អតីតមន្ត្រីថ្នាក់មូលដ្ឋានប្រាំនាក់នៃគណបក្សសង្គ្រោះជាតិ ត្រូវបានតុលាការកោះហៅទៅសាកសួរពាក់ព័ន្ធនឹងសកម្មភាពនយោបាយរបស់ពួកគេ ក្រោយពីការរំលាយអតីតគណបក្សប្រឆាំងនេះ។
មន្ត្រីទាំងប្រំានាក់មាន កញ្ញា ស៊ិន ចាន់ពៅរ៉ូហ្សេត អតីតចៅសង្កាត់អូចារ លោក ម៉ក់ រ៉ា អតីតចៅសង្កាត់ទួលតាឯក លោក ហួន ចំរើន អតីតចៅសង្កាត់ចំការសំរោង លោក ឌឹម សារឿន អតីតសមាជិកក្រុមប្រឹក្សាខេត្តបាត់ដំបង និងលោក គង់ ប៊ុនហ៊ាង សកម្មជនគណបក្សនឹងត្រូវទៅបំភ្លឺនៅតុលាការនៅខែឧសភានេះ ពាក់ព័ន្ធនឹង«ការប្រឆាំងនឹងសាលដីការបស់តុលាការកំពូល»។ នេះបើតាមការបញ្ជាក់របស់មន្ត្រីគណបក្សនិងឯកសារតុលាការ។
Your browser doesn’t support HTML5
បទសម្ភាសន៍VOA៖ អតីតចៅសង្កាត់ស៊ិន ចាន់ពៅរ៉ូហ្សេតបារម្ភពីសុវត្ថិភាពតែមិនតក់ស្លុត
កញ្ញា ស៊ិន ចាន់ពៅរ៉ូហ្សេត បានលើកជាចម្ងល់ចំពោះការកោះហៅនោះ ដោយសារតែខ្លួនបានវិលមកជីវភាពធម្មតាវិញតាំងពីគណបក្សសង្គ្រោះជាតិត្រូវបានរំលាយកាលពីចុងឆ្នាំ២០១៧ មកម៉្លេះ។
«សម្រាប់ដីកាហ្នឹងខ្ញុំដូចជាចម្លែកដែរដោយសារ តើខ្ញុំមានសកម្មភាពទៅប្រឆាំងដីកាតុលាការកំពូលរបៀបម៉េច បើសិនជាការរំលាយគណបក្សសង្គ្រោះជាតិកាលពី ថ្ងៃទី១៦ ហើយថ្ងៃទី១៧គឺរដ្ឋបាលក្រុងបានទៅដកហូតយកត្រាខ្ញុំ ពេលនោះខ្ញុំបានប្រគល់ត្រាឱ្យដោយសន្តិវិធីទៅទៀត។ នេះទីមួយ។ ទីពីរគឺខ្ញុំបានមកប្រកបរបររកស៊ីរបស់ខ្ញុំរហូតដល់មានអ្នកមករំខានថាខ្ញុំបង្កើតចលនាឧទ្ទាមរហូតដល់ដាច់ភ្ញៀវលែងមកទទួលទាននំបញ្ចុកហាងនាងខ្ញុំទៅហើយប្រហែល៧០ភាគរយមកដល់ថ្ងៃនេះ»។
កញ្ញា រ៉ូហ្សេតបញ្ជាក់ថា នឹងទៅបំភ្លឺនៅថ្ងៃទី៩ខែឧសភាខាងមុខតាមការកោះហៅរបស់តុលាការខេត្តបាត់ដំបង។
ដីកាចេញថ្ងៃទី២៤ខែមេសាដោយលោក គី ប៊ុណ្ណារ៉ា តំណាងព្រះរាជអាជ្ញា ហើយបានមកដល់អធិការដ្ឋាននគរបាលក្រុងបាត់ដំបងនៅថ្ងៃទី២៩ខែមេសា និងត្រូវបានបញ្ជូនដល់សាមីខ្លួននៅថ្ងៃអង្គារនេះ។ នេះបើតាមដីកាកោះដែលវីអូអេបានឃើញ។
ចាប់តាំងពីបាត់មុខតំណែងមក អតីតចៅសង្កាត់រូបនេះបានប្រកបរបរលក់នំបញ្ចុក និងលក់ទំនិញតាមអនឡាញហើយក៏នៅមានការបញ្ចេញមតិខ្លះៗលើបណ្តាញសង្គមពីបញ្ហាសង្គមផងដែរ។
កញ្ញា ពៅរ៉ូហ្សេតបានបន្ថែមថា៖
«ជាធម្មតាទេខ្ញុំមិនមែនអ្នកដែលត្រូវជាប់បំរាមហាមសិទ្ធិមិនឱ្យធ្វើនយោបាយឯណា? ទោះបីរំលាយតំណែងខ្ញុំ ដកហូតតួនាទីខ្ញុំ ក៏ខ្ញុំនៅជាពលរដ្ឋធម្មតា។ អីចឹងពលរដ្ឋធម្មតានៅក្នុងរដ្ឋធម្មនុញ្ញមានសិទ្ធិសម្តែងមតិ មានសិទ្ធិធ្វើនយោបាយ មានសិទ្ធិអ្វីណាដែលច្បាប់បានចែង។ អីចឹងធម្មតាខ្ញុំតែងតែនិយាយពីបញ្ហាសង្គម បញ្ហាប្រទេសជាតិ។ ដោយឡែកផ្សេងទៀតខ្ញុំក៏តែងតែនិយាយអំពីអតីតថ្នាក់ដឹកនាំគណបក្សសង្គ្រោះជាតិហើយយើងក៏នៅ តែមានសង្ឃឹមថាគណបក្សសង្គ្រោះជាតិនឹងត្រឡប់មកវិញហើយពួកយើងនឹងទៅបម្រើប្រជាពលរដ្ឋសារជាថ្មីម្តងទៀត»។
វីអូអេនៅមិនទាន់អាចទាក់ទងអតីតមន្ត្រីដទៃទៀតនៅឡើយទេនៅថ្ងៃអង្គារនេះ។
ការចេញដីកានេះកើតមានឡើងស្របពេលដែលមានសារជាបន្តបន្ទាប់របស់លោកសម រង្ស៊ីប្រធានស្តីទីគណបក្សសង្គ្រោះជាតិដែលស្នើឱ្យកងកម្លាំងប្រដាប់អាវុធងើបឡើងប្រឆាំងនឹងការដឹកនាំជាង៣០ឆ្នាំរបស់លោកនាយករដ្ឋមន្ត្រីហ៊ុន សែននិងថាអ្នកគាំទ្រអតីតគណបក្សប្រឆាំងនេះនឹងគាំទ្រពួកគេ។
លោក អេង ឆៃអ៊ាង អនុប្រធានគណបក្សសង្គ្រោះជាតិបានបញ្ជាក់ថា៖
«នេះគឺជាព្រឹត្តិការណ៍ដដែលៗ ដែលរបបលោកហ៊ុន សែនតែងតែបានធ្វើមកលើសកម្មជនគណបក្សសង្គ្រោះជាតិ ទោះបីបច្ចុប្បន្ននេះលោកហ៊ុន សែនបានរំលាយគណបក្សសង្គ្រោះជាតិរួចទៅហើយ ហើយបានចាប់ប្រធានគណបក្សសង្គ្រោះជាតិដាក់ពន្ធនាគារហើយក៏ដោយ ក៏របបលោកហ៊ុន សែននៅ តែព្យាយាមដើម្បីបង្ក្រាបសកម្មជនគណបក្សប្រឆាំងព្រោះ លោកហ៊ុន សែនដឹងថាគណបក្សសង្គ្រោះជាតិគឺជាឧបសគ្គនៃអំណាចរបស់គាត់។ អីចឹងហើយបានជាគាត់តាមយាយីគ្រប់រូបភាពមានការចាប់ដាក់ពន្ធនាគារនិងមានការចោទតាមប្រព័ន្ធតុលាការជាដើម»។
លោក អេង ឆៃអ៊ាងដែលកំពុងរស់នៅនីរទេសខ្លួននៅសហរដ្ឋអាមេរិកដើម្បីបន្តសកម្មភាពនយោបាយបានបន្ថែមថា៖
«យើងនឹងសុំឱ្យសហគមន៍អន្តរជាតិ បណ្តាប្រទេសជាមិត្តដែលគោរពគោលការណ៍ប្រជាធិបតេយ្យដែលគាំទ្រឱ្យមានការគោរពសិទ្ធិមនុស្សនៅកម្ពុជាគឺថាត្រូវដាក់គំនាបទៅលើរបបលោកហ៊ុន សែន ឱ្យរបបលោកហ៊ុន សែនត្រូវតែ បញ្ឈប់ ការរំលោភសិទ្ធិមនុស្សនៅប្រទេសកម្ពុជា។ ជាពិសេសនៅថ្ងៃនេះយើងដឹងហើយថាអ្នកស្រីរ៉ូណា ស្មីតដែលជាប្រេសិតពិសេសរបស់អង្គការសហប្រជាជាតិទទួលបន្ទុកនៅកម្ពុជាគឺអ្នកស្រីកំពុងតែបំពេញបេសកកម្មនៅ កម្ពុជាស្តីអំពីសិទ្ធិមនុស្ស។ អីចឹងហើយលោកស្រី នឹងឃើញច្បាស់អំពីទង្វើដ៏ឃោរឃៅព្រៃផ្សៃរបស់របបលោកហ៊ុន សែន»។
គណបក្សសង្គ្រោះជាតិត្រូវបានតុលាការកំពូលរំលាយកាលពីខែវិច្ឆិកាឆ្នាំ២០១៧ ហើយបានហាមឃាត់អ្នកតំណាងរាស្ត្រនិងមន្ត្រីគណបក្សចំនួន១១៨នាក់មិនឱ្យធ្វើនយោបាយរយៈពេល៥ឆ្នាំ។
លោកកឹម សុខា ប្រធានគណបក្សត្រូវបានអាជ្ញាធរចាប់ដាក់ពន្ធនាគារនិងបន្តឃុំឃាំងនៅក្នុងលំនៅដ្ឋានជិត២០ខែហើយ។ លោកមិនត្រូវបានអនុញ្ញាតឱ្យជួបអតីតមន្ត្រីនិងអ្នកការពារសិទ្ធិមនុស្សទេបើសូម្បីអ្នករាយការណ៍ពិសេសស្តីពីសិទ្ធិមនុស្សរបស់អង្គការសហប្រជាជាតិក៏ដោយ។
បើទោះបីជាអះអាងពីភាពគ្មានទោសពៃរ៍របស់ខ្លួន ក៏កញ្ញាស៊ិន ចាន់ពៅរ៉ូហ្សេត បានបញ្ជាក់ថាមានការព្រួយបារម្ភពីសុវត្ថិភាពផ្ទាល់ខ្លួនដោយសារមិនមានជំនឿលើប្រព័ន្ធតុលាការកម្ពុជាដែលត្រូវបានអ្នកការពារសិទ្ធិមនុស្សនិងសហគមន៍អន្តរជាតិចាត់ទុកថាត្រូវបានប្រើប្រាស់ជាឧបករណ៍នយោបាយរបស់គណបក្សកាន់អំណាច។
កញ្ញាស៊ិន ចាន់ពៅរ៉ូហ្សេតបានបន្ថែមថា៖
«ការអស់ទំនុកចិត្តលើប្រព័ន្ធតុលាការគឺគ្រាន់តែទទួលដីកាកោះ ជាពិសេសអតីតបក្សប្រឆាំងតែម្តង។ គ្រាន់តែទទួលដីកាកោះយើងមានការព្រួយបារម្ភអំពីសុវត្ថិភាពផ្ទាល់ខ្លួនយើងថាបើយើងចូលទៅ គេសួរយើងហើយអាចបន្តឃុំឃាំងដូច្នេះអីចឹងទៅ។ អីចឹងហើយយើងមានការព្រួយបារម្ភពីសុវត្ថិភាពផ្ទាល់ខ្លួនរបស់យើង ណាស់ មិនមែនមានន័យថាយើងមិនភ័យព្រួយទេប៉ុន្តែទន្ទឹមនឹងការភ័យព្រួយនោះគឺយើងមិនតក់ស្លុតនឹងអ្វីណាដែលតុលាការកោះហៅផងទេពីព្រោះយើងអត់បានធ្វើអំពើអ្វីដែលខុសច្បាប់ អំពើអ្វីដែលប៉ះពាល់ដល់ប្រទេសជាតិអំពើអ្វីដែលធ្វើឱ្យសង្គមហ្នឹងមានបញ្ហាដល់សង្គមទេ»។
កាលពីសប្តាហ៍មុនអតីតសមាជិកក្រុមប្រឹក្សាខេត្តត្បូងឃ្មុំម្នាក់គឺលោកស៊ូ យានក៏ត្រូវចាប់ខ្លួននិងដាក់ឃុំឃាំងផងដែរក្រោមការចោទប្រកាន់ពីបទញុះញង់ និងជេរប្រមាថលោកនាយករដ្ឋមន្ដ្រី ហ៊ុន សែន តាមបណ្ដាញសង្គមហ្វេសប៊ុក។
លោកស៊ូ យានក៏ជាអនុប្រធានគណៈកម្មាធិការប្រតិបត្តិគណបក្សសង្គ្រោះជាតិខេត្តត្បូងឃ្មុំ ត្រូវបានអាជ្ញាធរបញ្ជូនទៅឃុំខ្លួននៅឯពន្ធនាគារត្រពាំងផ្លុង ជាប់ព្រំដែនប្រទេសវៀតណាម៕