បន្ទាប់ពីបានមើលឃើញបេក្ខជនខាងគណបក្សសាធារណរដ្ឋពិភាក្សាដេញដោលគ្នាចំនួនពីរជុំមក បេក្ខជនខាងគណបក្សប្រជាធិបតេយ្យ ដែលមានបំណងក្លាយជាប្រធានាធិបតីបន្ទាប់របស់សហរដ្ឋអាមេរិកមានឱកាសពិភាក្សាម្តងនៅថ្ងៃអង្គារនេះនៅឯវេទិកាក្នុងទីក្រុងឡាស់ វេហ្កាស Las Vegas ដែលនេះជាការពិភាក្សាដេញដោលលើកទីមួយសម្រាប់យុទ្ធនាការបោះឆ្នោតឆ្នាំ២០១៦។
លោកស្រីហ៊ីលឡារី គ្លីនតុន អតីតរដ្ឋមន្ត្រីការបរទេស និងជាអ្នកនាំមុខនៅក្នុងការប្រកួតរបស់ក្រុមអ្នកប្រជាធិបតេយ្យនឹងស្ថិតនៅកណ្តាលនៃការពិភាក្សាទាំងទីតាំងដែលត្រូវឈរជាមួយនឹងបេក្ខជនបួននាក់ទៀត និងខ្លឹមសារដែលត្រូវយកមកពិភាក្សា។
ការស្ទាបស្ទង់មតិថ្មីៗនេះបានឃើញថា លោកស្រីគ្លីនតុននាំមុខគេដោយទទួលបានការគាំទ្រប្រហែល៤០ភាគរយ ក្នុងខណៈពេលដែលអ្នកប្រកួតប្រជែងធំរបស់លោកស្រីគឺលោកប៊ឺនី សេនឌឺរ សមាជិកព្រឹទ្ធសភារដ្ឋVermont ទទួលបាន២៥ភាគរយ។
ផ្ទុយគ្នានឹងការប្រកួតប្រជែងនៅក្នុងគណបក្សសាធារណរដ្ឋ ក្រុមអ្នកប្រជាធិបតេយ្យបានចំណាយពេលតិចតួចដើម្បីនិយាយរិះគន់គ្នា ដែលនឹងធ្វើឲ្យការពិភាក្សាដេញដោលនៅថ្ងៃអង្គារនេះគឺជា វេទិកាដ៏ ទាក់ទាញសម្រាប់អ្នកចង់ដឹងពីគោលនយោបាយរបស់ពួកគេ និងប្រវត្តិការងារដើម្បីយកមកប្រៀបធៀបគ្នា។
ទំហំនៃអ្នកចូលមកប្រកួតក៏មានការខុសប្លែកគ្នាដែរ ដោយមានលោកស្រីគ្លីនតុន និងលោកសែនឌ័រ ចូលរួមដោយលោកម៉ាទីន អ៊ូមាលី អតីតអភិបាលរដ្ឋMaryland លោកជីម វិប អតីតសមាជិកព្រឹទ្ធសភារដ្ឋVirginia និងលោកលីនខុន ឆាហ្វី អតីតសមាជិកព្រឹទ្ធសភាប្រចាំ រដ្ឋ Rhode Island។ បេក្ខជនបីនាក់ចុងក្រោយនេះតស៊ូយ៉ាងត្រដាបត្រដួស ហើយមិនទទួលបានការគាំទ្រមួយភាគរយផង៕