នាយករដ្ឋមន្ត្រីកម្ពុជាលោក ហ៊ុន សែន ដែលកំពុងដឹកនាំគណៈប្រតិភូរដ្ឋាភិបាលកម្ពុជាចូលរួមកិច្ចប្រជុំកំពូលពិសេសអាមេរិក-អាស៊ាន នៅរដ្ឋធានីវ៉ាស៊ីនតោនបានថ្លែងការពារថា រដ្ឋាភិបាលក្រុងភ្នំពេញប្រកាន់យកគោលនយោបាយការបរទេសអព្យាក្រឹតជាអចិន្ត្រៃយ៍ ពោលគឺកម្ពុជាមិនអាចចាប់យកប្រទេសណាមួយជាមិត្ត ដើម្បីទៅប្រឆាំងប្រទេសមួយផ្សេងទៀតទេ។
លោក ហ៊ុន សែន បានថ្លែងបែបនេះនៅក្នុងជំនួបមួយជាមួយប្រជាពលរដ្ឋខ្មែររស់នៅក្នុងសហរដ្ឋអាមេរិក និងកាណាដា ដោយមានវត្តមានរដ្ឋមន្ត្រីសំខាន់ៗរបស់កម្ពុជាមួយចំនួន រួមមានរដ្ឋមន្ត្រីការបរទេសលោក ប្រាក់ សុខុនរដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្តិ និងរដ្ឋមន្ត្រីក្រសួងសាធារណការនិងដឹកជញ្ជូនលោក ស៊ុន ចាន់ថុល។
ថ្លែងក្នុងជំនួបនោះ លោកនាយករដ្ឋមន្ត្រី ហ៊ុន សែន បញ្ជាក់សាជាថ្មីថា រដ្ឋធម្មនុញ្ញរបស់កម្ពុជាគឺប្រកាន់ជំហរអព្យាក្រឹត ហើយនេះក៏ជាបញ្ហាដែលកម្ពុជាកំពុងតែប្រឈមដែរ ខណៈមានការរិះគន់ថាកម្ពុជាកំពុងមានការផ្តេកផ្តួលខ្លាំងទៅលើរដ្ឋាភិបាលក្រុងប៉េកាំង។
លោក ហ៊ុន សែន លើកឡើងយ៉ាងដូច្នេះ៖«ក្នុងរដ្ឋធម្មនុញ្ញរបស់យើង តម្រូវការរបស់យើងគឺបញ្ហាពាក់ព័ន្ធជាមួយអព្យាក្រឹតភាពអចិន្ត្រៃយ៍របស់យើង។ យើងអត់ត្រូវការជ្រើសរើសរវាងចិននិងសហរដ្ឋអាមេរិក។ យើងអត់ត្រូវការជ្រើសរើសទេ ទោះបីជាអ្នកឯងបង្ខំខ្ញុំឱ្យជ្រើសរើសមួយក៏ខ្ញុំអត់ជ្រើសរើសដែរ»។
លោកបន្ថែមថា៖«យើងអត់ត្រូវការជ្រើសរើសវៀតណាមទៅប្រឆាំងថៃ ទៅជ្រើសរើសវៀតណាមប្រឆាំងថៃ ទៅជ្រើសរើសវៀតណាមប្រឆាំងចិន ទៅជ្រើសរើសចិនប្រឆាំងវៀតណាម គឺយើងអត់ជ្រើសរើស»។
លោក ហ៊ុន សែន កំពុងត្រៀមចូលរួមក្នុងកិច្ចប្រជុំកំពូលពិសេសអាមេរិក-អាស៊ាន នៅថ្ងៃទី១២–១៣ ខែឧសភាក្នុងឋាន:ជាប្រធានអាស៊ានប្តូរវេនដែលលោកប្រធានាធិបតី អាមេរិក Joe Biden បានអញ្ជើញនិងត្រៀមទទួលស្វាគមន៍លោក ក៏ដូចជាមេដឹកនាំអាស៊ានផ្សេងទៀត។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា បានប្រាប់វីអូអេនៅថ្ងៃព្រហស្បតិ៍នេះថា តាមទ្រឹស្តី លោកនាយករដ្ឋមន្ត្រីការពារកម្ពុជាថា បានប្រកាន់យកគោលនយោបាយការបរទេសអព្យាក្រឹតដោយមិនជ្រើសរើសមហាអំណាចណាមួយទៅប្រឆាំងនឹងមហាអំណាចមួយទៀត។ ក៏ប៉ុន្តែឥរិយាបថរបស់កម្ពុជានៅពុំទាន់ផ្តល់ទំនុកចិត្តដល់ប្រទេសលោកខាងលិចឬក៏សហរដ្ឋអាមេរិកនោះទេ។
លោកថ្លែងថា៖«ជំហរអាព្យាក្រឹតជាការត្រឹមត្រូវហើយ ប៉ុន្តែគ្រាន់តែឥរិយាបថនយោបាយកន្លងមកពុំទាន់ឆ្លុះបញ្ចាំងឱ្យភាគីដូចជាសហរដ្ឋអាមេរិកហ្នឹងជឿទុកចិត្តទេ។ អ៊ីចឹងបានមានភាពប្រទាញប្រទង់ឬការលើកឡើងកន្លងមកហ្នឹងនៅខ្វែងទស្សនៈគំនិតគ្នា»។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាលោក គិន ភា យល់ថា ទំនាក់ទំនងរវាងប្រទេសអាមេរិកនិងកម្ពុជា គឺជាទំនាក់ទំនងដែលពេលខ្លះមានភាពស្និទ្ធស្នាល និងពេលខ្លះទៀតប្រឈមភាពរកាំរកូស។
លោកនិយាយថា៖«ប៉ុន្តែបើសិនជាយើងនិយាយពីដំណើរនៃទំនាក់ទំនងនេះ ក្នុងពេលចុងក្រោយយើងឃើញហាក់ដូចជាមានការវិវឌ្ឍជាវិជ្ជមាននៅក្នុងទំនាក់ទំនងរវាងប្រទេសទាំងពីរ។ ក៏ប៉ុន្តែប្រទេសទាំងពីរចាំបាច់ត្រូវតែយកចំណុចដែលមិនយល់គ្នាឬក៏មានការយល់ច្រឡំនឹងគ្នាហ្នឹង ព្យាយាមធ្វើឱ្យវាមានការយល់គ្នាវិញ មានន័យថាយើងព្យាយាមបំព្រួញគម្លាតនៃទំនុកចិត្ត ដែលយើងមិនយល់គ្នាឱ្យយល់គ្នា»។
កម្ពុជានិងសហរដ្ឋអាមេរិកកំពុងបន្តមិនមានការយល់គ្នាច្បាស់ពីបញ្ហាមួយចំនួន ក្នុងនោះគឺលទ្ធភាពដែលកម្ពុជាអាចអនុញ្ញាតឱ្យមានវត្តមានកងទ័ពចិនក្នុងមូលដ្ឋានកងទ័ពជើងទឹករាមរបស់កម្ពុជា បើទោះបីរដ្ឋាភិបាលក្រុងភ្នំពេញផ្តល់ការពន្យល់ជាញឹកញាប់ថា មូលដ្ឋានកងទ័ពជើងទឹករាមនោះមិនអាចប្រែក្លាយជាការតាំងទីរបស់កងទ័ពចិននោះក៏ដោយ។
នាពេលថ្មីៗនេះ អនុរដ្ឋមន្ត្រីការបរទេសសហរដ្ឋអាមេរិកអ្នកស្រី Wendy Sherman បានលើកឡើងពីក្តីបារម្ភសាជាថ្មីម្តងទៀតអំពីវត្តមាននៃកងទ័ពចិន និងការសាងសង់សំណង់អគារជាច្រើននៅមូលដ្ឋានកងទ័ពជើងទឹករាម ក៏ដូចជាផលប៉ះពាល់មកលើសន្តិសុខតំបន់។ នេះបើតាមសេចក្តីប្រកាសព័ត៌មានរបស់ក្រសួងការបរទេសសហរដ្ឋអាមេរិកចេញផ្សាយកាលពីថ្ងៃទី១១ ខែឧសភា ក្រោយជំនួបរបស់អ្នកស្រី Wendy Sherman និងរដ្ឋមន្ត្រីការបរទេសកម្ពុជាលោកប្រាក់ សុខុន ក្នុងរដ្ឋធានីវ៉ាស៊ីនតោន។
អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន ប្រាប់វីអូអេនៅថ្ងៃព្រហស្បតិ៍ថា ជាគោលការណ៍ គោលនយោបាយការបរទេសកម្ពុជាគឺប្រកាន់យកជំហរកណ្តាល និងសន្តិសហវិជ្ជមាន។ លោកបញ្ជាក់ថាឥរិយាបថរបស់កម្ពុជាដែលធ្វើទៅលើចិនគឺដូចអ្វីដែលកម្ពុជាធ្វើទៅលើអាមេរិកដែរ។ នេះមានន័យថា កម្ពុជាមិនបង្ហាញជំហរលម្អៀងទៅកាន់ភាគីណាមួយនោះទេ ក្នុងទំនាក់ទំនងការបរទេសរបស់ខ្លួនទេ៕