នៅថ្ងៃចន្ទនេះ គណបក្សសង្គ្រោះជាតិដែលត្រូវបានរំលាយកាលពីឆ្នាំមុន បានអំពាវនាវឲ្យសហគមន៍អន្តរជាតិបដិសេធលទ្ធផលការបោះឆ្នោតកាលពីថ្ងៃអាទិត្យម្សិលមិញ ដែលគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ទទួលបានជ័យជម្នះ។
លោកស្រី មួរ សុខហួរ អនុប្រធានគណបក្សសង្គ្រោះជាតិ បាននិយាយថា៖ «ថ្ងៃទី ២៩ ខែកក្កដា ឆ្នាំ ២០១៨ គឺជាថ្ងៃនៃការស្លាប់របស់លទ្ធិប្រជាធិបតេយ្យនៅកម្ពុជា ដែលជាថ្ងៃដ៏ខ្មៅងងឹតថ្មីមួយនៅក្នុងប្រវត្តិសាស្ត្រថ្មីៗនេះរបស់កម្ពុជា»។ លោកស្រីបានបញ្ជាក់ថា លទ្ធិប្រជាធិបតេយ្យត្រូវបានជំនួសដោយ «របបផ្ដាច់ការទាំងស្រុង»។
ប្រជាពលរដ្ឋកម្ពុជាបានចេញទៅបោះឆ្នោតកាលពីថ្ងៃអាទិត្យម្សិលមិញ ដែលនៅក្នុងការបោះឆ្នោតនោះ គណបក្សសង្គ្រោះជាតិ ដែលជាគណបក្សប្រឆាំងដ៏ចម្បងបំផុតត្រូវបានរារាំងមិនឲ្យចូលរួម ដែលធ្វើឲ្យលោកនាយករដ្ឋមន្ត្រី ហ៊ុន សែន ដែលកាន់អំណាចបាន ៣៣ ឆ្នាំមកហើយ អាចបន្តកាន់អំណាចទៅមុខបន្ថែមទៀត។
សេតវិមានប្រធានាធិបតីអាមេរិកបានចេញសេចក្ដីប្រកាសមួយកាលពីថ្ងៃអាទិត្យម្សិលមិញជំទាស់ទៅនឹងការបោះឆ្នោតនេះ ដោយបញ្ជាក់ថា ការបោះឆ្នោតនៅកម្ពុជា «មិនមានភាពសេរី ឬយុត្តិធម៌នោះទេ និងមិនបានតំណាងឲ្យឆន្ទៈរបស់ប្រជាពលរដ្ឋខ្មែរ»។
សេតវិមានបានបញ្ជាក់នៅក្នុងសេចក្ដីប្រកាសនោះថា៖ «ការបោះឆ្នោតមិនត្រឹមត្រូវ ដែលរារាំងការចូលរួមរបស់គណបក្សប្រឆាំងដ៏ចម្បងបំផុតរបស់ប្រទេសកម្ពុជានេះ តំណាងឲ្យដំណើរថយក្រោយដ៏ធ្ងន់ធ្ងរបំផុតនៃប្រព័ន្ធប្រជាធិបតេយ្យដែលបានចែងនៅក្នុងរដ្ឋធម្មនុញ្ញប្រទេសកម្ពុជា»។
សេចក្ដីប្រកាសនោះបន្ថែមថា៖ «សហរដ្ឋអាមេរិកនឹងពិចារណាចាត់វិធានការជាបន្តបន្ទាប់បន្ថែមទៀត ដើម្បីឆ្លើយតបទៅនឹងការបោះឆ្នោតនេះ និងដំណើរថយក្រោយនៃលទ្ធិប្រជាធិបតេយ្យ និងសិទ្ធិមនុស្សកាលពីពេលថ្មីៗនេះនៅក្នុងប្រទេសកម្ពុជា ដែលក្នុងនោះមានទាំងការពង្រីកបន្ថែមនូវការរឹតត្បិតទិដ្ឋាការដែលបានប្រកាសកាលពីថ្ងៃទី ៦ ខែធ្នូ ឆ្នាំ ២០១៧ ផងដែរ»៕
