យោធារបស់ប្រទេសចិនបាននិយាយនៅថ្ងៃព្រហស្បតិ៍នេះថា កងកម្លាំងចិន បានតាម និងព្រមានដេញនាវាចម្បាំងរបស់សហរដ្ឋអាមេរិកដែលចូលដែនទឹកនៅជិតប្រជុំកោះ Paracel ក្នុងសមុទ្រចិនខាងត្បូង នៅក្នុងភាពតានតឹងចុងក្រោយបង្អស់នៅក្នុងផ្លូវទឹកដែលមានជម្លោះនេះ។ នេះ បើតាមទីភ្នាក់ងារសារព័ត៌មាន Reuters។
បញ្ជាការដ្ឋានរបស់កងទ័ពរំដោះប្រជាជនចិននៅភាគខាងត្បូងបាននិយាយថា នាវាចម្បាំង USS Benfold របស់សហរដ្ឋអាមេរិក បានធ្វើដំណើរ«ខុសច្បាប់»ចូលក្នុងដែនទឹករបស់ចិនដោយគ្មានការអនុញ្ញាត រំលោភលើអធិបតេយ្យភាពរបស់ប្រទេសចិន ហើយថា កងកម្លាំងជើងទឹក និងអាកាសរបស់ចិន បានដេញតាមនាវានោះ។ កងទ័ពចិនបានបន្ថែមថា «យើងទាមទារយ៉ាងម៉ឺងម៉ាត់ឱ្យភាគីសហរដ្ឋអាមេរិកបញ្ឈប់ជាបន្ទាន់នូវសកម្មភាពបង្កហេតុបែបនេះ បើមិនដូច្នេះទេ សហរដ្ឋអាមេរិក នឹងមានផលវិបាកធ្ងន់ធ្ងរពីព្រឹត្តិការណ៍ដែលមិនអាចមើលឃើញជាមុន»។
កងទ័ពជើងទឹកសហរដ្ឋអាមេរិកបាននិយាយថា នាវា Benfold «បានអះអាងថា ខ្លួនមានសិទ្ធិ និងសេរីភាពនាវាចរណ៍នៅក្នុងតំបន់ជុំវិញកោះ Paracel ស្របតាមច្បាប់អន្តរជាតិ»។
អ្នកនាំពាក្យកងនាវាទី៧ សហរដ្ឋអាមេរិកលោក Mark Langford បាននិយាយថា «នៅពេលបញ្ចប់ប្រតិបត្តិការ នាវា USS Benfold បានចេញពីតំបន់ដែលចិនទាមទារហួសហេតុនោះ ហើយបន្តប្រតិបត្តិការនៅក្នុងសមុទ្រចិនខាងត្បូង»។
សហរដ្ឋអាមេរិកតែងតែអនុវត្តនូវអ្វីដែលខ្លួនហៅថា សេរីភាពបេសកកម្មនាវាចរណ៍នៅសមុទ្រចិនខាងត្បូង ប្រឆាំងនឹងការទាមទារទឹកដីរបស់ចិន។ ចិនបានបង្កើតប៉ុស្តិ៍យោធានៅលើកោះសិប្បនិមិត្តក្នុងដែនទឹកដែលជាផ្លូវឆ្លងកាត់ដឹកជញ្ជូនសំខាន់ៗ ហើយជាតំបន់សម្បូរឧស្ម័ន និងជាកន្លែងនេសាទដ៏សម្បូរបែបផងដែរ។
សមុទ្រចិនខាងត្បូង បានក្លាយជាចំណុចក្តៅមួយក្នុងចំណោមចំណុចក្តៅជាច្រើននៃទំនាក់ទំនងរវាងចិន និងសហរដ្ឋអាមេរិក ដោយរដ្ឋាភិបាលក្រុងវ៉ាស៊ីនតោន បានច្រានចោលនូវអ្វីដែលសហរដ្ឋអាមេរិកហៅថា ការទាមទារទឹកដីដោយរដ្ឋាភិបាលក្រុងប៉េកាំងដោយខុសច្បាប់។ ចិន បានទាមទារទឹកដីដ៏ច្រើនសន្ធឹកសន្ធាប់នៃសមុទ្រចិនខាងត្បូង។ តៃវ៉ាន់ វៀតណាម ម៉ាឡេស៊ី ព្រុយណេ និងហ្វីលីពីន សុទ្ធតែបានទាមទារត្រួតលើគ្នា៕