សំណើសុំនៅក្រៅឃុំរបស់សកម្មជនថៃ ៤ នាក់ ត្រូវបានបដិសេធកាលពីថ្ងៃអង្គារ ហើយតុលាការបានសម្រេចថា ពួកគេគួរនៅជាប់ឃុំរហូតទាល់តែដល់ពេលសវនាការកាត់ក្តីពួកគេពីបទឧក្រិដ្ឋប្រឆាំងនឹងរាជវង្ស។
ក្រុមរាជអាជ្ញាបានចោទប្រកាន់ពួកគេពីបទប្រឆាំងនឹងច្បាប់ប្រមាថព្រះមហាក្សត្រ Les majeste ដ៏តឹងរ៉ឹង ដែលនេះជាលើកទីមួយ នៅក្នុងរយៈពេល ៣ ឆ្នាំចុងក្រោយនេះ ដែលមានអ្នកត្រូវបានចោទប្រកាន់ក្រោមច្បាប់នេះ។ បទឧក្រិដ្ឋនេះត្រូវបានចោទប្រកាន់កាន់តែច្រើនឡើង ក្រោមការគ្រប់គ្រងរបស់ព្រះមហាក្សត្រ Maha Vajiralongkorn។
ទោះជាយ៉ាងនេះក្តី ប៉ូលិសបានចាប់ផ្តើមប្រើប្រាស់ការប្រមាថនេះ ក្រោយការរិះគន់រាជវង្សនិងរដ្ឋាភិបាលបានរីកធំឡើង។
ច្បាប់ប្រមាថព្រះមហាក្សត្រនេះចែងថា ការប្រមាថ ឬបរិហាកេរ្តិ៍ព្រះមហាក្សត្រ គឺជាបទឧក្រិដ្ឋមួយ។ អ្នកដែលល្មើសច្បាប់នេះអាចនឹងត្រូវជាប់ពន្ធនាគាររហូតដល់ទៅ ១៥ ឆ្នាំ។ អ្នកមួយចំនួនទៀតក៏ត្រូវបានចោទប្រកាន់ពីបទបង្កភាពបះបោរ និងបំពានច្បាប់ការពារវិមានបុរាណផងដែរ។
សកម្មជនទាំង ៤ នាក់ រួមមានលោក Chiwarak Parit ហៅ Penguin លោក Arnon Nampa លោក Somyos Prueksakasemsuk និងលោក Patiwat Saraiyaem ហៅ Mor Lam Bank មិនព្រមសារភាពទទួលទោស ដូចការចោទប្រកាន់នោះទេ។
លោក Parit បានប្រាប់ក្រុមអ្នកសារព័ត៌មានថា៖ «ការធ្វើទុក្ខបុកម្នេញប្រឆាំងនឹងពួកយើង គឺជាការប្រើប្រាស់ច្បាប់ ដើម្បីរារាំងសេរីភាពក្នុងការបញ្ចេញមតិរបស់ពួកយើង»។
សកម្មជនទាំងនេះស្ថិតក្នុងចំណោមអ្នកដែលធ្វើបាតុកម្មគាំទ្រលទ្ធិប្រជាធិបតេយ្យ នៅក្បែរព្រះបរមរាជវាំង កាលពីថ្ងៃទី១៩ ខែកញ្ញា ឆ្នាំមុន។ សកម្មជនទាំងនេះពេលនោះកំពុងទាមទារឲ្យមានកំណែទម្រង់រាជវង្ស ដើម្បីឲ្យព្រះមហាក្សត្រទទួលខុសត្រូវជាងមុន។
ពួកគេក៏បានស្នើឲ្យដកលោកនាយករដ្ឋមន្ត្រី Prayuth Chan-ocha និងរំលាយរដ្ឋាភិបាលរបស់លោក ហើយចង់ឲ្យមានវិសោធនកម្មរដ្ឋធម្មនុញ្ញ ដែលអនុម័តឲ្យមានលទ្ធិប្រជាធិបតេយ្យស៊ីជម្រៅជាងមុនផងដែរ។
ក្រុមមេធាវីថៃការពារសិទ្ធិមនុស្សបានឲ្យដឹងថា សកម្មជនយ៉ាងហោចណាស់ចំនួន ៥៥ នាក់ ត្រូវបានចោទប្រកាន់ក្រោមច្បាប់ប្រមាថព្រះមហាក្សត្រ តាំងពីខែវិច្ឆិកាមក ប៉ុន្តែសកម្មជនទាំង ៤ នាក់នេះជាអ្នកត្រូវជំនុំជម្រះក្តីនៅតុលាការមុនគេ។
នេះក៏ជាលើកទីមួយដែរក្នុងរយៈពេលយូរមកហើយ ដែលចុងចោទត្រូវឃាត់ខ្លួនដោយមិនត្រូវបានអនុញ្ញាតឲ្យធានានៅក្រៅឃុំក្រោមបទចោទប្រកាន់នេះ។
សវនាការជំនុំជម្រះក្តីត្រូវបានគេគ្រោងថា នឹងចាប់ផ្តើមនៅខែក្រោយ៕
ប្រែសម្រួលដោយអ្នកនាងស្រេង លក្ខិណា