ក្រុមគ្រួសារបារម្ភពីការរឹតត្បិតសិទ្ធិសេរីភាព ក្រោយសកម្មជនបក្សប្រឆាំងត្រូវបានផ្លាស់ទៅពន្ធនាគារត្រពាំងផ្លុង

ភ្នំពេញ —

ក្រុមគ្រួសារបានបង្ហាញក្តីព្រួយបារម្ភអំពីការគំរាមកំហែង និងការរឹតត្បិតមិនឱ្យនិយាយអំពីទុក្ខលំបាក ក្រោយសកម្មជនអតីតគណបក្សសង្គ្រោះជាតិត្រូវបានបញ្ជូនទៅឃុំឃាំងនៅត្រពាំងផ្លុង ក្នុងខេត្តត្បូងឃ្មុំ ជាប់ព្រំដែនប្រទេសវៀតណាម។

អ្នកស្រី សេង ចាន់ថន ភរិយារបស់លោក ស៊ុន ធន់ ដែលជាអតីតក្រុមប្រឹក្សាម្នាក់របស់គណបក្សប្រឆាំងក្នុងខេត្តកំពង់ធំ ប្រាប់វីអូអេថា ស្វាមីរបស់អ្នកស្រីមិនហ៊ាននិយាយស្តីអ្វីឡើយ នៅពេលអ្នកស្រីព្យាយាមសួរអំពីបញ្ហាដែលកំពុងជួបប្រទះ ដែលអ្នកស្រីថា វាខុសប្លែកពីធម្មតា។

អ្នកស្រីថ្លែងថា៖ «ហើយការនិយាយស្តីអី គឺគាត់អត់ហ៊ានហ្មង។ អ៊ីចឹងគឺបិទសិទ្ធិសេរីភាពគាត់។ ចំណុចអស់ទាំងនេះហើយដែលធ្វើឱ្យពួកគាត់ពិបាក»។

អ្នកស្រីបន្តថា អ្នកស្រីចង់ឱ្យអាជ្ញាធរបញ្ជូនខ្លួនស្វាមី និងសកម្មជនផ្សេងទៀតមកកាន់ពន្ធនាគារព្រៃស ក្នុងរាជធានីភ្នំពេញវិញ ដោយសារវាមានការពិបាកខ្លាំងសម្រាប់ក្រុមគ្រួសារទៅសួរសុខទុក្ខពួកគេ ជាពិសេសត្រូវចំណាយថវិកាច្រើន។

អ្នកស្រីបន្ថែមថា៖ «ដោយសារហេតុអ្វីបានជាខ្ញុំអត់ចង់ឱ្យនៅហ្នឹង។ ព្រោះកន្លែងហ្នឹងមានការរឹតត្បិតសេរីភាពពួកគាត់ រឹតត្បិតសេរីភាពពួកខ្ញុំ គ្រាន់តែទៅសួរសុខទុក្ខក៏មានការលំបាកដែរ ខ្វះអីតិចតួចត្រូវបានសំឡុត គំរាមកំហែង»។

អ្នកស្រី សេង ចាន់ថន និងស្រ្តីផ្សេងទៀត ដែលជាភរិយារបស់សកម្មជនជាប់ពន្ធនាគារ តែងតែចេញមុខតវ៉ានៅខាងមុខតុលាការ និងកន្លែងផ្សេងទៀត ដើម្បីសុំអន្តរាគមន៍ពីភាគីពាក់ព័ន្ធឲ្យជួយស្វាមីរបស់ពួកគេ។

ប៉ុន្តែក្នុងអំឡុងពេលចុងក្រោយនេះ អាជ្ញាធរបានសម្រេចបញ្ជូនស្វាមីរបស់ពួកគេដែលជាសកម្មជននយោបាយចំនួន ១៤ នាក់ ទៅឃុំនៅពន្ធនាគារក្នុងខេត្តត្បូងឃ្មុំវិញ ដែលជាទីកន្លែងលោក កឹម សុខា មេដឹកនាំបក្សប្រឆាំង ធ្លាប់ត្រូវបានឃុំខ្លួននៅទីនោះផងដែរ។ នេះបើតាមក្រុមគ្រួសាររបស់សកម្មជន។

អ្នកស្រី ផល ជឿន កូនស្រីរបស់លោក ឡុង ផារី អតីតប្រតិបត្តិស្រុកកំពង់ត្របែក ខេត្តព្រៃវែងរបស់គណបក្សសង្គ្រោះជាតិ បានទៅសួរសុខទុក្ខឪពុករបស់ខ្លួន កាលពីថ្ងៃអាទិត្យ។ អ្នកស្រីបានលើកឡើងថា ឪពុករបស់ខ្លួនមិននិយាយអ្វីប្រាប់ឡើយ ហើយថា ស្ថានភាពរបស់លោកល្អធម្មតា។ ប៉ុន្តែអ្នកស្រីកត់សម្គាល់ថា ឪពុកមិនបាននិយាយអ្វីដែលលោកចង់និយាយឡើយ។

អ្នកស្រីស្នើឱ្យអាជ្ញាធរបញ្ជូនឪពុកត្រឡប់មកកាន់មន្ទីរឃុំឃាំងព្រៃស ក្នុងរាជធានីភ្នំពេញវិញ។

អ្នកស្រីថ្លែងថា៖ «ដូចជាខ្ញុំទៅសួរសុខទុក្ខគាត់ម្តងៗ គឺចំណាយច្រើន ទាំងពេលវេលា ថវិកា ហើយនិយាយទៅលំបាក លំបាកច្រើនពេលដែលគាត់នៅទីនោះ (ពន្ធនាគារត្រពាំងផ្លុង)។ បើសិនជាគេយកមកនេះវិញទៅ វាបានជិត»។

បើតាមអ្នកស្រី ផល់ ជឿន សកម្មជនចំនួន ១៤ នាក់ ត្រូវបានបញ្ជូនចេញពីពន្ធនាគារព្រៃស ទៅកាន់មណ្ឌលឃុំឃាំងត្រពាំងផ្លុង ក្នុងខេត្តត្បូងឃ្មុំ កាលពីថ្ងៃទី ២១ ខែសីហា ឆ្នាំ ២០២២។ សកម្មជនទាំងនោះរួមមាន លោក ស៊ុន ធន់ លោក កែវ ថៃ លោក យឹម សារ៉េត លោក សុខ ចាន់ថា លោក ញ៉ែម វាន លោក ថៃ គន្ធា និងលោក ឃឹម ភាណាជាដើម។

អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វីអូអេថា ការផ្លាស់ប្តូរអ្នកទោសពីពន្ធនាគារមួយទៅពន្ធនាគារមួយទៀត ជារឿងធម្មតា នៅពេលណាដែលមានកកស្ទះអ្នកទោសក្នុងពន្ធនាគារណាមួយ។ លោកបដិសេធទៅនឹងការលើកឡើងរបស់ក្រុមគ្រួសារ ដែលថា សកម្មជននយោបាយជាប់ទោសទាំងនោះត្រូវបានរឹតត្បិតមិនឱ្យនិយាយស្តី។

លោកថ្លែងថា៖ «ដូច្នេះខ្ញុំសុំបដិសេធនូវអ្វី ដែលគាត់ថា មិនហ៊ាននិយាយ»។

លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូ ថ្លែងថា តាមច្បាប់ បុគ្គលដែលជាប់ពន្ធនាគារ ត្រូវដកហូតតែសិទ្ធិដើរហើរតែប៉ុណ្ណោះ ខណៈសិទ្ធិដទៃទៀត គឺនៅដដែល។ អ្នកឃ្លាំមើលរូបនេះបន្តថា ករណីដែលបានកើតឡើងលើសកម្មជនទាំង ១៤ នាក់នោះ ជាការរំលោភទៅលើសិទ្ធិរបស់ជនជាប់ឃុំឃាំង។

លោកថ្លែងថា៖ «កាលណា បើសិនជាមានការរឹតត្បិតសេរីភាពនៃការនិយាយស្តី ហើយនិងការជួបប្រាស្រ័យទាក់ទងរវាងអ្នកជាប់ឃុំ និងក្រុមគ្រួសារ អាហ្នឹងជាការរំលោភទៅលើសិទ្ធិរបស់ពួកគាត់»។

បើតាមលោក អំ សំអាត ករណីចុងក្រោយមានការប្រើប្រាស់អំពើហិង្សាលើសកម្មជនអតីតគណបក្សសង្គ្រោះជាតិផងដែរ។ ការណ៍នេះលោកជំរុញឱ្យអាជ្ញាធរត្រួតពិនិត្យក៏ដូចជាស៊ើបអង្កេតករណីនេះ។

លោកថ្លែងថា៖ «គឺយើងមានការសោកស្តាយទៅលើករណីនេះ ហើយយើងទទូចឱ្យមានការស្រាវជ្រាវនិងការស៊ើបអង្កេតឱ្យបានច្បាស់លាស់ ដើម្បីជាតម្លាភាព និងស្វែងរកយុត្តិធម៌»។

អតីតសកម្មជនគណបក្សសង្គ្រោះជាតិជាង ១០ នាក់ដែលកំពុងជាប់ឃុំ ត្រូវបានកាត់ទោសឱ្យជាប់ពន្ធនាគារម្នាក់ៗ ចំនួន ៥ ឆ្នាំ ពីបទ «រួមគំនិតក្បត់ និងញុះញង់ឱ្យមានភាពវឹកវរដល់សន្តិសុខសង្គម» ដោយក្នុងនោះទោសត្រូវអនុវត្តជាប់ក្នុងពន្ធនាគារចំនួន ៣ ឆ្នាំ ៨ ខែ សល់ពីនោះត្រូវព្យួរ។ សំណុំរឿងនេះមានជាប់ទាក់ទងនឹងផែនការមាតុភូមិនិវត្តន៍មិនបានសម្រេចរបស់អតីតប្រធានគណបក្សសង្គ្រោះជាតិគឺលោក សម រង្ស៊ី កាលពីឆ្នាំ ២០១៩ និងចលនាសង្គ្រោះជាតិ។ ពួកគេត្រូវបានចាប់ខ្លួនកាលពីឆ្នាំ ២០២០។

គួរបញ្ជាក់ថា សំណុំរឿងសកម្មជនទាំងនេះ ត្រូវបានតុលាការសាលាឧទ្ធរណ៍បើកសវនាការជំនុំជម្រះ កាលពីថ្ងៃទី ១៦ ខែសីហា ឆ្នាំ ២០២២ ហើយសាលដីកានឹងត្រូវប្រកាសនៅទី ១៣ ខែកញ្ញា ឆ្នាំ ២០២២។ នេះបើតាមក្រុមគ្រួសាររបស់សកម្មជន៕

អត្ថបទទាក់ទង

បម្រាមធ្វើនយោបាយជិតផុតកំណត់ ប៉ុន្តែមន្រ្តីបក្សប្រឆាំងនៅបន្តជាប់បណ្តឹងនៅតុលាការ

លោក សុន ឆ័យ ជំរុញឱ្យមានដំណោះស្រាយនយោបាយសម្រាប់សកម្មជនដែលជាប់ឃុំ

អត្ថបទ​ទាក់ទង

បម្រាម​ធ្វើ​នយោបាយ​ជិត​ផុត​កំណត់ ​ប៉ុន្តែ​មន្រ្តី​បក្ស​ប្រឆាំង​នៅ​បន្ត​ជាប់​បណ្តឹង​នៅ​តុលាការ

លោក ​សុន ឆ័យ ​ជំរុញ​ឱ្យ​មាន​ដំណោះ​ស្រាយ​​នយោបាយ​សម្រាប់​សកម្មជន​ដែល​ជាប់​ឃុំ

អត្ថបទទាក់ទង

បម្រាមធ្វើនយោបាយជិតផុតកំណត់ ប៉ុន្តែមន្រ្តីបក្សប្រឆាំងនៅបន្តជាប់បណ្តឹងនៅតុលាការ

លោក សុន ឆ័យ ជំរុញឱ្យមានដំណោះស្រាយនយោបាយសម្រាប់សកម្មជនដែលជាប់ឃុំ