ប្រព័ន្ធផ្សព្វផ្សាយព័ត៌មានរដ្ឋចិន បាននិយាយថា មនុស្ស៥៣នាក់បានស្លាប់ នៅក្នុងការរលំអគារមួយ កាលពីមួយសប្តាហ៍មុន នៅភាគកណ្តាលប្រទេសចិន។ មនុស្ស១០នាក់ត្រូវបានជួយសង្គ្រោះ។ អាជ្ញាធរចិនបាននិយាយនៅថ្ងៃសុក្រនេះថា ការរុករកត្រូវបានបញ្ចប់ បន្ទាប់ពីអ្នកដែលបានបាត់ខ្លួនទាំងអស់ ត្រូវបានរកឃើញអស់ហើយ។
ជនរងគ្រោះដែលនៅរស់ចុងក្រោយគេ ត្រូវបានគេជួយសង្គ្រោះកាលពីព្រឹកថ្ងៃព្រហស្បតិ៍ គឺប្រាំថ្ងៃបន្ទាប់ពីអគារលំនៅដ្ឋាននិងជាអគារពាណិជ្ជកម្មមួយនៅក្នុងទីក្រុង Changsha បានបាក់រលំភ្លាមៗកាលពីថ្ងៃទី២៩ ខែមេសាកន្លងទៅ។ មនុស្សយ៉ាងហោចណាស់៩នាក់ ត្រូវបានចាប់ខ្លួនពាក់ព័ន្ធនឹងការរលំនៃអគារនេះ ពីបទសង្ស័យថា មិនយកចិត្តទុកដាក់លើច្បាប់សាងសង់ ឬប្រព្រឹត្តអំពើបំពានផ្សេងទៀត។ អ្នកនៅរស់ទាំងអស់ ត្រូវបានរាយការណ៍មកថា មានសុខភាពប្រសើរ បន្ទាប់ពីសម្រាកព្យាបាល ក្នុងមន្ទីរពេទ្យមក។
ការកើនឡើងនៃការដួលរលំអគារក្នុងប្រទេសចិន ក្នុងរយៈពេលប៉ុន្មានឆ្នាំថ្មីៗនេះ បានធ្វើឱ្យប្រធានាធិបតីចិន លោក Xi Jinping អំពាវនាវឲ្យមានការត្រួតពិនិត្យបន្ថែមដើម្បីរកមើលភាពទន់ខ្សោយនៃការសាងសង់អគារ។
ការមិនយកចិត្តទុកដាក់ទៅលើស្តង់ដា នៃសុវត្ថិភាពសំណង់ ដែលក្នុងនោះរួមមានទាំងការបន្ថែមការសាងសង់ជាន់បន្ថែមដោយខុសច្បាប់ និងការមិនបានប្រើប្រាស់របាដែកពង្រឹងឱ្យបានត្រឹមត្រូវតែងតែជាការស្តីបន្ទោសថាជាបុព្វហេតុនៅក្នុងការបាក់រលំទាំងនោះ។ ប្រព័ន្ធហេដ្ឋារចនាសម្ព័ន្ធពុកផុយ ដូចជាបំពង់ប្រេងឬឧស្ម័ន ក៏បានបណ្តាលឲ្យមានការផ្ទុះឆេះនិងការដួលរលំអគារផងដែរ៕
មនុស្ស៥៣ស្លាប់នៅក្នុងការបាក់រលំអគារមួយក្នុងប្រទេសចិន ហើយការរុករកអ្នកនៅរស់ក្រោមអគារនោះបានបញ្ចប់
រូបថតផ្សាយដោយទីភ្នាក់ងារព័ត៌មាន Xinhua របស់រដ្ឋចិននេះ បង្ហាញ ក្រុមអ្នកជួយសង្គ្រោះ កាលពីថ្ងៃទី៥ ខែឧសភា ឆ្នាំ២០២២ យកអ្នកនៅរស់រានទី១០ចេញពីគំនរនៃអគារដែលបានបាក់រលំនៅខេត្ត Changsha ប្រទេសចិន។