ប៉ូលិសនៅក្នុងទីក្រុង Barcelona និយាយថា ពួកគេបានចាប់ខ្លួនបុរសម្នាក់ដែលពាក់ព័ន្ធនឹងការវាយប្រហារភេរវកម្មមួយកាលពីថ្ងៃព្រហស្បតិ៍ ដែលមានមនុស្សម្នាក់បានបើករថយន្តដឹកទំនិញធុនតូចមួយគ្រឿងឡើងលើចិញ្ចើមផ្លូវដ៏មមាញឹកមួយនិងបានបុកមនុស្សរាប់សិបនាក់។ ហេតុការណ៍នោះបានបណ្តាលឲ្យមនុស្ស១៣នាក់ស្លាប់ហើយមនុស្សរាប់សិបនាក់ទៀតរងរបួស។
ប៉ូលិសអេស៉្បាញម្នាក់បានសរសេរសារមួយលើបណ្តាញសង្គម Twitter ថា «យើងចាប់បានបុរសម្នាក់ហើយយើងកំពុងតែចាត់ទុករឿងនេះជាការវាយប្រហារភេរវកម្ម»។
លោក Joaquim Forn ស្នងការប៉ូលិសនៃតំបន់ Catalonia បានបង្ហោះសារមួយលើបណ្តាញសង្គម Twitter ដោយបញ្ជាក់ថា «មនុស្ស១៣នាក់បានស្លាប់ហើយមនុស្សជាង៥០នាក់បានរងរបួស»។
កាលពីមុននេះ ប្រព័ន្ធផ្សព្វផ្សាយបានរាយការណ៍ថា បុរសពីរនាក់ដែលប្រដាប់ដោយអាវុធបានប្រើរបាំងការពារខ្លួននៅក្នុងកន្លែងផឹកស្រាមួយនៅជិតនោះ ក្រោយពីការវាយប្រហារនេះ ប៉ុន្តែប៉ូលិសបានបញ្ជាក់ថា គ្មាននរណាម្នាក់ចោះរូងនៅកន្លែងផឹកស្រានោះទេ។
កាសែត El Periodico អេស៉្បាញបានរាយការណ៍ថា មានឭស្នូរកាំភ្លើងនៅម្តុំផ្សារ La Boqueria ថ្វីដ្បិតតែកាសែតនេះមិនបានស្រង់ប្រភពព័ត៌មាននោះទេ។
កាសែត El Pais រាយការណ៍ថា អ្នកបើករថយន្តនោះបានរត់គេចខ្លួនដោយជើងទទេ បន្ទាប់ពីរត់ទៅផ្លូវថ្មើរជើង។ ប៉ុន្តែគេនៅមិនទាន់ច្បាស់ភ្លាមៗនៅឡើយទេ ថាខ្មាន់កាំភ្លើងនោះគឺជាអ្នកបើកបររថយន្តដឹកទំនិញធុនតូចនោះ។
ប៉ូលិសនៅកន្លែងកើតហេតុបានប្រាប់ដល់មនុស្សម្នាឲ្យចាកចេញពីកន្លែងកើតហេតុ ខណៈដែលពួកគេកំពុងតែដោះស្រាយករណីវាយប្រហារភេរវកម្ម៕