ភ្ជាប់​ទៅ​គេហទំព័រ​ទាក់ទង

ចៅ​សង្កាត់​គណបក្ស​កាន់​អំណាច​បេ្តជ្ញា​បង្កើន​ការជួយ​ប្រជាពលរដ្ឋ​ខណៈ​គណបក្ស​ប្រឆាំង​ព្យាយាម​កសាង​ស្នាដៃ


លោក មាស សុភាព ចៅ​សង្កាត់​ផ្សារ​ថ្មីទី​២ មក​ពីគណបក្ស​ប្រជាជន​កម្ពុជា ដែល​ជាប់​ឆ្នោត​ជា​ចៅសង្កាត់​បន្ត​ទៀត កាល​ពី​ការ​បោះឆ្នោត​ថ្ងៃទី​៤ ខែមិថុនា ថ្លែង​ក្នុង​ពិធី​ផ្ទេរ​តំណែង​ផ្លូវ​ការ កាល​ពី​ថ្ងៃ​ទី​៣ ខែកក្កដា ឆ្នាំ២០១៧ នៅ​ខាង​មុខ​សាលា​សង្កាត់​ផ្សារ​ថ្មី​ទី២។ (ស៊ុន ណារិន/VOA)

ក្នុង​ពិធី​ចូល​កាន់​តំណែង​ ​ចៅ​សង្កាត់​គណបក្ស​កាន់​អំណាច​បេ្តជ្ញា​បង្កើន​ការ​ជួយ​ប្រជា​ពលរដ្ឋ​ ខណៈ​ចៅ​សង្កាត់​​គណបក្ស​ប្រឆាំង​ព្យាយាម​ក​សាង​ស្នាដៃ។

នៅ​ក្នុង​សប្តាហ៍​នេះ​ មេឃុំ-​ចៅសង្កាត់​ ដែល​ជាប់​ឆ្នោត​ក្រុម​ប្រឹក្សា​ឃុំ​សង្កាត់​ក្នុង​ការ​បោះឆ្នោត​ កាល​ពី​ថ្ងៃ​ទី​៤ ​ខែ​មិថុនា​ នឹង​ឡើង​កាន់​តំណែង​ជា​ផ្លូវការ។​ គណបក្ស​ប្រឆាំង​ដ៏​ធំ​នៅ​កម្ពុជា​គឺ​គណបក្ស​សង្រ្គោះ​ជាតិ​នឹង​មាន​មេឃុំ ​ចៅ​សង្កាត់​ច្រើនជាង​មុន​រហូត​ដល់​ជិត​៥០០​នាក់ ​ដែល​កើន​លើស​ជាង​១០​ដង ​បើ​ប្រៀបធៀប​នឹង​ការ​បោះ​ឆ្នោត ​កាល​ពីឆ្នាំ​២០១២ ​ដែល​ពេល​នោះ ​គណបក្ស​ប្រឆាំង​ឈ្នះ​បាន​មេឃុំ​តែ​៤០​ប៉ុណ្ណោះ។ ​នេះ​ជា​ប្រវត្តិ​សាស្រ្ត​មួយ​ក្នុង​ការ​បោះ​ឆ្នោត​ក្រុម​ប្រឹក្សា​ឃុំ-សង្កាត់ ​ដែល​បាន​ចាប់​ផ្តើម​តាំង​ពី​ឆ្នាំ​២០០២​ ដោយ​គណបក្ស​ប្រឆាំង​ទទួល​បាន​តំណែង​មេឃុំ-ចៅសង្កាត់​ច្រើន។​

គណបក្ស​ប្រជាជន​កម្ពុជា​ទទួល​បាន​តំណែង​មេឃុំ-​ចៅសង្កាត់​ចំនួន​១១៥៦​ ខណៈ​គណបក្ស​សង្រ្គោះជាតិ​ទទួល​បាន​៤៨៩ ​សម្រាប់​ការ​បោះឆ្នោត​ឃុំ-សង្កាត់​ឆ្នាំ​២០១៧​នេះ។ ​គណបក្ស​សង្រ្គោះជាតិ​បាន​ឈ្នះ​តំណែង​មេឃុំ-​ចៅសង្កាត់​ច្រើន​នៅ​ក្នុង​ខេត្ត​ធំៗ​ ​ដែល​ជា​គោល​ដៅ​ទេសចរណ៍ ​ពាណិជ្ជកម្ម ​និង​ការ​វិនិយោគ ​ក្នុង​នោះ​មាន​ទីក្រុង​ភ្នំពេញ​ផង​ដែរ។ ​បើ​ប្រៀបធៀប​សំឡេង​បោះ​ឆ្នោត ​គណបក្ស​ប្រជាជន​កម្ពុជា​ទទួល​បាន​៥០,៨​ភាគ​រយ ​ខណៈ​គណបក្ស​សង្រ្គោះ​ជាតិ​ទទួល​បាន​៤៣,៨​ភាគរយ។

លោកស្រី សេង សាខន អាយុ​៦២ឆ្នាំ មក​ពី​គណបក្ស​សង្រ្គោះជាតិ បាន​ចូល​កាន់តំណែង​ជា​ចៅសង្កាត់​ផ្សារ​ដេប៉ូ​ទី​២ កាល​ពី​ថ្ងៃ​ទី​៣ ខែកក្កដា ឆ្នាំ​២០១៧។ (ស៊ុន ណារិន/VOA)
លោកស្រី សេង សាខន អាយុ​៦២ឆ្នាំ មក​ពី​គណបក្ស​សង្រ្គោះជាតិ បាន​ចូល​កាន់តំណែង​ជា​ចៅសង្កាត់​ផ្សារ​ដេប៉ូ​ទី​២ កាល​ពី​ថ្ងៃ​ទី​៣ ខែកក្កដា ឆ្នាំ​២០១៧។ (ស៊ុន ណារិន/VOA)

លោកស្រី ​សេង សាខន​ អាយុ​៦២​ឆ្នាំ ចៅ​សង្កាត់​ដែល​ទើប​តែ​ជាប់​ឆ្នោត​មក​ពី​គណបក្ស​សង្រ្គោះ​ជាតិ បាន​ទទួល​ពិធី​ផ្ទេរ​តំណែង​ជា​ផ្លូវការ​មួយ ​កាល​ពី​ថ្ងៃ​ចន្ទ ហើយ​លោកស្រី​បាន​ចាប់​ផ្តើម​ការងារ​ភ្លាមៗ ​នៅ​ថ្ងៃ​ដដែល ​នៅ​សង្កាត់​ផ្សារ​ដេប៉ូ​ទី​២។​ លោកស្រី​បាន​ថ្លែង​ប្រាប់​ VOA​ ថា ​លោក​ស្រី​នឹង​ព្យាយាម​កសាង​ស្នាដៃ​ ជាមួយ​ការ​ប្តេជ្ញា​ខ្ពស់​ថា​ នឹង​ជួយ​សង្កាត់​ឲ្យ​មាន​ការ​រីក​ចម្រើន។ ​លោកស្រី​បន្ត​ថា​ ជាមួយ​ការ​កសាង​ស្នាដៃ​ទាំង​នេះ ​លោកស្រី​សង្ឃឹម​ថា ​គណបក្សប្រឆាំង​នឹង​ឈ្នះ​ការ​បោះឆ្នោត​សាកល​ ​ក្នុង​ឆ្នាំ​២០១៨។​

លោកស្រី​មាន​ប្រសាសន៍​ថា៖​

«តាំង​ចិត្ត​ថា​ ធ្វើ​ឲ្យ​បាន ​ព្រោះ​អី​ដើម្បី​ឆ្លើយ​តប​ទៅ​នឹង​តម្រូវការ​របស់​ប្រជា​ពលរដ្ឋ ​ហើយ​នឹង​គាត់​ផ្តល់​សេចក្តី​ទុកចិត្ត​ឲ្យ​យើង។ ​អីចឹង ទោះ​បី​ថា​ វា​មាន​ឧបសគ្គ​យ៉ាង​ណា ​ក៏​ត្រូវ​តែ​ធ្វើ​ឲ្យ​បាន។ ​អា​ហ្នឹង​គោល​ជំហរ​របស់​ខ្ញុំ​ផ្ទាល់​ថា​ ទោះ​បី​ជា​ពិបាក​យ៉ាងណា​ក៏​ដោយ​គឺ​ខ្ញុំត្រូវ​តែ​ធ្វើ​ឲ្យ​បាន»។​

សង្កាត់​ផ្សារ​ដេប៉ូ​ទី២ ស្ថិត​នៅ​ក្នុង​ខណ្ឌ​ទួលគោក ដែល​ដឹកនាំ​ដោយ​ចៅសង្កាត់​មក​ពី​គណបក្ស​សង្រ្គោះជាតិ។ (ស៊ុន ណារិន/VOA)
សង្កាត់​ផ្សារ​ដេប៉ូ​ទី២ ស្ថិត​នៅ​ក្នុង​ខណ្ឌ​ទួលគោក ដែល​ដឹកនាំ​ដោយ​ចៅសង្កាត់​មក​ពី​គណបក្ស​សង្រ្គោះជាតិ។ (ស៊ុន ណារិន/VOA)

គណបក្ស​សង្រ្គោះជាតិ​ទទួល​បាន​៤​អាសនៈ ​ក្នុង​ចំណោម​៧​អាសនៈ​សម្រាប់​សង្កាត់​ផ្សារ​ដេប៉ូទី​២។ ​នេះ​មាន​ន័យ​ថា ​គណបក្ស​ប្រឆាំង​មាន​សមាជិក​ក្រុម​ប្រឹក្សា​ចំនួន​៤​នាក់​ ចំណែក​គណបក្ស​ប្រជាជន​កម្ពុជាមាន​ចំនួន​៣​នាក់។

លោកស្រី​សាខន​ ដែល​ធ្លាប់​បាន​បំពេញ​ការងារ​ជា​សមាជិក​ក្រុម​ប្រឹក្សា​ជិត​១០​ឆ្នាំ​មក​ហើយ​នោះ​ បាន​លើក​ឡើង​ថា​ លោកស្រី​នឹង​ផ្តល់​សិទ្ធិ​អំណាច​ដល់​ប្រជា​ពលរដ្ឋ​ក្នុង​ការ​ចូលរួម​ផ្តល់​យោបល់​លើ​ការងារ​អភិវឌ្ឍ​សង្កាត់។ ​លោកស្រី​បន្ត​ថា​ លោកស្រី​នឹង​ព្យាយាម​លុប​បំបាត់​កាក​សំណល់​ ​ស​ម្រាម​ ការពារ​បរិស្ថាន​ លើក​កម្ពស់​សុខភាព ​អនាម័យ ទប់ស្កាត់​គ្រឿង​ញៀន ​ល្បែង​ស៊ីសង ​រក្សា​សន្តិសុខ​ សុវត្ថិភាព​នៅ​ក្នុង​សង្កាត់ ​និងផ្តល់​សេវា​កម្ម​មូលដ្ឋាន​ឲ្យ​បាន​ល្អ​ផង​ដែរ។

លោកស្រី​បន្ត​ថា ​លោកស្រី​នឹង​សហការ​ជាមួយ​សមាជិក​ក្រុម​ប្រឹក្សា​ផ្សេង​ទៀត​ មក​ពី​គណបក្ស​ប្រជាជន​កម្ពុជា ​និង​បែង​ចែក​ការងារ​ឲ្យធ្វើ​ ប្រកប​ដោយ​តម្លាភាព ដោយ​មិន​ប្រកាន់​និន្នាការ​នយោបាយ​ខុស​គ្នា​នោះ​ទេ។​

លោកស្រី​បាន​ថ្លែង​ប្រាប់​ VOA​ ថា៖​

«មក​ដល់​ពេល​នេះ​ហើយ​ យើង​សហការ​គ្នា​ ចាប់ដៃគ្នា​ដើម្បី​កសាង​ភូមិ​ ឃុំ​យើង​ឲ្យ​មាន​សុវត្ថិភាព។​ ​អីចឹងយើង​ទាល់​តែ​រួម​គ្នា ​ធ្វើ​ការ​ទាំង​អស់គ្នា។ ​ខ្ញុំ​ម្នាក់​ឯង​ ក៏​ខ្ញុំអត់​អាច​ធ្វើ​បាន​ដែរ។ ​អីចឹងទាល់​តែ​មាន​ជំនួយ ដូចជា​គាត់មាន​បទ​ពិសោធន៍​ចាស់​ស្រាប់។ ​យើង​អាច​ទំនាក់​ទំនង​ល្អ​ជាមួយ​គាត់។ ហើយ​ក៏​យើង​បែង​ចែក​ការងារ​ឲ្យ​គាត់​ធ្វើ»។​

ទោះជាយ៉ាងណា ​លោកស្រី​សាខន​ក៏​បាន​បង្ហាញ​ក្តី​បារម្ភ​អំពី​ការ​ទម្លាក់​ថវិកា​ដល់​សង្កាត់ ​ដោយ​ខ្លាច​ថា ​នឹង​មិន​មាន​ការ​បែង​ចែក​ថវិកា​ឲ្យ​បាន​ស្មើ​គ្នា​ និង​មាន​តម្លាភាព។​ លោកស្រី​បញ្ជាក់​ថា ​ប្រសិន​បើ​មាន​ករណី​បែប​នេះ​កើត​ឡើង​ លោកស្រី​នឹង​តស៊ូ​មតិ​ដើម្បីរក​ដំណោះស្រាយ។​

លោកស្រី​បញ្ជាក់​ថា​៖​

«តស៊ូ​មតិ​ទៀត​ទៅ! ថ្នាក់​ក្រោម​ត​មិន​បាន​ រាយ​ការណ៍​ដល់​ថ្នាក់​លើ ឲ្យ​មេៗ​ត​ទៀត អីចឹងទៅ​ណា៎។​ អាហ្នឹង​យើង​មាន​តែ​តស៊ូ​មតិ។ យើង​ទៅ​ធ្វើ​ម៉េច​គេ​បាន?»

គណបក្ស​សង្រ្គោះ​ជាតិ​បាន​អះអាង​ថា ​ថវិកា​សម្រាប់​ការ​អភិវឌ្ឍ​ឃុំ-សង្កាត់​បច្ចុប្បន្ន​នេះ​នៅ​មាន​ចំនួន​តិច​តួច​នៅ​ឡើយ​គឺ​ត្រឹមតែ​២​ទៅ​៣ម៉ឺន​ដុល្លារ​តែ​ប៉ុណ្ណោះ។​ គណបក្ស​នេះ​បាន​សន្យា​ថា​ នឹង​ផ្តល់​ថវិកា​ដល់​ឃុំ-សង្កាត់​និមួយៗ​យ៉ាង​តិច​៥០​ម៉ឺន​ដុល្លារ​ក្នុង​មួយ​ឆ្នាំ ​ប្រសិន​បើ​ខ្លួន​ឈ្នះ​ការ​បោះឆ្នោត​ថ្នាក់​ជាតិ​នៅ​ឆ្នាំ​២០១៨​ខាង​មុខ។​

ក្រុមប្រឹក្សា​ទាំង៤​នាក់ មក​ពី​គណបក្ស​សង្រ្គោះជាតិ បំពេញ​ការងារ​នៅ​សង្កាត់​ផ្សារ​ដេប៉ូទី២ កាល​ពីថ្ងៃទី​៣ ខែកក្កដា ឆ្នាំ២០១៧ ក្រោយ​ទទួល​បាន​តំណែង​ជា​ផ្លូវការ។ (ស៊ុន ណារិន/VOA)
ក្រុមប្រឹក្សា​ទាំង៤​នាក់ មក​ពី​គណបក្ស​សង្រ្គោះជាតិ បំពេញ​ការងារ​នៅ​សង្កាត់​ផ្សារ​ដេប៉ូទី២ កាល​ពីថ្ងៃទី​៣ ខែកក្កដា ឆ្នាំ២០១៧ ក្រោយ​ទទួល​បាន​តំណែង​ជា​ផ្លូវការ។ (ស៊ុន ណារិន/VOA)

ភ្លាមៗ​បន្ទាប់​ពី​ទទួល​តំណែង​ជា​ផ្លូវការ​ ​លោកស្រី​សាខន ​និង​សមាជិក​ក្រុម​ប្រឹក្សា​ផ្សេង​ទៀត ​បាន​សម្អាត​ទីធ្លា ​និង​រៀបចំ​សាលា​សង្កាត់​ឲ្យ​មាន​របៀប​រៀបរយ។ ​លោកស្រី​ក៏​មាន​គម្រោង​កែ​លម្អ​សាលា​សង្កាត់​ឲ្យ​មាន​បន្ទប់​ប្រជុំធំ​ទូលាយ​ជាង​នេះ។​

លោក ទូច ចាន់​ថន អាយុ​៦០ឆ្នាំ អតីត​ចៅសង្កាត់ផ្សារ​ដេប៉ូ​ទី២ ដែល​ទើប​តែ​ចាញ់​ឆ្នោត​កាល​ពី​ថ្ងៃ​ទី​៤ ខែមិថុនា ឆ្នាំ២០១៧ បាន​ក្លាយ​ជា​សមាជិក​ក្រុមប្រឹក្សា​សង្កាត់ ដែល​មាន​តួនាទី​ជា​ចៅសង្កាត់​រង​ទី​២។ (ស៊ុន ណារិន/VOA)
លោក ទូច ចាន់​ថន អាយុ​៦០ឆ្នាំ អតីត​ចៅសង្កាត់ផ្សារ​ដេប៉ូ​ទី២ ដែល​ទើប​តែ​ចាញ់​ឆ្នោត​កាល​ពី​ថ្ងៃ​ទី​៤ ខែមិថុនា ឆ្នាំ២០១៧ បាន​ក្លាយ​ជា​សមាជិក​ក្រុមប្រឹក្សា​សង្កាត់ ដែល​មាន​តួនាទី​ជា​ចៅសង្កាត់​រង​ទី​២។ (ស៊ុន ណារិន/VOA)

អតីត​ចៅ​សង្កាត់​ផ្សារ​ដេប៉ូ​ទី២ ​ដែល​ទើប​តែ​ចាញ់​ឆ្នោត​គឺលោកទូច ចាន់ថន​បាន​ថ្លែង​ប្រាប់ ​VOA​ ​ថា ​ប្រជា​ពលរដ្ឋ​ចង់​សាកល្បង​ការ​បោះឆ្នោត​នេះ​ ដោយពួកគេ​ចង់​បាន​ចៅ​សង្កាត់​ថ្មីមក​ពី​គណបក្ស​ប្រឆាំង។​ ​លោក​អះអាង​ថា ​ការងារ​សង្កាត់​កន្លង​មក​មិន​មាន​ភាព​មិន​ប្រក្រតី​នោះ​ទេ។​

លោក​មាន​ប្រសាសន៍​ថា៖​

«ប្រជា​ពលរដ្ឋ គេ​យល់​ទេ​ អា​នេះ វា​ជា​ផ្នត់​គំនិត​របស់​ប្រជា​ពលរដ្ឋ។​ ប្រជា​ពលរដ្ឋ​គេ​ចង់​សាក​ល្បង។​ អីចឹងផ្នត់​គំនិត​ គេ​ចង់​ផ្លាស់​ប្តូរ​ ហើយ​គេ​ចង់​មើល​អ្នក​ថ្មី ​ធ្វើ​ការ​ដឹកនាំ។ ​បែបគេ​ចង់​សាកល្បង​អា​ហ្នឹង​ណា៎»។​

លោកចាន់ថន​ ដែល​ជា​សមាជិក​ក្រុម​ប្រឹក្សា​ ​មាន​តំណែង​ជា​ចៅសង្កាត់​រង​ទី២​វិញ​ម្តង បាន​លើក​ឡើង​ថា​ លោកស្រី​សាខន ចៅសង្កាត់​ថ្មី​មក​ពីគណបក្ស​សង្រ្គោះ​ជាតិ ​មាន​សមត្ថភាព​អាច​ដឹកនាំ​សង្កាត់​បាន​ ​ដោយសារ​លោកស្រី​ធ្លាប់​បាន​បំពេញ​ការងារ​ជា​ចៅសង្កាត់​រង កាល​ពី​អាណត្តិ​មុន​មក​ហើយ។​

លោក​មាន​ប្រសាសន៍​ថា៖​

​«យី!​ និយាយ​ឡើង​ធ្វើ​មិន​បាន​ម៉េច?​ គាត់​ធ្លាប់​មាន​បទ​ពិសោធន៍។ ​គាត់​ធ្លាប់​នៅ​ហ្នឹង ​ឃើញ​ហើយ។​ បើ​គាត់​មិន​យល់​ត្រង់​ណា​ គាត់​សួរ​ខ្ញុំ​មក!»​

លោក​បាន​លើក​ឡើង​ដែរ​ថា លោក​នឹង​សហការ​គ្នា​ល្អ​ជាមួយ​ក្រុម​ប្រឹក្សា​ផ្សេង​ទៀត ហើយ​នឹង​ព្យាយាម​បញ្ចេញ​យោបល់​របស់​លោក​នៅ​ក្នុង​កិច្ច​ប្រជុំ​ទៅ​លើ​ការ​ងារ​អភិវឌ្ឍន៍​អ្វី​មួយ ដើម្បី​ឲ្យ​ប្រជា​ពលរដ្ឋទទួល​ផល​ប្រយោជន៍​ច្រើន។​

ទោះជាយ៉ាងណា ​លោក​បាន​អះអាង​ថា ​លោក​មាន​ «ភាព​នឿយ​ណាយ»​នឹង​ការងារ​ជា​ចៅសង្កាត់ ​ដែល​លោក​បាន​បំពេញ​ជាង​៣០​ឆ្នាំ​មក​ហើយ។ លោក​ចង់ឃើញក្មេងៗ​ជំនាន់​ក្រោយ​ចូលរួម​ក្នុង​ការ​ដឹកនាំ​ឃុំ-សង្កាត់​វិញ​ម្តង។​

លោក​បាន​ថ្លែង​ថា៖​

«ខ្ញុំ​នឿយ​ណាស់!​ ​ខ្ញុំ​និយាយ​ត្រង់​ហ្មង!​ ខ្ញុំរក​តែ​ឈប់​ទេ ​តែ​ថ្នាក់​លើ​គេ​មិន​ឲ្យ​ឈប់​បាទ!»​

នៅ​ក្នុង​ពិធី​ផ្ទេរ​តំណែង​ផ្លូវការ​តាម​សង្កាត់​និមួយៗ ក៏​មាន​ការ​ចូលរួម​ពី​អភិបាល​ខណ្ឌ​ សមាជិក​ភូមិ ​និង​ប្រជា​ពលរដ្ឋ​ផង​ដែរ។ ​ចៅ​សង្កាត់​ដែល​មិន​ជាប់​ឆ្នោត​បាន​រៀប​រាប់​ពី​របាយ​ការណ៍​នៃ​ការ​រីកចម្រើន​ក្នុង​ឃុំ-សង្កាត់​រយៈ​ពេល​៥​ឆ្នាំ​កន្លង​ទៅ ​និង​គម្រោង​អភិវឌ្ឍន៍​ទៅ​ថ្ងៃ​ខាង​មុខ។ ​ចំណែក​ចៅ​សង្កាត់​ថ្មី​ដែល​នឹង​ឡើង​កាន់​តំណែង ជាពិសេស​មេឃុំ-ចៅ​សង្កាត់​មក​ពីគណបក្ស​សង្រ្គោះជាតិ​ ឡើង​ប្តេជ្ញា​ចិត្ត​ក្នុង​ការ​ដឹកនាំ​ឃុំ​សង្កាត់​បន្ត។​

លោក​មាស សុភាព​ជា​ចៅ​សង្កាត់ផ្សារ​ថ្មី​ទី​២​ ​មក​ពី​គណបក្ស​ប្រជាជនកម្ពុជា ដែល​បាន​ជាប់​ឆ្នោត​ជា​ចៅសង្កាត់​បន្ត​ទៀត​ បាន​ថ្លែង​នៅ​ក្នុង​ពិធី​ផ្ទេរ​តំណែង​ថា​ ​លោក​នឹង​បន្ត​ការងារ​អភិវឌ្ឍ​នៅ​ក្នុង​សង្កាត់​ ក្នុង​នោះ​មាន​ការ​រៀបចំ​ប្រព័ន្ធ​លូ ​ការ​ស្ថាបនា​ផ្លូវ ​និង​ការ​រៀបចំ​ដាក់​អំពូល​ភ្លើង​នៅ​តាម​ច្រក​ផ្លូវ​ទាំង​អស់​ក្នុង​ភូមិ។​ ជាមួយ​គ្នា​នោះ​ដែរ ​លោក​បញ្ជាក់​ថា ​លោក​នឹង​ខិតខំ​បម្រើ​សេវា​សាធារណៈ​ដល់​ប្រជា​ពលរដ្ឋ​ឲ្យ​បាន​ល្អ​បំផុត។​

លោក​បាន​ថ្លែង​ថា៖​

«រាល់​សេវា​ផ្សេងៗ ​និង​ការ​ទំនាក់​ទំនង​របស់​បង​ប្អូន​ប្រជា​ពលរដ្ឋ ​ត្រូវតែ​បន្ត​យក​ចិត្ត​ទុក​ដាក់​ឲ្យ​បាន​មួយ​គុណ​នឹង​១០០​ដង​នៃ​លទ្ធ​ផល​ដែល​បង​ប្អូន​បាន​បោះ​ឆ្នោត​ជូន។ ​ខ្ញុំត្រូវ​បម្រើ​បង​ប្អូន។​ ​ប្តេជ្ញា​ថា​ ពី​ថ្ងៃ​នេះ​ទៅ ​រាល់​បញ្ហា​ខ្វះខាត​ និង​ពេល​វេលា ​សុំ​បញ្ជាក់​ថា ពេល​វេលា​ ​បង​ប្អូន​យើង​មួយ​ចំនួន​នៅតែ​ប្រកាន់​ថា​ ថ្ងៃ​នេះ​ ថ្ងៃ​អាទិត្យ ​ម៉ោង​នេះ​ម៉ោង​សម្រាក!​ ​អត់​ទេ!​ ​ អាជ្ញាធរ​មូលដ្ឋាន​គ្មាន​ម៉ោង​សម្រាក​ទេ​ ព្រោះ​ប្រជា​ពលរដ្ឋ​មាន​ទុក្ខ​លំបាក​ក៏​គ្មាន​ម៉ោង​កំណត់​ដែរ»។

លោកសុភាព​ក៏​ចង់​ឃើញ​ការ​សហការ​គ្នា​ល្អ ​និង​មាន​សាមគ្គីភាព​ក្នុង​ចំណោម​ក្រុម​ប្រឹក្សាដើម្បី​បម្រើ​ប្រជា​ពលរដ្ឋ​នៅ​ក្នុង​សង្កាត់។​

ទោះ​ជាយ៉ាងណា​ ចៅសង្កាត់​រង​ទី​២​មក​ពី​គណបក្ស​សង្រ្គោះ​ជាតិ​គឹ​លោក​គ្រួច ហេង​បាន​អះអាង​ថា កន្លង​ទៅ ​លោក​មិន​ត្រូវ​បាន​ផ្តល់​ការងារ​ឲ្យ​ធ្វើ​ទៅ​តាម​តួនាទី​ដែល​លោក​មាន​នោះ​ទេ។​ លោក​ចាត់​ទុក​ថា នេះ​ជា​ការ​រើស​អើង​មួយ។​

លោក​បាន​ថ្លែង​ប្រាប់ ​VOA ​ក្រោយ​បញ្ចប់​ពិធី​ផ្ទេរ​តំណែង​កាល​ពី​ថ្ងៃ​ចន្ទ​ថា៖​

«អាណត្តិ​ពី​មុន​គឺ​គេ​មិន​ឲ្យ​តួនាទី​ខ្ញុំ​ធ្វើការ​ទេ ​នៅ​ក្នុង​សង្កាត់ ​មាន​តែ​តួនាទី ​តែ​ការងារ​ គេមិន​អត់​ឲ្យ​យើង​ធ្វើ​ទេ»។​

អ្នកស្រី​ស៊ុន ផល្លា ​អាយុ​៤៥​ឆ្នាំ ​ជា​អ្នក​លក់​ម្ហូប​នៅ​ក្នុង​សង្កាត់ផ្សារ​ថ្មី​ទី​២​ បាន​ស្នើ​ឲ្យ​សមាជិក​ក្រុម​ប្រឹក្សា​ទាំង​អស់​ រួមដៃ​គ្នា​ដើម្បី​បម្រើ​ប្រជា​ពលរដ្ឋ។ ​អ្នកស្រី​ចង់​ឃើញ​ចំណាត់​ការ​បន្ថែម​ទៀត​លើ​បញ្ហា​គ្រឿងញៀន ​ចោរកម្ម ​ដែល​ជា​បញ្ហា​ធំ​នៅ​ក្នុង​សង្កាត់។​

អ្នកស្រី​មាន​ប្រសាសន៍​ថា៖​

«ក៏​សំណូម​ពរ​ឲ្យ​អ្នក​ដែល​ឡើង​ថ្មី​ហ្នឹង ​ឲ្យ​គាត់​ខំ​ធ្វើ​ការ​បម្រើ​ប្រជា​ពល​រដ្ឋ​ ដើម្បី​យក​ស្នា​ដៃ​នៅ​អាណត្តិ​ឆ្នាំ​២០១៨»។​

អ្នកស្រី​ក៏​បាន​រិះគន់​ថា ​កន្លង​ទៅ ​ក៏​មាន​ការ​ប្រកាន់​បក្ខ​ពួក ​ក្នុង​ការ​ជួយ​ប្រជា​ពលរដ្ឋ​ដែល​ជួប​ការ​លំបាក​ផង​ដែរ។​

អ្នកស្រី​មាន​ប្រសាសន៍​ថា៖​

«មីង​ចង់​ឲ្យ​គាត់​ហ្នឹង ​ចៅសង្កាត់​ គាត់​សំឡឹង​មើល​ឲ្យ​ដិត​ដល់ ​ចំពោះ​ប្រជា​ពលរដ្ឋ​ណា​ដែល​ក្រីក្រ ​កុំ​ឲ្យ​តែ​ស្ថិត​តាម​ខ្សែ​រយៈណា។ ​អ្នក​ដែល​ក្រ​គឺ​ចុច​ឈ្មោះ​ឲ្យ​ចំ​ ​កុំ​ឲ្យ​រើស​អើង។​ អាហ្នឹង​ខ្ញុំ​ពេញចិត្ត​ហើយ។​ រាល់​ថ្ងៃ​ខ្ញុំ​អត់​ពេញ​ចិត្ត​កន្លែង​ហ្នឹង​ច្រើន»។​

លោកយឿង សុធារ៉ា ​មន្រ្តី​ច្បាប់​ និង​អង្កេត​នៃ​អង្គការ​ឃ្លាំ​មើល​ការ​បោះឆ្នោត​ ហៅ​កាត់​ថា ​ខុមហ្រ្វែល ​បាន​ថ្លែង​ប្រាប់​ VOA ​ថា ​កន្លង​ទៅ​ការ​រើស​អើង​នយោបាយ​នៅ​តែ​មាន សម្រាប់​ការ​ដឹកនាំ​ឃុំ-សង្កាត់។ ​លោក​បន្ត​ថា ​មាន​ករណី​ច្រើន ​ដែល​លោក​សង្កេត​ឃើញ​ថា ​ក្រុមប្រឹក្សា​ទាំង​នោះ​មិន​ទាន់​បាន​សហការ​គ្នា​ល្អ​នៅ​ឡើយ​ទេ។​

លោក​មាន​ប្រសាសន៍​ថា៖​

«ការ​រើស​អើង​រវាង​ពួកគាត់​ ក្រុមប្រឹក្សា​ឃុំ​សង្កាត់ ​ដែល​មក​ពី​គណបក្ស​ពីរ​ផ្សេង​គ្នា​ ​បាន​កើត​ឡើង​ច្រើន ​ពាក់ព័ន្ធ​នឹងការ​រើស​អើង​នយោបាយ។ ...មាន​ឃុំ-សង្កាត់​ខ្លះ​ដែរ ​ដែល​គាត់​សហការ​គ្នា​ដើម្បីធ្វើ​ការ ប៉ុន្តែ​មាន​មិន​ច្រើន​ទេ»។​

លោក​សុធារ៉ា​បាន​អះអាង​ទៀត​ថា ​សំឡេង​គណបក្ស​ប្រឆាំង​មាន​ការ​កើន​ឡើង​សម្រាប់​ការ​បោះឆ្នោត​ក្រុម​ប្រឹក្សា​ឃុំ-សង្កាត់​អាណត្តិ​នេះ។​ ដូច្នេះ​ប្រជា​ធិបតេយ្យ​នឹង​មាន​នៅ​ថ្នាក់​ក្រោម ​ដែល​លោក​ថា​ អាច​ធ្វើ​ឲ្យ​ប្រជា​ពលរដ្ឋ​ទទួល​បាន​ផល​ប្រយោជន៍​ច្រើន ​នៅ​ពេល​មាន​ការ​ប្រកួត​ប្រជែង​គ្នា​ខ្លាំង៕

XS
SM
MD
LG