ទំនប់វារីអគ្គិសនីដនសាហុងនៅក្នុងប្រទេសឡាវបានចាប់ផ្តើមដំណើរការហើយ ហើយនៅសប្តាហ៍នេះបានភ្ជាប់បណ្តាញអគ្គិសនីទៅប្រទេសកម្ពុជានៅពេលដែលប្រទេសនេះបង្កើនការនាំចូលអគ្គិសនីបន្ទាប់ពីមានការដាច់ភ្លើងកាលពីឆ្នាំមុន។ នេះបើយោងតាមមន្ត្រីកម្ពុជា។
ទំនប់ដនសាហុងដែលត្រូវបានសាងសង់ដើម្បីផលិតអគ្គិសនីកម្លាំង២៦០មេហ្គាវ៉ាត់គឺជាទំនប់ទី២ដែលចាប់ផ្តើមប្រតិបត្តិការនៅលើដងទន្លេមេគង្គក្រោមរយៈពេលប្រាំមួយខែ បន្ទាប់ពីមានការប្រឆាំងជាច្រើនឆ្នាំពីសកម្មជនបរិស្ថាន។ ទំនប់វារីអគ្គិសនីសាយ៉ាបូរីដែលមានកម្លាំង១២៨៥ មេហ្គាវ៉ាត់នៅប្រទេសឡាវបានចាប់ផ្តើមផ្គត់ផ្គង់ថាមពលដល់ប្រទេសថៃកាលពីខែតុលា។
លោក Victor Jona អគ្គនាយកថាមពលនៅក្រសួងរ៉ែនិងថាមពលបានប្រាប់ទីភ្នាក់ងារព័ត៌មានរ៉យទ័រថា ការតភ្ជាប់នេះធ្វើកាលពីថ្ងៃអង្គារ។ លោកបានមានប្រសាសន៍ថា៖
«ទំនប់ដនសាហុងមានសមត្ថភាពផលិតថាមពល១៩៥មេហ្កាវ៉ាត់ ហើយក្រុមហ៊ុនអគ្គិសនីកម្ពុជានឹងទិញថាមពលនេះទាំងអស់»។
លោកបានបន្ថែមទៀតថា កម្លាំងថាមពលពេញគឺមាននៅរដូវវស្សាប្រចាំឆ្នាំដែលចាប់ផ្តើមពីខែមេសា ហើយនៅរដូវប្រាំងបច្ចុប្បន្នកម្លាំងផលិតមានតិចជាង។
ទឹកទន្លេមេគង្គក្រោមបានជួបប្រទះគ្រោះរាំងស្ងួតកាលពីឆ្នាំមុន ហើយផ្នែកជាច្រើននៅតាមដងទន្លេមេគង្គមានកម្ពស់ទឹកទាបជាងកម្រិតទឹកធម្មតានៅរដូវប្រាំង។
លោក Victor Jona បាននិយាយថា តម្លៃអគ្គីសនីប្រទេសកម្ពុជាទិញពីទំនប់វារីអគ្គិសនីដនសាហុងដែលនៅចម្ងាយប្រហែល២គីឡូម៉ែត្រពីព្រំដែនខាងជើងក្នុងប្រទេសឡាវគឺជាង៧សេនដុល្លារក្នុងមួយគីឡូវ៉ាត់។
លោកបានបន្ថែមថា កិច្ចព្រមព្រៀងនេះនឹងមានរយៈពេល៣០ឆ្នាំ។
លោកបានមានប្រសាសន៍ថា៖
«យើងទិញអគ្គិសនីនេះដើម្បីផ្គត់ផ្គង់តម្រូវការរបស់យើងដែលកើនឡើងពីមួយឆ្នាំទៅមួយឆ្នាំចន្លោះពី១៨%ទៅ២០%»។
ប្រទេសកម្ពុជាកាលពីឆ្នាំមុនមានការដាច់ចរន្តអគ្គិសនីដ៏អាក្រក់បំផុតក្នុងរយៈពេលប៉ុន្មានឆ្នាំព្រោះមានការប្រើប្រាស់អគ្គិសនីកើនឡើងដោយសារផ្នែកសំណង់ហើយនឹងការវិនិយោគរបស់ចិន។ ក្រុមមន្រ្តីបាននិយាយថា កង្វះអគ្គិសនីក៏បណ្តាលមកពីទឹកមានកម្រិតទាបនៅទំនប់វារីអគ្គិសនីនៅទូទាំងប្រទេស។ ក្រុមហ៊ុនអគ្គិសនីកម្ពុជាបានឱ្យដឹងថា ប្រទេសកម្ពុជាប្រើប្រាស់ថាមពលវារីអគ្គិសនីប្រហែល៤៨%នៃផលិតកម្មអគ្គិសនីក្នុងស្រុក។
ស្ថិតិការប្រើប្រាស់អគ្គិសនីរបស់រដ្ឋបានឱ្យដឹងថា ដោយសារតម្រូវការកើនឡើងយ៉ាងឆាប់រហ័ស ក្នុងប្រទេស ប្រទេសកម្ពុជាបានទិញអគ្គិសនីប្រហែល២៥%នៃការផ្គត់ផ្គង់អគ្គិសនីរបស់ខ្លួនកាលពីឆ្នាំមុនដោយភាគច្រើនទិញពីប្រទេសវៀតណាមនិងថៃ៕