អឺរ៉ុបបានចាប់ផ្តើមធ្វើការតាំងទីលំនៅថ្មីដល់ក្រុមជនភៀសខ្លួនដំបូងមកពីប្រទេសក្រិក ទៅកាន់រដ្ឋជាសមាជិកសហភាពអឺរ៉ុបផ្សេងទៀត នៅក្រោមផែនការរបស់ខ្លួនក្នុងការដោះស្រាយវិបត្តិទេសន្តរប្រវេសន៍។ រដ្ឋាភិបាលក្រុងព្រុចសែលចង់ឲ្យជនទេសន្តរប្រវេសន៍រាប់ពាន់នាក់តាំងទីលំនៅឡើងវិញ ប៉ុន្តែមានការប្រឆាំងយ៉ាងខ្លាំងពីរដ្ឋជាសមាជិកដទៃទៀត។
នៅព្រលានយន្តហោះអាថែន (Athens) ដែលជាកន្លែងចាកចេញសម្រាប់ជនភៀសខ្លួនអ៊ីរ៉ាក់និងស៊ីរី៣០នាក់ ត្រូវបានគេជ្រើសរើសក្នុងចំណោមអ្នកទទួលផលដំបូងពីផែនការតាំងទីលំនៅថ្មីរបស់សហភាពអឺរ៉ុបនេះ។
ពួកគេត្រូវបានដឹកតាមយន្តហោះកាលពីថ្ងៃទី៤ ខែវិច្ឆិកា ទៅកាន់ផ្ទះថ្មីរបស់ពួកគេនៅក្នុងប្រទេសលុចសំបួ (Luxembourg) ជៀសវាងពីការធ្វើដំណើរដោយជើងនិងប្រកបដោយគ្រោះថ្នាក់ ដោយឆ្លងកាត់តំបន់បាល់កង់ (Balkans) និងអឺរ៉ុបខាងកើត និងការស្នើសុំសិទ្ធិឆ្លងកាត់ ដែលជារឿយៗអូសបន្លាយដល់ការស្នើសុំសិទ្ធិច្រកកោន។
នៅតាមផ្លូវ ជនភៀសខ្លួនបានសម្តែងការដឹងគុណរបស់ពួកគេ។
ក្នុងចំណោមអ្នកដែលជូនដំណើរពួកគេគឺ ប្រធានសភាសហភាពអឺរ៉ុប លោក Martin Schulz។
លោក Martin Schulz និយាយថា៖ «នៅពេលខ្ញុំឃើញមុខរីករាយ និងមុខរបស់ក្មេងៗដែលមានសំណាង ខ្ញុំគិតថា នេះគឺពិតជាអ្វីដែលយើងត្រូវធ្វើហើយ»។
លោក Schulz បានអំពាវនាវឲ្យសមាជិកសហភាពអឺរ៉ុបទាំងអស់ចូលរួមនៅក្នុងផែនការតាំងទីលំនៅថ្មីនេះ ដែលនឹងជួយជនភៀសខ្លួនចំនួន១៦០.០០០នាក់ ឲ្យបាននៅគ្រប់ប្រទេសក្នុងសហភាពអឺរ៉ុប។ ប៉ុន្តែ មានការប្រឆាំងពីរដ្ឋជាសមាជិកនៅភាគខាងកើតមួយចំនួន ដូចដែលលោក Pawel Swidlicki មកពីក្រុមគោលនយោយបាយ Open Europe ពន្យល់។
លោក Swidlicki និយាយថា៖ «វាមិនមែនជារឿងរបស់លោក Martin Schulz ដែលត្រូវនិយាយថា អ្វីមានបញ្ហា ឬអ្វីគ្មានបញ្ហានោះទេ ពីព្រោះថាវាមិនមែនជារដ្ឋាភិបាលថ្នាក់ជាតិមួយ។ ទោះជាសមាជិកភាគច្រើនយល់ព្រមចំពោះផែនការតាំងទីលំនៅថ្មីនេះ រដ្ឋាភិបាលមួយចំនួនតវ៉ា ហើយមួយចំនួនទៀតបោះឆ្នោតគាំទ្រដោយគ្មានឆន្ទៈ»។
នៅលើកោះរបស់ក្រិក ជនទេសន្តរប្រវេសន៍រាប់ពាន់នាក់ទៀតបន្តទៅទីនោះជារៀងរាល់ថ្ងៃ។ កូដកម្មមួយធ្វើឡើងដោយកម្មករនាវាចម្លង បានបន្សល់ទុកមនុស្សជាច្រើនជាប់នៅត្រើយម្ខាងនៅកោះ Lesbos កាលពីថ្ងៃទី៤ ខែវិច្ឆិកា។ លោក Swidlicki និយាយថា ផែនការថ្មីនេះពិបាកនឹងដោះស្រាយបញ្ហាដែលធំៗជាងនេះ។
លោកនិយាយថា៖ «ជាមួយនឹងជនភៀសខ្លួន៣០នាក់ដែលបានចាកចេញពីប្រទេសក្រិក ទៅប្រទេសលុចសំបួ ឥឡូវនេះវាកើនដល់១១៦នាក់។ ដូច្នេះ នៅមានច្រើនពាន់នាក់ទៀតដែលមិនទាន់ដល់គោលដៅ (ចំនួនសរុប១៦០.០០០នាក់)។ នេះមិនទាន់លើកពីវិបត្តិធំៗជាងនេះផង»។
ប្រទេសក្រិកបាននាំមុខគេក្នុងវិបត្តិមួយនេះ។ នាយករដ្ឋមន្រ្តី Alexis Tsipras បានចេញសេចក្កីព្រមានមួយដល់ដៃគូរបស់សហភាពអឺរ៉ុប។
លោកបាននិយាយថា អឺរ៉ុបមិនគួរជំរុញឲ្យមានការធ្វើដំណើរតាមផ្លូវគោកដែលមិនអាចគ្រប់គ្រងបាន ឬតាមសមុទ្រពីប្រទេសតួកគី ទៅកាន់ផ្នែកដទៃទៀតនៃអឺរ៉ុប ដែលបង្កឲ្យមានហានិភ័យដល់ជីវិតមនុស្សនោះទេ»។
សម្រាប់ជនទេសន្តរប្រវេសន៍ភាគច្រើន ការធ្វើដំណើរដើម្បីស្វែងរកជីវិតថ្មីនៅអឺរ៉ុបគឺពិតជាមានគ្រោះថ្នាក់ខ្លាំងណាស់។ សីតុណ្ហភាពនៅកន្លែងឆ្លងកាត់ប្រទេសក្នុងតំបន់ Balkan ផ្លាស់ប្តូរលឿនខ្លាំងណាស់។ ទីភ្នាក់ងារជំនួយព្រមានថា ជីវិតមនុស្សរាប់ពាន់នឹងជួបប្រទះនូវហានិភ័យក្នុងពេលឆាប់ៗនេះ៕
ប្រែសម្រួលដោយ ប៊ុន ប៉េងហ៊ុយ