សក្ខីកម្មមួយថ្ងៃដើម្បីចោទប្រកាន់ដកលោក Trump ចេញពីតំណែងមិនបានប្តូរការយល់ឃើញនៅក្នុងរដ្ឋធានីវ៉ាស៊ីនតោនទេ ដោយក្រុមអ្នករិះគន់លោកជឿជាក់ថាលោកបានរំលោភតំណែងរបស់លោកដោយជំរុញប្រទេសអ៊ុយក្រែនឱ្យធ្វើការស៊ើបអង្កេតខាងនយោបាយអំពីពួកប្រជាធិបតេយ្យនៅក្នុងស.រ.អា. ហើយសម្ព័ន្ធមិត្តរបស់លោកមានមតិថាលោកមិនបានធ្វើអ្វីខុសទេ។
លោក Trump បានប្រកាសតាម Twitter ថា«ការចោទប្រកាន់បញ្ឆោតនេះជារឿងមានពីមុនអាក្រក់មួយនិងជារឿងអាក្រក់សម្រាប់ប្រទេសយើង!»
ក៏ប៉ុន្តែលោកស្រី Nancy Pelosi ប្រធានសភាតំណាងរាស្ត្រអាមេរិកាំងត្រួតត្រាដោយប្រជាធិបតេយ្យបានមានប្រសាសន៍ថាសកម្មភាពរបស់លោក Trump អាចចាត់ទុកបានថាជាការសូកប៉ាន់--គឺការផ្អាកជាបណ្តោះអាសន្ននូវជំនួយយោធា៣៩១លានដុល្លារដល់ប្រទេសអ៊ុយក្រែននៅពេលលោកជំរុញឱ្យមានការស៊ើបអង្កេតអំពីលោកអតីតអនុប្រធានាធិបតី Joe Biden ដែលជាអ្នកប្រជែងនឹងលោកធំជាងគេខាងគណបក្សប្រជាធិបតេយ្យនៅក្នុងការបោះឆ្នោតប្រធានាធិបតីស.រ.អា.នៅឆ្នាំ២០២០។
លោកស្រី Pelosi បានមានប្រសាសន៍នៅក្នុងសន្និសិទកាសែតមួយថា«ការសូកប៉ាន់នេះគឺការផ្តល់ឱ្យឬការផ្អិបជំនួយយោធាឱ្យដល់អ៊ុយក្រែនជាថ្នូរនឹងការធ្វើសេចក្តីថ្លែងការណ៍សាធារណៈមួយនៃការស៊ើបអង្កេតក្លែងបន្លំអំពីការបោះឆ្នោត។ នេះជាការសូកប៉ាន់ អ្វីដែលលោកប្រធានាធិបតីបានសារភាពថាការធ្វើដូច្នេះជាការត្រឹមត្រូវ ខ្ញុំនិយាយថាការធ្វើដូច្នេះជាការខុសទាំងស្រុង។ វាជាការសូកប៉ាន់»៕