ការបិទដំណើរការដោយសារការរាតត្បាតនៃវីរុសកូរ៉ូណានៅបណ្តាប្រទេសជាច្រើនក្នុងទ្វីបអឺរ៉ុបបានធ្វើឲ្យមានការបំពុលបរិស្ថានតិចជាងមុន។ ក៏ប៉ុន្តែការសម្រេចចិត្តខាងគោលនយោបាយក្នុងប៉ុន្មានខែខាងមុខនេះ នឹងបង្ហាញឲ្យឃើញច្បាស់ថា តើការស្តារសេដ្ឋកិច្ចឡើងវិញនឹងជួយ ឬធ្វើឲ្យប៉ះពាល់ដល់បរិស្ថាន។
ទីក្រុងនានានៅទី្វបអឺរ៉ុបដែលនៅតាមដងផ្លូវជាធម្មតាតែងតែកកស្ទះនោះ ឥឡូវនេះ មានភាពស្ងាត់ជ្រងំដោយសារប្រជាពលរដ្ឋត្រូវបានបង្ខំឲ្យស្ថិតនៅផ្ទះដោយសារតែមានការរាតត្បាតដោយវីរុសកូរ៉ណា ដែលបង្កទៅជាជំងឺកូវីដ១៩។
លោក Alberto Gonzalez Ortiz គឺជាអ្នកជំនាញខាងគុណភាពខ្យល់នៅទីភ្នាក់ងារបរិស្ថានអឺរ៉ុប European Environment Agency។ លោកនិយាយថា ការបំពុលបរិស្ថានបានចុះថយ ចាប់តាំងពីការបិទដំណើរការត្រូវបានអនុវត្តនៅក្នុងទីក្រុងនានានៅទូទាំងទ្វីបអឺរ៉ុបនេះ។ លោក Ortiz បានថ្លែងក្នុងសម្តីដើមថា៖
«នៅក្នុងទីក្រុងខ្លះ ពីមួយសប្តាហ៍ទៅមួយសប្តាហ៍ យើងឃើញថា ការប្រមូលផ្តុំគ្នា ត្រូវបានកាត់បន្ថយជាងពាក់កណ្តាល។ ការកាត់បន្ថយនេះ គឺមិនដូចគ្នានៅក្នុងទីក្រុងទាំងអស់ទេ ដោយសារតែវិធានការបិទដំណើរការមិនដូចគ្នា ឬមិនខ្លាំងក្លាពេកនៅក្នុងប្រទេសទាំងអស់ ហើយពួកគេ បានចាប់ផ្តើមនៅពេលខុសៗគ្នា»។
បើតាមកំណត់ត្រានៅឆ្នាំ ២០១៩ ជាឆ្នាំដែលក្តៅបំផុតនៅអឺរ៉ុប។ ក៏ប៉ុន្តែ ក្នុងពេលឥឡូវនេះ មានមនុស្សរាប់លាននាក់ត្រូវបង្ខំចិត្តនៅផ្ទះ ដូច្នេះការប្រើប្រាស់ និងការធ្វើដំណើរមានតិចជាងមុន ដែលធ្វើឲ្យការបំភាយឧស្ម័នកាបូន និងខ្យល់ពុលបានថយចុះ។
ក៏ប៉ុន្តែ បណ្តាប្រទេសនៅអឺរ៉ុបចង់បន្ធូរបន្ថយការរឹតបន្តឹងនេះបន្តិចម្តងៗ ដើម្បីធ្វើឲ្យសេដ្ឋកិច្ចមានដំណើរការឡើងវិញ។ មនុស្សមួយចំនួនព្រួយបារម្ភអំពីការឆាប់វិលត្រឡប់ទៅរកជីវភាពធម្មតាដូចនៅមុនការរាតត្បាតដោយជំងឺកូវីដ១៩ ពីព្រោះថា វាអាចធ្វើឲ្យបាត់បង់ទៅវិញនូវបរិស្ថានដែលកំពុងតែមានភាពប្រសើរឡើងនេះ។
អ្នកស្រី Imke Lübbekeនៃអង្គការមូលនិធិសត្វព្រៃពិភពលោក (WWF) បាននិយាយថា មិនទាន់មានហេតុផលណាមួយដែលត្រូវរីករាយនឹងការទទួលបានបរិស្ថានដែលល្អជាងមុននេះនៅឡើយទេ។ អ្នកស្រី Lübbeke បានថ្លែងក្នុងសម្តីដើមថា៖
«ទាំងនេះ គឺជាលទ្ធផលបណ្តោះអាសន្ន ដែលបានមកពីការបិទដំណើរការផ្នែកខ្លះនៅក្នុងប្រទេស និងទីក្រុងជាច្រើន ដើម្បីទប់ស្កាត់ការរាតត្បាតនៃជំងឺកូវីដ១៩។ វាមិនមែនជាការកាត់បន្ថយការសាយភាយឧស្ម័នទៅតាមរចនាសម្ព័ន្ធ ឬ តាមវិធីលុបបំបាត់ការបំពុលបរិស្ថាននោះទេ។ យើងកំពុងខិតខំធ្វើឲ្យទាំងអស់គ្នាយល់ច្បាស់ថា វិបត្តិបម្រែបម្រួលអាកាសធាតុ និងវិបត្តិបរិស្ថានទាំងអស់ នឹងមិនបាត់ទៅណាទេ ក្រោយពេលដែលយើងដោះស្រាយវិបត្តិជំងឺកូវីដ១៩ហើយនោះ»។
មេដឹកនាំសហគមន៍អ៊ឺរ៉ុប កំពុងពិភាក្សាអំពីកញ្ចប់ថវិកាស្តារសេដ្ឋកិច្ចឡើងវិញ ដែលអ្នកខ្លះនិយាយថា នឹងត្រូវចំណាយប្រហែល ២លានលានដុល្លារ។ ហើយរដ្ឋាភិបាលបានសន្យាផ្តល់ប្រាក់រាប់ពាន់លានដុល្លារ ដល់អាជីវកម្មនានា រួមទាំងឧស្សាហកម្មដែលបំពុលបរិស្ថានផងដែរ។
លោក Wendel Trio នាយកបណ្តាញសកម្មភាពទាក់ទងនឹងអាកាសធាតុអឺរ៉ុប Climate Action Network Europe ថ្លែងថា នេះ គឺជាពេលមួយនៅក្នុងប្រវត្តិសាស្ត្រ ដែលរដ្ឋាភិបាលនានា មានឱកាសក្នុងការសម្រេចថា តើពួកគេចង់ដឹកនាំការស្តារសេដ្ឋកិច្ចឡើងវិញ នៅក្នុងទិសដៅមួយដែលធ្វើឲ្យកំណើនវិជ្ជមានផ្នែកបរិស្ថានក្នុងពេលបច្ចុប្បន្ននេះ មាននិរន្តរភាព ឬ យ៉ាងណា។ លោក Trio បានថ្លែងក្នុងសម្តីដើមថា៖
«ជាឧទាហរណ៍ ទាំងក្រុមហ៊ុនផលិតរថយន្តនិងក្រុមហ៊ុនអាកាសចរណ៍ មានភាពស្ទាក់ស្ទើរក្នុងការទទួលយកការផ្លាស់ប្តូរដែលចាំបាច់ត្រូវគិតគូរដល់បរិស្ថាននៅក្នុងសង្គម។ ហើយខ្ញុំគិតថា ដល់ពេលដែលត្រូវបញ្ជាក់ឲ្យក្រុមហ៊ុនទាំងនោះយល់ច្បាស់ហើយ។ ប្រសិនបើពួកគេចង់បានប្រាក់ពីសាធារណៈជន ប្រសិនបើពួកគេចង់ឲ្យប្រាក់ដែលបានមកពីការបង់ពន្ធ ជួយដល់អនាគតរបស់ពួកគេនោះ ដូច្នេះ នៅក្នុងផែនការអនាគតរបស់ពួកគេ ក៏គួរតែរាប់បញ្ចូលការផ្តល់ផលប្រយោជន៍ដល់សង្គមវិញផងដែរ»។
មានការភ័យខ្លាចក្នុងចំណោមក្រុមអ្នកតស៊ូមតិខាងអាកាសធាតុមួយចំនួន ដែលថា ការងើបឡើងវិញនៃសេដ្ឋកិច្ចនឹងត្រូវបានផ្តល់តម្លៃខ្ពស់ជាងការដោះស្រាយបញ្ហាប្រែប្រួលអាកាសធាតុ។
ក្រុមហ៊ុន BusinessEurope ដែលជាក្រុមហ៊ុនធ្វើការបញ្ចុះបញ្ចូលអ្នកតាក់តែងច្បាប់ដ៏ធំមួយ បានសរសេរទៅសហភាពអឺរ៉ុបរួចទៅហើយ ដោយស្នើសុំការពន្យាពេលក្នុងការអនុម័តបទប្បញ្ញត្តិទាក់ទងនឹងអាកាសធាតុ។
សុន្ទរកថាស្តីពីអាកាសធាតុរបស់អធិការបតីអាល្លឺម៉ង់អ្នកស្រី Angela Merkel កាលពីថ្ងៃច័ន្ទ ទី២៧ មេសា កន្លងទៅនេះ បង្ហាញពីអ្វីដែលប្រទេសអាល្លឺម៉ង់ ដែលជាសមាជិកមានឥទ្ធិពលបំផុតរបស់សហភាពអឺរ៉ុបនឹងជំរុញឲ្យកើតមានឡើង នៅពេលនិយាយអំពីតុល្យភាពរវាងបញ្ហាបរិស្ថាន និងសេដ្ឋកិច្ចដែលកំពុងងើបឡើងវិញ៕
ប្រែសម្រួលដោយអ្នកស្រី លី ម៉ូរីវ៉ាន់