នុងសហរដ្ឋអាមេរិកនិយាយថា មានការលំបាកកាន់តែខ្លាំងឡើងៗសម្រាប់ពលរដ្ឋកូរ៉េខាងជើងក្នុង ការចាកចេញពីប្រទេសរបស់ខ្លួននៅពេលដែលរដ្ឋាភិបាលទីក្រុងព្យុងយ៉ាង ព្យាយាមបង្កើនការត្រួតត្រារបស់ខ្លួនលើលំហូរព័ត៌មាននោះ។
អង្គការនេះបានប្រាប់ឲ្យដឹងនៅក្នុងការប្រកាសព័ត៌មានដែលបាន ចេញផ្សាយពីការិយាល័យរបស់ខ្លួនក្នុងទីក្រុងសេអ៊ូលនៅដើមសប្តាហ៍នេះ ថា កូរ៉េខាងជើងកំពុងខំប្រឹងប្រែងដើម្បីត្រួតត្រាព្រំដែនរបស់ ខ្លួនហើយនិងកាត់បន្ថយព័ត៌មានដែលហូរចូលនិងចេញពីប្រទេសដោយ ការដាក់ទណ្ឌកម្មយ៉ាងខ្លាំងលើពលរដ្ឋដែលព្យាយាមរត់គេចចេញពី ប្រទេស ហើយនិងកាត់ទោសឲ្យជាប់ពន្ធនាគារកាន់តែធ្ងន់ឡើងៗដល់អ្នកដែល ជួយពួកគេ។
នៅក្នុងកិច្ចសម្ភាសន៍តាមទូរស័ព្ទជាមួយវីអូអេ ផ្សាយជាភាសាកូរ៉េ លោក Phil Robertson នាយករងទទួលបន្ទុកអាស៊ីរបស់អង្គការសិទ្ធិមនុស្ស Human Rights Watch បាននិយាយថា រដ្ឋាភិបាលកូរ៉េខាងជើងគិតថាខ្លួនបានស្ថិតនៅក្រោមការគំរាមកំហែង ពីព្រោះតែនៅពេលដែលមនុស្ស ចាកចេញពីកូរ៉េខាងជើង ពួកគេនាំយករឿងរ៉ាវរបស់ពួកគេទៅជាមួយ។
លោក Robertson មានប្រសាសន៍បន្តទៀតថា «យើងកំពុងមើលឃើញមនុស្សត្រូវគេធ្វើទារុណកម្មកាន់តែខ្លាំង ឡើងៗជាងកាលពីពេលមុនចំពោះការអនុវត្តសិទ្ធិដ៏សំខាន់របស់ខ្លួន ដើម្បីចូលនិងចាកចេញពីប្រទេសរបស់ពួកគេឬដើម្បីចែករំលែកព័ត៌មាន និងទទួលព័ត៌មាននោះ។
លោក Robertson មានប្រសាសន៍បន្តទៀតថា «វាក៏ជាការលំបាកកាន់តែខ្លាំងឡើងៗដើម្បីធ្វើដំណើរកាត់ តាមប្រទេសចិនហើយឆ្លងទៅប្រទេសផ្សេងៗទៀតដូចជាឡាវនិងប្រទេស ថៃ ជាកន្លែងដែលជនជាតិកូរ៉េខាងជើងអាចធ្វើដំណើរទៅកាន់ប្រទេសកូរ៉េខាងត្បូង។
យោងទៅតាមលោក Robertson វាក៏កំពុងក្លាយជាការលំបាកកាន់តែខ្លាំងឡើងៗក្នុងការ ប្រាស្រ័យទាក់ទងជាមួយជនជាតិកូរ៉េខាងជើង ជាពិសេសនៅតាមបណ្តោយព្រំដែនជាមួយប្រទេសចិន។
កូរ៉េខាងជើងជាប្រទេសឯកោបំផុតមួយនៃបណ្តាប្រទេសឯកោបំផុតរបស់ ពិភពលោក មិនបានឆ្លើយតបដល់ការចោទប្រកាន់ពីអង្គការសិទ្ធិមនុស្ស Human Rights Watch ទេ៕