លោកនាយករដ្ឋមន្រ្តី ហ៊ុន សែន នៅយប់ថ្ងៃចន្ទនេះ បានចេញបញ្ជាឲ្យបិទសាលារៀនទាំងរដ្ឋ និងឯកជនក្នុងរាជធានីនិងខេត្តកណ្តាលជាបណ្តោះអាសន្ន យ៉ាងតិច២សប្តាហ៍ ចាប់ពីថ្ងៃចន្ទនេះទៅ ដោយសារចំនួនអ្នកឆ្លងជំងឺកូវីដ១៩ក្នុងសហគមន៍ បន្តកើនឡើង។
លោក ហ៊ុន សែន បានលើកឡើងបែបនេះនៅក្នុងសារជាសំឡេងបន្ទាន់មួយ ដែលត្រូវបានបង្ហោះលើហ្វេសប៊ុករបស់នាយករដ្ឋមន្រ្តី។
លោក ហ៊ុន សែន ឲ្យដឹងថា ក្រសួងសុខាភិបាលរកឃើញមនុស្សយ៉ាងតិច១៣ទៀតឆ្លងវីរុសជំងឺកូវីដ១៩ ខណៈកំពុងរង់ចាំលទ្ធផលនៃការធ្វើតេស្តសំណាកជាច្រើនទៀត។
លោក ហ៊ុន សែន បញ្ជាក់ថា៖ «ដូច្នេះចំនួនឆ្លងក្នុងរង្វង់តែរយៈពេល៣ថ្ងៃប៉ុណ្ណោះ គឺចំនួនឆ្លងឡើងជិត១០០នាក់ ដែលជាចំនួនឆ្លងដែលមិនធ្លាប់មាន តាំងពីពេលដែលមានជំងឺកូវីដចូលមកក្នុងផ្ទៃប្រទេសរបស់យើង»។
ចាប់តាំងពីថ្ងៃសៅរ៍ ដែលរដ្ឋាភិបាលប្រកាសអំពីការឆ្លងចូលសហគមន៍ទ្រង់ទ្រាយធំលើកទី៣ ចំនួនអ្នកឆ្លងកូវីដ១៩ បានកើនឡើងដល់៧៦នាក់ ដែលភាគច្រើនលើជនជាតិចិនដែលរស់នៅភ្នំពេញ។ ការប្រកាសឆ្លងក្នុងសហគមន៍ទ្រង់ទ្រាយធំនេះ ធ្វើឡើងកាលពីថ្ងៃទី២០ ខែកុម្ភៈ ដោយមិនទាន់ដឹងប្រភពច្បាស់លាស់នៃការឆ្លងនៅឡើយទេ។
លោក ហ៊ុន សែន ក៏បានអំពាវនាវឲ្យពលរដ្ឋពន្យារពេលរៀបអាពាហ៍ពិពាហ៍ ឬក៏កាត់បន្ថយចំនួនមនុស្សតាមដែលអាចធ្វើទៅបាន ប្រសិនបើចាំបាច់រៀបចំពិធី។ លោកក៏បានអំពាវនាវប្រជាពលរដ្ឋដែលមានបំណងមកភ្នំពេញពិចារណាពន្យារពេល បើអាច ដើម្បីបញ្ចៀសការឆ្លងបន្តនៃជំងឺនេះ។
លោកមានប្រសាសន៍ថា៖ «ហើយសម្រាប់ប្រជាពលរដ្ឋដែលនៅតាមបណ្តាខេត្ត ប្រសិនបើអាចពន្យារបានក្នុងការធ្វើដំណើរមកទីក្រុងភ្នំពេញ ក៏សូមពន្យារសិន ដើម្បីទុកឱកាសឲ្យរាជធានីភ្នំពេញដោះស្រាយបញ្ហានេះ ជៀសវាងការកកកុញស្ទះចរាចរណ៍ ដែលនោះក៏ជាមូលហេតុមួយក្នុងចំណោមមូលហេតុនៃការចម្លងពីគ្នាទៅគ្នាផងដែរ»៕