ក្រុមអ្នកតំណាងរាស្រ្តគណបក្សប្រជាជនកម្ពុជាបានបញ្ចប់ពិនិត្យកែប្រែច្បាប់ស្តីពីគណបក្សនយោបាយ ដែលមានបំណងទប់ស្កាត់អ្នកដែលមានទោសទណ្ឌ មិនឱ្យធ្វើសកម្មភាពឃោសនាដើម្បីជួយគណបក្សនយោបាយណាមួយឡើយ។
លោក អេង ឆៃអ៊ាង អនុប្រធានគណបក្សសង្គ្រោះជាតិ បានសរសេរនៅលើទំព័រហ្វេសប៊ុករបស់លោកថា គណៈកម្មាធិការអចិន្រ្តៃយ៍នៃរដ្ឋសភា នឹងលើកយកសេចក្តីស្នើច្បាប់នេះមកពិនិត្យនៅថ្ងៃព្រហស្បតិ៍ស្អែកនេះ។
មាត្រា៦ថ្មី (ពីរ) ដែលស្នើដោយតំណាងរាស្រ្តគណបក្សប្រជាជនកម្ពុជា បានបន្ថែមចំណុចចំនួនបីដែលក្នុងនោះមានការហាមប្រាមគណបក្សនយោបាយមិនឱ្យ «ប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិត» និង«យល់ព្រមដោយចំហរ ឬដោយតុណ្ហីភាព ឬឃុបឃិតជាមួយទណ្ឌិត»។ បើសិនជារកឃើញថាមានការប្រព្រឹត្តល្មើស គឺអាជ្ញាធរនឹងរំលាយគណបក្ស ឬហាមឃាត់សកម្មភាពរហូតដល់ប្រាំឆ្នាំ ដែលនាំឱ្យបាត់សិទ្ធិក្នុងការចូលរួមការបោះឆ្នោត។
ការធ្វើវិសោធនកម្មនេះកើតមានឡើង បន្ទាប់ពីលោកនាយករដ្ឋមន្ត្រី ហ៊ុន សែន បានសម្តែងការមិនពេញចិត្តនឹងការចូលរួមឃោសនារបស់លោក សម រង្ស៊ីអតីតប្រធានគណបក្សសង្គ្រោះជាតិនៅតាមបណ្តាញសង្គម ក្នុងពេលបោះឆ្នោតក្រុមប្រឹក្សាឃុំសង្កាត់ ដែលនាំឱ្យគណបក្សប្រឆាំងកើនចំនួនអាសនៈមេឃុំ និងក្រុមប្រឹក្សាឃុំសង្កាត់យ៉ាងច្រើន។
លោក អេង ឆៃអ៊ាង បានសរសេរបន្ថែមនៅក្នុងទំព័រហ្វេសប៊ុកអមនឹងរូបថតសេចក្តីស្នើច្បាប់នោះថា៖
«ការធ្វើច្បាប់ ឬការកែច្បាប់ដើម្បីកម្ចាត់ខ្មែរគ្នាឯង មិននាំផលចំណេញដល់ប្រទេសជាតិ និងប្រជាជាតិឡើយ ហើយក្រុមអ្នកធ្វើមិនពិតថា ទទួលបានផលវិជ្ជមានសម្រាប់ក្រុមរបស់ខ្លួនដែរ»។
លោក សម រង្ស៊ី កំពុងរស់នៅនីរទេសខ្លួនក្រៅប្រទេសដើម្បីគេចចេញពីការដាក់ទោសក្នុងសំណុំរឿងជាច្រើន ក្នុងនោះរួមមានអត្ថាធិប្បាយថារដ្ឋាភិបាលនៅពីក្រោយការបាញ់សម្លាប់លោកបណ្ឌិត កែមឡី អ្នកវិភាគនយោបាយដ៏ល្បីឈ្មោះម្នាក់។ លោក សម រង្ស៊ី ត្រូវបង្ខំចិត្តលាលែងចេញពីគណបក្សកាលពីដើមឆ្នាំនេះ ដើម្បីគេចចេញមិនឱ្យមានការរំលាយគណបក្សសង្គ្រោះជាតិ៕