លោក Andrea Napoli មេធាវីវ័យក្មេងជនជាតិអ៊ីតាលីម្នាក់មានសុខភាពល្អណាស់ ប៉ុន្តែអ្វីៗពេលនោះ បានផ្លាស់ប្តូរយ៉ាងឆាប់រហ័ស។
លោក Napoli ដែលជាអ្នកឆ្លងជំងឺកូវីដ១៩ម្នាក់ថ្លែងថា៖ «ខ្ញុំចងចាំថា ខ្ញុំកំពុងនៅក្នុងសវនាការក្នុងតុលាការដូចធម្មតា ដោយមិនមានរោគសញ្ញាអ្វីទាំងអស់ មួយថ្ងៃមុននឹងឈឺ។ ព្រឹកនោះ ខ្ញុំបានហូបអាហារពេលព្រឹក និងអាហារពេលថ្ងៃត្រង់ ហើយភ្លាមនោះខ្ញុំមានអារម្មណ៍ថាឈឺ»។
លោក Napoli ដែលជាអ្នកលេងកីឡាបាល់បោះក្នុងទឹកនិងជាអ្នករត់ដ៏សកម្មមួយរូប មានអាការៈក្តៅខ្លួនចម្លែក ក្អកស្ងួត និងមានអារម្មណ៍ថប់ដង្ហើម។
លោក Napoli ត្រូវបញ្ជូនទៅសម្រាកព្យាបាលក្នុងមន្ទីរពេទ្យ បន្ទាប់មកអុកស៊ីសែនក្នុងឈាមរបស់លោកបានធ្លាក់ចុះខ្លាំង ហើយលោកត្រូវបានគេបញ្ជូនទៅបន្ទប់ ICU ទៀត។
លោក Napoli ថ្លែងថា៖ «ខ្ញុំមិនដែលមានបញ្ហាផ្លូវដង្ហើមនោះទេ។ ខ្ញុំមិនដែលមានជំងឺអ្វីនោះទេ។ ខ្ញុំមិនគិតថា ខ្ញុំអាចកើតជំងឺកូវីដ១៩ទេ ព្រោះខ្ញុំតែងតែប្រយ័ត្នដោយពាក់ស្រោមដៃនិងម៉ាស់ជាប្រចាំ»។
នៅក្នុងមន្ទីរពេទ្យដែលលោក Napoli សម្រាកព្យាបាល ក្រុមវេជ្ជបណ្ឌិតអាចជួយលោកឲ្យផុតពីស្ថានភាពគ្រោះថ្នាក់ ហើយបញ្ជូនលោកទៅបន្ទប់សម្រាកព្យាបាលធម្មតាវិញ ដោយលោកត្រូវបញ្ជូលអុកសុីហ្សែន៩ថ្ងៃជាប់ៗគ្នាទៀត ប៉ុន្តែមិនចាំបាច់បញ្ជូលតាមបំពាក់បំពង់តាមមាត់ទេ។
លោក Carlo Navarro អាយុ៤៨ឆ្នាំនៅប្រទេសហ្វីលីពីនវិញរៀបរាប់ពីបទពិសោធន៍របស់លោកក្នុង ការប្រយុទ្ធប្រឆាំងនឹងជំងឺកូវីដ១៩។
លោក Carlo Navarro ដែលជាអ្នករួចជីវិតពីជំងឺកូវីដ១៩មួយរូបទៀតថ្លែងថា៖ «ស្ថានភាពដ៏គួរឲ្យខ្លាចបំផុតប្រហែលកើតឡើងនៅថ្ងៃទី៤ នៅពេលដែលអ្នកដែលចូលមន្ទីរពេទ្យថ្ងៃជាមួយខ្ញុំចាប់ផ្តើមស្លាប់នៅព្រឹកនោះ»។
លោក Navarro ឆ្លងជំងឺកូវីដ១៩នេះពេលលោកធ្វើដំណើរទៅកាន់ប្រទេសជប៉ុនជាមួយនឹងភរិយា និងកូនស្រីរបស់លោកកាលពីចុងខែកុម្ភៈ។ អ្វីដែលពិបាកបំផុតសម្រាប់លោកគឺលោកមិនអាចមានក្រុមគ្រួសារនៅក្បែរលោកក្នុងមន្ទីរពេទ្យ។
លោក Navarro ថ្លែងថា៖ «យើងត្រូវបានដាក់ឲ្យនៅដាច់ដោយឡែកពីគេ។ វាជាបន្ទប់ពោរពេញដោយសម្ពាធអវិជ្ជមានមួយ។ ភរិយា និងកូនស្រីរបស់ខ្ញុំហៅទូរស័ព្ទដោយមានវីដេអូមកខ្ញុំសឹងមួយម៉ោងម្តង។ គាត់ចង់បញ្ជាក់ថា ខ្ញុំមានអីហូប»។
លោក Navarro បានរួចជីវិតពីជំងឺកូវីដ១៩ ប៉ុន្តែក្រុមមនុស្សវ័យក្មេងនៅទូទាំងពិភពលោកឆ្លងជំងឺនេះហើយបាត់បង់ជីវិត។ វាពិតជាធ្វើឲ្យក្រុមគ្រូពេទ្យមានការភ្ញាក់ផ្អើល ហើយក្រុមគ្រូពេទ្យបានព្រមានថានរណាក៏អាចឆ្លងជំងឺកូវីដ១៩នេះដែរ៕
ប្រែសម្រួលដោយ ស្រេង លក្ខិណា