លោកស្រី Hillary Clinton បេក្ខជនប្រធានាធិបតីខាងគណបក្សប្រជាធិបតេយ្យ កំពុងដាក់ចេញផែនការសេដ្ឋកិច្ចរបស់លោកស្រី ដែលសំណើរបស់លោកស្រីនឹងជួយកម្មករសហរដ្ឋអាមេរិកយ៉ាងច្រើន ខណៈដែលលោក Donald Trump បេក្ខជនប្រធានាធិបតីខាងគណបក្សសាធារណរដ្ឋ កំពុងផ្តល់ការកាត់បន្ថយពន្ធដារដល់អ្នកមានទ្រព្យសម្បត្តិដូចជារូបលោក។
លោកស្រី Clinton បានថ្លែងកាលពីថ្ងៃព្រហស្បតិ៍នៅឯរោងចក្រផលិតរថយន្ត និង សំភារៈយោធានៅក្នុងទីក្រុង Warren រដ្ឋ Michigan ភាគកណ្តាលខាងលិច ដែលមិនស្ថិតនៅឆ្ងាយពីទីកន្លែងដែលលោកTrumpបានអំពាវនាវកាលពីដើមសប្តាហ៍នេះឲ្យ មានការកាត់បន្ថយពន្ធសហរដ្ឋអាមេរិកយ៉ាងខ្លាំងសម្រាប់ក្រុមហ៊ុនសាជីវកម្ម និងបុគ្គលម្នាក់ៗ។
ពួកអ្នកជំនួយការនិយាយថា លោកស្រី Clinton អតីតរដ្ឋមន្រ្តីការបរទេសសហរដ្ឋអាមេរិក នឹងបន្ទុះបង្អាប់ផែនការរបស់លោក Trumpថាជាផែនការបំផ្លាញសេដ្ឋកិច្ច ខណៈដែលផែនការរបស់លោកស្រីនឹងផ្តោតលើគម្រោងបង្កើតការងារនិងការងារសាធារណៈដើម្បីជួសជុលផ្លូវ ស្ពាន និងចំណតអាកាសយាន្តទ្រុឌទ្រោម។ នៅក្នុងការប្រជុំមហាជនមួយកាលពីថ្ងៃពុធនៅក្នុងរដ្ឋ Iowa ដែលជារដ្ឋកសិកម្ម លោកស្រី Clinton បានមានប្រសាសន៍ថា ផែនការរបស់លោកស្រី នឹងបន្ថែមការងារជាង១០លាន ហើយលោកស្រីមានប្រសាសន៍ទៀតថា ផែនការរបស់លោក Trump នឹងធ្វើឲ្យបាត់បង់ការងារសហរដ្ឋអាមេរិកជាង៣លានការងារ។
មុនពេលថ្លែងសុន្ទរកថារបស់លោកស្រី លោក Trump ជាមហាសេដ្ឋីអចលនទ្រព្យដែលកំពុងស្វះស្វែងកាន់តំណែងតាមរយៈការបោះឆ្នោតលើកទីមួយ បានប្រាប់បណ្តាញទូរទស្សន៍ CNBC ថា អាមេរិក នឹងបន្ថែមបំណុលចំនួន១៩លានលានដើម្បីពង្រីកវិស័យយោធានិងស្ថាបនាហេដ្ឋារចនាសម្ព័ន្ធឡើងវិញ៕