លោក កឹម សុខា ប្រធានគណបក្សសង្គ្រោះជាតិដែលកំពុងជាប់ឃុំ អំពាវនាវពីក្នុងពន្ធនាគារ ឲ្យអ្នកនយោបាយបោះបង់ចោលការចងអាឃាត និងឈប់យកប្រជាពលរដ្ឋធ្វើជាសត្រូវ ព្រមទាំងបានអំពាវនាវឲ្យប្រជាពលរដ្ឋផ្តល់មេត្តាធម៌ចំពោះគ្នាទៅវិញទៅមកដើម្បីពង្រឹងគុណធម៌ក្នុងសង្គម។
ក្នុងសារលិខិតជូនពរឆ្នាំថ្មីដែលត្រូវបានបង្ហោះលើទំព័រហ្វេសប៊ុកផ្ទាល់ខ្លួននាព្រឹកថ្ងៃព្រហស្បតិ៍នេះលោក កឹម សុខា បានបញ្ជាក់ថា កាលពីឆ្នាំចាស់កន្លងទៅ ប្រជាពលរដ្ឋ និងអ្នកនយោបាយមានការឈឺចាប់យ៉ាងខ្លាំង ដោយសារ «ការធ្លាក់ចុះនូវគុណធម៌»។ លោកបន្ថែមក្នុងលិខិតនោះថា ការឈឺចាប់នោះធ្វើឲ្យខ្វះការជឿទុកចិត្តគ្នា ជាហេតុធ្វើឲ្យមានការបែកបាក់ជាតិដោយសារគ្មានការអត់ឱន និងអធ្យាស្រ័យគ្នាទៅវិញទៅមក។
លោក កឹម សុខា បានអំពាវនាវដល់អ្នកស្នេហាជាតិ និងអ្នកស្រឡាញ់លទ្ធិប្រជាធិបតេយ្យកុំអស់សង្ឃឹម និងត្រូវតស៊ូក្នុងការទាមទារឲ្យមានការផ្លាស់ប្តូរ។
លោកបានបញ្ជាក់បន្ថែមថា៖
«ការផ្លាស់ប្តូរគឺចាំបាច់ត្រូវកើតមានឡើងដោយអហិង្សា និងតាមគោលការណ៍ប្រជាធិបតេយ្យសេរី ពហុបក្សពិតប្រាកដ និងតាមរយៈការបោះឆ្នោតសេរី ត្រឹមត្រូវ និងយុត្តិធម៌។ ព្រះឱវាទរបស់ព្រះសម្មាសម្ពុទ្ធ ក៏ដូចជាច្បាប់ធម្មជាតិបង្ហាញឲ្យឃើញច្បាស់ថា អ្វីៗតែងមានការផ្លាស់ប្តូរមិនអាចប្រកែកបាន សូម្បីតែទេវតាឆ្នាំចាស់ ក៏ត្រូវផ្លាស់ជំនួសដោយទេវតាឆ្នាំថ្មីផងដែរ»។
លោក កឹម សុខា ប្រធានគណបក្សសង្គ្រោះជាតិ ត្រូវបានសមត្ថកិច្ចសម្រុកចូលចាប់ខ្លួនពីក្នុងផ្ទះទាំងកណ្តាលយប់រំលងអាធ្រាត្រ កាលពីដើមខែកញ្ញា ឆ្នាំ២០១៧ កន្លងទៅ ដោយតុលាការចោទលោកពីបទក្បត់ជាតិ។ លោកត្រូវបានបញ្ជូនទៅឃុំក្នុងពន្ធនាគារត្រពាំងផ្លុងឯខេត្តត្បូងឃ្មុំ ជាខេត្តមានព្រំប្រទល់ជាប់ប្រទេស វៀតណាម នៅមុនបន្តិចនៃការរំលាយគណបក្សសង្គ្រោះជាតិដែលត្រូវបានតុលាការចោទតាមបណ្តឹងរបស់ក្រសួងមហាផ្ទៃថា គណបក្សនេះបានឃុបឃិតជាមួយបរទេស រៀបគម្រោងផ្តួលរំលំរដ្ឋាភិបាលដែលដឹកនាំដោយលោកនាយករដ្ឋមន្រ្តី ហ៊ុន សែន។
ក្នុងរយៈពេលនៃការឃុំខ្លួននេះ ចៅក្រមបានសាកសួរ និងជំនុំជម្រះលោកទាំងនៅក្នុងពន្ធនាគារដោយមិនអនុញ្ញាតឲ្យមានការសួរសុខទុក្ខ ក្រៅតែពីមេធាវី និងគ្រួសាររបស់លោកនោះទេ។
ក្រុមមេធាវីរបស់លោក កឹម សុខា បានប្តឹងទៅតុលាការគ្រប់ជាន់ថ្នាក់សុំឲ្យលោកបាននៅក្រៅឃុំដើម្បីព្យាបាលជំងឺគៀបសសៃ លើសឈាម និងទឹកនោមផ្អែម ប៉ុន្តែតុលាការទាំងអស់បានច្រានចោល។
លោក កឹម សុខា បានបន្ថែមក្នុងលិខិតជូនពរនោះថា លោកចង់ឃើញឆ្នាំថ្មីមួយដែលនាំមកនូវសេចក្តីសុខ សេរីភាព និងសុភមង្គលដល់ខ្មែរគ្រប់ភាគី និងលុបជម្រះឲ្យអស់នូវអពមង្គល ការគុំគួន អំពើបាបក្នុងឆ្នាំចាស់៖
«សម្រាប់ខ្ញុំព្រះករុណា ខ្ញុំមិនមាននោះទេពាក្យថាសងសឹក ហើយក៏សូមអហោសកម្មចំពោះទង្វើបានទាំងឡាយដែលត្រូវបានគេធ្វើមកលើខ្ញុំព្រះករុណាខ្ញុំ។ សូមឲ្យខ្មែរចាប់ផ្តើមជាថ្មីក្នុងការកសាងជាតិរួមគ្នា ចាប់ពីឆ្នាំថ្មីនេះតទៅ»។
លោក សុខ ឥសាន អ្នកនាំពាក្យគណបក្សកាន់អំណាចប្រាប់ VOA នារសៀលថ្ងៃព្រហស្បតិ៍នេះថា លោកគាំទ្រអត្ថន័យក្នុងលិខិតជូនពររបស់លោក កឹម សុខា ដែលបង្ហាញពីការពង្រឹងគុណធម៌ក្នុងសង្គម។ ទោះយ៉ាងណាលោកថា ទង្វើរបស់លោក កឹម សុខា រហូតឈានដល់មានការចាប់ឃុំខ្លួនពីបទក្បត់ជាតិ គឺនៅតែជាបទល្មើស ដែលមិនអាចលើកយកពាក្យគុណធម៌មកពាក់ព័ន្ធបាននោះទេ។
លោកមានប្រសាសន៍ថា៖
«បើសិនណាជាអ្នកនយោបាយណាដែលប្រព្រឹត្តល្មើសច្បាប់ធ្ងន់ធ្ងរ រហូតដល់ថ្នាក់ក្បត់ជាតិ ខ្ញុំយល់ថាអាហ្នឹងមិនអាចយកសីលធម៌មកនិយាយទេ គឺសីលធម៌អ្នកខុសហ្នឹងហើយ។ ឲ្យអ្នកដឹកនាំអំណាចយកសីលធម៌សម្របសម្រួលជាមួយអ្នកក្បត់ជាតិ វាអត់ទៅរួច»។
សារលិខិតជូនពររបស់លោក កឹម សុខា ចេញក្រោយបន្តិចនៃសារជូនពររបស់មន្រ្តីជាន់ខ្ពស់គណបក្សកាន់អំណាច និងសារជូនពររបស់លោក សម រង្ស៊ី អតីតប្រធានគណបក្សសង្គ្រោះជាតិមួយរូបដែលកំពុងនិរទេសខ្លួនរស់នៅឯបរទេស។
សាររបស់មន្រ្តីជាន់ខ្ពស់រដ្ឋាភិបាល បានបញ្ជាក់ពីការប្តូរផ្តាច់ ក្នុងការកសាងកម្ពុជាទៅតាមគន្លងប្រជាធិបតេយ្យសេរី ពហុបក្ស ខណៈសាររបស់លោក សម រង្ស៊ី បញ្ជាក់ថា ពន្លឺប្រជាធិបតេយ្យរបស់កម្ពុជានៅមិនទាន់ភ្លឺខ្លាំងនៅឡើយ ចំណែកដំណើររៀបចំការបោះឆ្នោតបច្ចុប្បន្ន ត្រូវបានលោកចោទថា ជាដំណើរការបោះឆ្នោតក្លែងក្លាយ៕