គណៈកម្មការអឺរ៉ុបបាននិយាយកាលពីថ្ងៃពុធថា សហភាពអឺរ៉ុបនឹងដាក់ពន្ធលើអង្ករពីកម្ពុជានិងមីយ៉ាន់ម៉ាចាប់ផ្តើមនៅថ្ងៃសុក្រដើម្បីការពារទីផ្សារសហភាពអឺរ៉ុប។ ការសម្រេចនេះនឹងចូលជាធរមានរយៈពេល៣ឆ្នាំតាមវិធានការ«ការពារ»កាលពីខែមីនាឆ្នាំមុន បន្ទាប់ពីមានសំណើពីរដ្ឋាភិបាលអ៊ីតាលី។
នៅអឺរ៉ុបស្រូវមានដាំនៅក្នុងប្រទេសចំនួនប្រាំបីនៅអឺរ៉ុបភាគខាងត្បូងពីប្រទេសព័រទុយហ្គាល់ទៅប៊ុលហ្គារី។
គណៈកម្មការដែលត្រួតពិនិត្យគោលនយោបាយពាណិជ្ជកម្មនៅអឺរ៉ុបបានស្នើវិធានការយកពន្ធនេះកាលពីឆ្នាំមុន ប៉ុន្តែមិនទទួលបានសំឡេងគាំទ្រភាគច្រើនទេក្នុងចំណោមរដ្ឋទាំង២៨របស់សហភាពអឺរ៉ុប កាលពីខែធ្នូ។ ដោយសារមិនមានមតិយោបល់ប្រឆាំងពីគណៈកម្មាធិការពាក់ព័ន្ធ គណៈកម្មការដែលត្រួតពិនិត្យគោលនយោបាយពាណិជ្ជកម្មនៅអឺរ៉ុបបានធ្វើការសម្រេចនេះជាចិត្តចុងក្រោយកាលពីថ្ងៃពុធ។
ប្រទេសកម្ពុជានិងភូមាឬមីយ៉ាន់ម៉ាទទួលបានផលប្រយោជន៍ពីកម្មវិធីរបស់សហភាពអឺរ៉ុបឈ្មោះ«អនុគ្រោះពន្ធគយលើទំនិញទាំងអស់ក្រៅពីអាវុធ»ដែលអនុញ្ញាតឱ្យប្រទេសអភិវឌ្ឍន៍តិចតួចបំផុតក្នុងពិភពលោក អាចនាំទំនិញភាគច្រើនទៅលក់នៅទីផ្សារសហភាពអឺរ៉ុបដោយមិនបាច់បង់ពន្ធគយ។ ប៉ុន្តែគណៈកម្មការបាននិយាយថា ការស៊ើបអង្កេតបានបញ្ជាក់ថា ការកើនឡើងយ៉ាងខ្លាំងនៃការនាំអង្ករពីប្រទេសកម្ពុជានិងមីយ៉ាន់ម៉ាបានធ្វើឱ្យប៉ះពាល់កសិករសហភាពអឺរ៉ុប។
ចាប់តាំងពីថ្ងៃទី១៨ខែមករាទៅ សហភាពអឺរ៉ុបកំណត់ពន្ធចំនួន២០០ដុល្លារ សម្រាប់អង្ករមួយតោនក្នុងឆ្នាំទី១ ហើយទម្លាក់ពន្ធមកនៅត្រឹម១៣២ដុល្លារនៅឆ្នាំទី២និងនៅត្រឹម១០៩ដុល្លារនៅឆ្នាំទី៣។ ប្រទេសកម្ពុជានិងមីយ៉ាន់ម៉ាកំពុងប្រឈមការបាត់បង់ការអនុគ្រោះពន្ធសម្រាប់ការនាំទីផ្សារសហភាពអឺរ៉ុបដែលជាទីផ្សារពាណិជ្ជកម្មធំជាងគេក្នុងពិភពលោក ដោយតែមានការរំលោភសិទ្ធិមនុស្ស ប៉ុន្តែទណ្ឌកម្មដែលអាចនឹងកើតមាននេះគឺដាច់ដោយឡែកពីវិធានការការពារទីផ្សារអង្ករអឺរ៉ុប។
គណៈកម្មការបានរកឃើញថា ការនាំអង្ករពីប្រទេសទាំងពីរបានកើនឡើង៨៩% ក្នុងរយៈពេល៥ឆ្នាំ។ អង្ករនាំចូលថោកនេះបានកាត់បន្ថយចំណែកទីផ្សារអង្ករអឺរ៉ុបពី៦១%មកត្រឹម២៩%។ គណៈកម្មការកសិករសហភាពអឺរ៉ុបឈ្មោះ Copa-Cogeca បាននិយាយថាខ្លួនស្វាគមន៍ការសម្រេចចិត្តរបស់គណៈកម្មការកាលពីថ្ងៃពុធ ដោយទទួលស្គាល់ថា វាជាស្ថានការណ៍ដ៏សំខាន់ក្នុងការទប់ស្កាត់៕