មន្ត្រីជាន់ខ្ពស់គណបក្សកាន់អំណាចនៅថ្ងៃចន្ទនេះលើកឡើងថា តួលេខនៃលទ្ធផលបោះឆ្នោតបឋមបង្ហាញថា មិនមានគណបក្សនយោបាយណាមួយអាចទទួលបានអាសនៈរដ្ឋសភា ក្នុងការបោះឆ្នោតជ្រើសតាំងតំណាងរាស្រ្តអាណត្តិទី៦ក្រៅពីគណបក្សប្រជាជនកម្ពុជានោះទេ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាប្រាប់ VOA នារសៀលថ្ងៃចន្ទនេះថា បើយោងតាមតួលេខនៃលទ្ធផលបោះឆ្នោតបឋម ដែលចេញដោយគណៈកម្មាធិការជាតិរៀបចំការបោះឆ្នោត (គ.ជ.ប.) បង្ហាញថា គណបក្សប្រជាជនកម្ពុជានឹងទទួលបានអាសនៈសភាច្រើនលើសលុប។
លោក សុខ ឥសាន បន្ថែមថា មិនមានគណបក្សនយោបាយណាមួយអាចនឹងទទួលបានកៅអីក្នុងរដ្ឋសភាឡើយ តែលោកមិនបញ្ជាក់ថា គណបក្សប្រជាជនកម្ពុជានឹងទទួលបានទាំង១២៥អាសនៈ ឬយ៉ាងណានោះទេ។
ឆ្លើយតបនឹងសំណួររបស់ VOA លោក សុខ ឥសាន បញ្ជាក់ថា៖
«យើងអត់មានកំណត់តួលេខបានទេ ក្នុងខណៈដែល គ.ជ.ប. មិនទាន់បូកសរុបលទ្ធផលហើយបែកចែកទៅតាមរូបមន្តដែលកំណត់ក្នុងច្បាប់។ តែយើងគ្រាន់តែដឹងថាគណបក្សនីមួយៗទទួលបានសំឡេងឆ្នោតរួចហើយតាមរយៈការទទួលសំឡេងឆ្នោតនេះទើបយើងអាចប៉ាន់ស្មានបាន តែមិនអាចចង្អុលតួលេខណាមួយជាក់លាក់បានទេ ពីព្រោះវាជាការល្មើសច្បាប់»។
កម្ពុជាបានបញ្ចប់ការបោះឆ្នោតជ្រើសតាំងតំណាងរាស្រ្តអាណត្តិទី៦ កាលពីថ្ងៃអាទិត្យម្សិលមិញ ដោយត្រូវបានគេរំពឹងទុកជាមុនរួចទៅហើយថា គណបក្សកាន់អំណាចរបស់លោកនាយករដ្ឋមន្រ្តី ហ៊ុន សែន នឹងទទួលបានអាសនៈរដ្ឋសភាភ្លូកទឹកភ្លូកដី បន្ទាប់ពីគណបក្សប្រឆាំងធំបំផុតត្រូវបានតុលាការរំលាយ។
អ្នកបោះឆ្នោតម្នាក់រកមើលឈ្មោះរបស់ខ្លួននៅក្នុងបញ្ជី មុននឹងចូលទៅបោះឆ្នោត ក្នុងមណ្ឌលបោះឆ្នោតមួយ នៅខណ្ឌសែនសុខ រាជធានីភ្នំពេញ កាលពីថ្ងៃទី២៩ ខែកក្កដា ឆ្នាំ២០១៨។ (ទី អូលីស្សា/VOA)
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប.) បញ្ជាក់ថា រាល់ការផ្សព្វផ្សាយព័ត៌មានទាំងឡាយណាដែលមិនចេញពី គ.ជ.ប. នោះមិនអាចយកជាការបានទេ។
លោកមានប្រសាសន៍ថា៖
«ព័ត៌មានទាំងឡាយណាដែលមិនចេញពី គ.ជ.ប. មិនទាន់ជាព័ត៌មានផ្លូវការទេ សូមឲ្យចាំចំណុចហ្នឹង»។
សហរដ្ឋអាមេរិក អូស្រ្តាលី និងកាណាដា បានចេញសេចក្តីថ្លែងការណ៍រិះគន់ការបោះឆ្នោតនេះថា ជាការបោះឆ្នោតដែលមិនមានភាពសេរី និងយុត្តិធម៌ ដោយសារមានការរឹតត្បិតសេរីភាពបញ្ចេញមតិលើក្រុមសង្គមស៊ីវិល និងអ្នកសារព័ត៌មាន ការប្រើប្រាស់ប្រព័ន្ធតុលាការចាត់ការក្រុមជំទាស់មុនការបោះឆ្នោតជាដើម។
សហរដ្ឋអាមេរិកក៏បានព្រមានចាត់វិធានការថែមទៀតលើរដ្ឋាភិបាលកម្ពុជា ក្រោយការបោះឆ្នោត ដែលខ្លួនចាត់ទុកថា មិនបានរៀបចំឲ្យមានលក្ខណៈសេរី និងយុត្តិធម៌ និង មិនបានអនុញ្ញាតឲ្យគណបក្សសង្គ្រោះជាតិដែលត្រូវរំលាយចូលរួមការបោះឆ្នោត។
លោក មាស នី អ្នកសិក្សាពីការអភិវឌ្ឍសង្គម និងជាអ្នកវិភាគនយោបាយឯករាជ្យ លើកឡើងថា ការប្រកាសថាគណបក្សប្រជាជនកម្ពុជាទទួលបានសំឡេងគាំទ្រ និងអាសនៈរដ្ឋសភាភ្លូកទឹកភ្លូកដី ដោយគ្មានវត្តមានគណបក្សសង្គ្រោះជាតិ គឺមិនមែនជារឿងគួរឲ្យភ្ញាក់ផ្អើលនោះទេ។
លោកបន្ថែមថា បើទោះបីជាគណបក្សកាន់អំណាចត្រូវគ្រប់គ្រងរដ្ឋសភាតែម្នាក់ឯង ឬមានគណបក្សតូចៗផ្សេងទៀតចូលរួមជាមួយក្តីក៏លោកថា រាល់ការសម្រេចចិត្ត គឺស្ថិតលើគណបក្សកាន់អំណាចតែមួយដដែល។
អ្នកវិភាគរូបនេះបន្ថែមថា លោកបារម្ភថាលទ្ធផលបោះឆ្នោតនេះនឹងធ្វើឲ្យរដ្ឋាភិបាលកម្ពុជាត្រូវប្រឈមនឹងការដាក់សម្ពាធពីស្ថាប័នអន្តរជាតិកាន់តែច្រើនថែមទៀត។
លោកបញ្ជាក់ថា៖
«ខ្ញុំធ្លាប់បាននិយាយពីមុនហើយថា បើសិនណាជាការបោះឆ្នោតនៅតែបន្តដូចដែលយើងបានឃើញមកដល់ពេលនេះ គឺរដ្ឋាភិបាលកម្ពុជាគឺត្រូវតែអូសរទេះឡើងភ្នំហើយ។ កាលណាអូសឡើងភ្នំ វាមានការពិបាកហើយ។ ហើយយើងមិនដឹងថា វានឹងរហូតកាំ វានឹងរបូតកង់យ៉ាងម៉េច យើងមិនទាន់ដឹងនៅឡើយទេ។ ហើយដូចជាពាក្យខ្មែរមួយបាននិយាយដែរ គឺនៅពេលដែលទឹកបាក់ទំនប់ មិនមាននរណាមកទប់បានទេ។ ប៉ុន្តែនៅពេលដែលទឹកស្រកទៅវិញយើងនឹងឃើញផលប៉ះពាល់ធំធេង»។
បើតាមការប្រកាសរបស់ គ.ជ.ប. នារសៀលថ្ងៃចន្ទនេះបង្ហាញថា តួលេខអ្នកចេញទៅបោះឆ្នោតចំនួនជិត៧លាននាក់ ឬស្មើនឹង៨២.៨៩% ក្នុងចំណោមអ្នកមានឈ្មោះក្នុងបញ្ជីបោះឆ្នោតចំនួនជិត៨លាន៤សែននាក់។
លោក មាស នី បន្ថែមថា លទ្ធផលនៃការចេញទៅបោះឆ្នោតដែលមានរហូតដល់ទៅជាង៨០ភាគរយនេះ គឺជាចំនួនដែលគួរឲ្យឆ្ងល់ ខណៈដែលការសង្កេតរបស់លោកឃើញថា អ្នកចេញទៅបោះឆ្នោតក្នុងឆ្នាំ២០១៨នេះ មានភាពស្ងប់ស្ងាត់ជាងកាលពីការបោះឆ្នោតឆ្នាំ២០១៧យ៉ាងខ្លាំង។
សន្លឹកឆ្នោតឥតបានការមានចំនួន៩% ស្មើនឹងប្រមាណជាជិត៦សែនសន្លឹក ច្រើនជាងសន្លឹកឆ្នោតឥតបានការកាលពីការបោះឆ្នោតឆ្នាំ២០១៧ ដែលមានត្រឹមតែប្រមាណ១សែន៣ម៉ឺនសន្លឹក។
តួលេខនេះកើនឡើងដល់ទៅជា៤ដងបើធៀបនឹងឆ្នាំ២០១៧ ពេលដែលគណបក្សសង្គ្រោះជាតិមិនទាន់ត្រូវបានរំលាយ។ ប្រភេទសន្លឹកឆ្នោតឥតបានការតាមការិយាល័យនីមួយៗ ជាសន្លឹកឆ្នោតដែលអ្នកបោះគូសខ្វែង អ្នកបោះឆ្នោតគូសបន្ថែមគណបក្សសង្គ្រោះជាតិ ឬគូសសញ្ញាព្រះអាទិត្យ អ្នកបោះគូសរូបផ្កាយលើសន្លឹកឆ្នោត អ្នកបោះគូសគ្រប់ប្រអប់គណបក្សជាដើម៕